Read Sangtam Naga RIWÜRÜ NGUCHI 22 Bible Online

RIWÜRÜ NGUCHI 22 - Sangtam Naga bible

RIWÜRÜ NGUCHI 22

¹“Ajünirüti ko tpurüti, Ihnü ade nührü bete I alanglang yonung nyiengtü!”

²Abinü arüh te Ibri yu la chocho yuchi arühnü alaa yah-adu kangcho; ko abinü arüh te chomüsucho.

³“Ih Jihudarü khüdu, Cilicia lih Tarsus yangdi la surocho, ta Jerusalem la Gamaliel khehla khinü zichehcho. Ihsa jümürü yuzeng adrengdreng la lümlong ngucho, ko chünye nührü hila lirü atümung kyo Ihsü Tsingrangba khyang müsachehjücho.

⁴Hiba Lang la tsehrü nyitsarüti Ihnü süsohnü dhsümthsecho. Ihnü adhrerü ko khingkurü rangnü arangyoh la yohpücho.

⁵Hütsü nengdang Amichahba Bebürü ko azirüti I yuzi lile. Damaskas la lirü ajünirü Jihudarü yang arühnü thrahcho vathrah Ihnü khyüchopü, Ihnü hütsüla lirü rangpü rah Jerusalem yang noro khingchinung Ih wücho.

⁶“Ih Damaskas amünyethsa rode, dhrongyengnü nyüthung koh ninglangnü atsingse khüdu Ih mükangmüla tehcho.

⁷Hütsüde Ih alih la longchocho ko I te yuva khüdunü yo yuchicho, ‘Saul, Saul! Tuepü nühnü Ih dhsümthsero?’

⁸Ihnü lalingcho, ‘Abüdongba, nüh süo?’ Abinü I te yocho, ‘Ih nühnü dhsümthseba Nazaret-rü Jisu.’

⁹I te yarütinü atsingse tsü ngucho, ta sünü I te chotacho abi yuvalü müyuchicho.

¹⁰Ko Ihnü yocho, ‘Abüdongba, Ihnü tu nguchinung?’ Abüdongbanü I te yocho, ‘Shemüsung ko Damaskas lang wüng, ko hütsüla nühnü tu nguchinung hütsü nü te yonung.’

¹¹Atsingse tsünü I nah tohpehcho, hütsünü I müyangrütinü I khehnü shüripü Damaskas lang no züducho.

¹²“Hütsüba yangdi la yangthsa la thurü Ihsa yuzeng nyirü ko hütsüla lirü Jihudarü atümungnü jengreng jüba nyüh khüdu anengnü Ananias licho.

¹³Abinü I yanglang ro Ih müshüm yapü yocho, ‘Anirü Saul, thali ngung!’ Hütsüde tsünü Ihnü ngunung kohcho ko abi chah dhengcho.

¹⁴Abinü yocho, ‘Ihsa jümürüti Tsingrangbanü abi lümcho müdhesohnung, abi amüsaba dikehbong ngusohnung, ko apu yuvanü cho yuchisohnung nüh throchehko.

¹⁵Tunüo nühnü tu ngucho ko yuchicho hütsü nyitsarü atümung te abi nengdang nüh yuzi thsanung.

¹⁶Ko ade, nüh tuepü münuro? Shemüsung, bapting ko abi te dangkhidangnangnü nü münyi thsüthohng.’

¹⁷“Ih Jerusalem lang thalicho, ko Ih amübükuh la dangkhidangnang yade, Ihnü

¹⁸müngucheh khüdu la Abüdongba ngucho. Abinü I te yocho, ‘Thsüthsang ko Jerusalem lanü zah tsieng, tunüo hila lirünü I nengdang nü yuzi mükyüchonung.’

¹⁹Ko Ihnü lalingcho, ‘Ihnü Sinagog la wünü, nü chah yudsirüti rangnü lahcho arühnü longi müdhele.

²⁰Ko nü yuzi jüba Stefan mapsehde, Ipu mii hütsüla mapsehng pü yonü amapsehrü jengki bijüpü yacho.’

²¹Abüdongbanü I te yocho, ‘Wüng, tunüo yangpirüti yanglang ashu la Ihnü nüh müthehnung.’ ”

²²Hütsü tashi arühnü abi te nyicho, hütsükolü arühnü khong züde yocho, “Abi nükhung! Abi mapsehng! Abi akang linung müdekheng!”

²³Arühnü longmüsah arüh shü kichi alih chaa sohcho.

²⁴Romanrü anüchibanü tuepü arühnü abi nyümnü züdecho hütsü müdhenung nengdang xüpnü yutsingnung roshengvi lang Paul nowünung abi nyitsarüti khyang yuzeng jücho.

²⁵Ta khode arühnü abi xüpnung nengdang rocho, Paulnü hütsüla yaba anüchiba te yocho, “Nührünü Roman shutsakhung khüdu tu thsamehchonang yuzi müyangchipü xüpnung athsalang mah-o?”

²⁶Anüchiba tsünü hütsü yuchinü, aziba yanglang wünü yocho, “Nüh tu nguchiro? Hütsüvi tsü Roman shutsakhunge!”

²⁷Achotsü aziba tsünü Paul yang wünü abi te tsingdhengcho, “Nüh Romanrü mah-o? I te young?” Paulnü lalingcho, “Ho.”

²⁸Aziba tsünü yocho, “Ihsü thsi khütango jüpü kangchoe.” Paulnü yocho, “Ta Ihlü asuro denüe.”

²⁹Abi ixilihnü rah yohpücho ko Paul tsü Roman shutsakhungepü müdhede, aziba tsüsü drücho.

³⁰Ta aziba tsünü tu chahnü Jihudarünü abi mülangjücho hütsü yuzi müdhenyücho. Achotsü nyümong khüu abinü Paul lehchehjüpü ko bebü ayingti ko ashimükhong shibülungnung yuzeng jücho. Hütsüpü abinü Paul nowü arüh bete yasohcho.