Read Sangtam Naga RIWÜRÜ NGUCHI 23 Bible Online

RIWÜRÜ NGUCHI 23 - Sangtam Naga bible

RIWÜRÜ NGUCHI 23

¹Paulnü ashimükhongrü chah dhengkehnü yocho, “Ajünirü Israelrüti, Tsingrangba jingte chünye yingcheh I kang liroba nengdang I lümlong müsa lile.”

²Amichahba bebürü Ananiasnü abi müshüm yarüti te abe la tsü tangjüng pü yocho.

³Hütsüde Paulnü abi te yocho, “Nüh athru müyücho dengzi! Tsingrangbanü nüh lahnung. Yuzengnü I yukhanung nüh hütsüla pümre, ta I chah tangnung yuzeng jüba tsünü nüh yuzeng thsangnyangre!”

⁴Paul müshüm yarütinü abi te yocho, “Nühnü Tsingrangba amichahba bebüba müthsamünyüre!”

⁵Paulnü lalingcho, “Ajünirü Israelrü, abi amichahba bebübaepü Ihnü mümüdhecho. Amüsa yunü yore, ‘Nührü yangthsarü nyüm nührünü amütsa müchobae’ ”

⁶Khode Paulnü amülung la tsü Sadukirü ko Farisirü khürü zeh ngucho, abinü ashimükhong la tsü züde yocho, “Ajünirü Israelrü, Ihsü Farisirü tsurü Farisirü khüdu lile. Asürüti kangchehlinung alongdi licho nengdang Ih hila yukha chah yale!”

⁷Abinü hütsü yoyeng, Farisirü e Sadukirü kahla yübütanü arüh mülung tsü changnahcho.

⁸(Tunüo Sadukirünü asürü kangchehliba müle ko ninglang riwürü mahkhang anbüti mülepü yocho; ta Farisirünülü hiri asangding chah yudsicho.)

⁹Khongba tsü alaa du kangcho, ko Farisirü mülung lanü yuzeng adorü khürünü shemüsu zinü nyümcho: “Hiba nyitsarü chah Ihrünü tu mülang müngure! Anbü khüdu mahkhang ninglang riwürü khüdunü abi te yuje chotapü linung!”

¹⁰Khiyu tsü dira kangchonü, Paul tsü zangzang rehnah pehnung aziba tsünü lümxücho. Achotsü abi rothsarüti te wünü amülung lanü Paul tsü nücheh roshengvi lang nowünung yuzeng jücho.

¹¹Hütsü romang Abüdongbanü Paul müshüm yapü yocho, “Tüdrü! Nühnü Jerusalem hila I nengla yuzi thsako, hütsü roh-i Rome lasü nguching.”

¹²Nyangnyü khüu Jihudarü khürü müjang shirüta arah khüdu külüpcho. Arühnü Paul mümapsehde mütsunung mahkhang müyongnung yuchümcho.

¹³Arah hi külüpla zehrü arüh yüre chah alaa thsacho.

¹⁴Hütsüpü arühnü wü bebü ayingti ko azibarüti te yocho, “Ihrünü Paul mümapsehdelü tusü mütsunung mahkhang müyongnung yuchümko.

¹⁵Hütsüeko ade, nührü ko ashimükhongnü Romanrü aziba te Paul yu alaa tsitsanung lilepü yorü roh-i nümüla abi hila no jüronung kihchieng. Ta abi hi müchie mapsehnung ihrünü rungnüm yingnung.”

¹⁶Ta Paul bhülinü arüh rah tsü yuchipü, roshengvi lang tsü wünü Paul te yocho.

¹⁷Hütsüde Paulnü anüchirü khüdu dsinü yocho, “Hiba dhrezaba hi aziba yanglang nowüng, abi te lango ayonung lile.”

¹⁸Anüchiba tsünü abi aziba yang nowü yocho, “Arangyoh la liba Paulnü Ih dsicho ko hiba dhrezaba hi nü yanglang nowüng pü tsingdhengcho, tunüo abi nü te lango ayonung lile.”

¹⁹Aziba tsünü akhehnü shüripü nümüi abi te tsingdhengcho, “Nüh I te ayonung tu liro?”

²⁰Abinü yocho, “Jihudarü yangbenü atu nü te Paul ashimükhong yanglang, abi khiyu alaa tsitsanung no jürungpü kihchinung kihtako.

²¹Ta arüh yu tünyi, tunüo arüh nyüh yüre chah alaa langla thseh pümnung. Abi mümapsehde arühnü mütsumüyongnung yuchümko. Hütsüta nguchinung arüh rungnümko ko nü yu du yingle.”

²²Aziba tsünü yocho, “Nühnü I te yoba hi sütesü tümüdhesoh.” Ko abinü dhrezaba tsü tsisohcho.

²³Hütsüde azibanü abi yanglang anüchirü nyüh anyüh dsironü yocho, “Kaesarea lang wünungba rothsarü thsih anyüh, kuri chah pümrü nyühre ko thsuh birü nyüh thsih anyüh shomülang düku bekhyah la shemüsunung rungnüm.

²⁴Ko Paul pümsohnung Kuri jüng ko abi tsanü Governor Felix chihjüng.”

²⁵Hütsüpü anüchirü aziba tsünü vathrah hita thrahcho:

²⁶“Adiuba Governor Felix yanglang Klaudius Lesiasnü salüm jüre.

²⁷Jihudarünü hiba nyitsarü hi rangpü mapsehnung thsacho. Ta abi Roman shutsakhungepü nyisinü Ihnü rothsarü nowü abi khümchocho.

²⁸Tu nengdang abi mülangjüchonang müdhenung nengdang arüh ashimükhong yang abi no jowücho.

²⁹Ta abi sünung mahkhang rangyohnungthsa Ihnü mülang tusü müngu; abi mülangjüba tsü arühbürü yuzeng lahpinüe.

³⁰Ko abi nyüm rah khüdu lilepü I te yochonü, Ihnü nüh yang abi dhsüthsamüthehnung dhrongchehcho. Abi mülangjürüti te nü bete abi nyüm yuzi jüng pü Ihnü yoko.”

³¹Rothsarütinü arüh khyang yuzeng jücho roh-i nguchicho. Arühnü Paul nüchonü hütsü romangnü Antipatris chii nowücho.

³²Nyümong khüu tsü ajingnü rothsarüti tsü roshengvi lang thalicho, ko kuri chah pümrüti tsü abi yola mütozah wücho.

³³Arühnü abi Kaesarea lang nowü vathrah ko Paul abi khyang jücho.

³⁴Governornü vathrah tsü khipü abi khüi limih lanüopü tsingdhengcho. Khode abinü abi Cilicia lanüepü müdhecho,

³⁵abinü yocho, “Nü mülangjürüti rode, Ihnü nü yu nyidhengnung.” Hütsüpü abinü Paul Governor kuhla nyahnü yohpünung yuzeng jücho.