Read Sangtam Naga RIWÜRÜ NGUCHI 24 Bible Online

RIWÜRÜ NGUCHI 24 - Sangtam Naga bible

RIWÜRÜ NGUCHI 24

¹Nyümong münga lipü, Amichahba Bebüba Ananiasnü abi yola azirüti khürü ko yukharü anengnü Tertullas zeh Kaesarea lang wücho. Arühnü Governor Felix shiro Paul nyüm mülangti jücho.

²Hütsüde Paul dsi rocho, ko Tertullasnü hiroh-i mülangjücho: “Adibong! Nüh athsehthsa langnüba la bekhyah asheng nü yangtsa la ihrü norole, ko Ihsa limih shulüm amülichi adrong chürole.

³Ihrünü hi apümlang ko lede künyangseh khyüchore.

⁴Ta Ihnü bekhyah asheng mükhyüjünyüre, hütsüeko yanglilümnü ihrü yu hi nyidhengjüng.

⁵Hiba nyitsarü hi athsangthsi jürü khüdu lile; abinü lihküp la lirü Jihudarü yola yubejarong chürosohre ko Nazarin mülung la anüchirü khüdu lile.

⁶Abinü amübükuh mii münyijünung müküpchonü ihrünü abi rangcho. (Ko ihrübürü yuzeng aichi abi yu khanung lümcho,

⁷ta amichahba anüchiba Lesias ro abinü abi rohcheh tsicho.

⁸Hütsüpü Lesiasnü abi mülangjürüti tsü nü yanglang ronung yuzeng jücho.) Nühnü apu te yudsingde, ihrünü tu chahnü abi mülangjüro hütsü yuziti nüpunü nyichehnung.”

⁹Ko Jihudarü zeh hiri tsü yuje-epü mülangjücho.

¹⁰Hütsüpü Governornü Paul khyang chonung mülajücho, ko Paulnü chocho: “Kang adrong hiba yucho michah nüh yukharü li rocho Ihnü müdhele, hütsünü nü bete Ih alanglang yu yonung shulüm künyangre.

¹¹Ih Jerusalem lang mübünung wüchoba nyümong dhüre-anyüh mii müjunge hütsü nüpunü müdhenung.

¹²Amübükuh la Ihnü sütesü rehta arühnü müngu, mahkhang Sinagog la thsanye ko yangdi lasü thsanye Ihnü nyitsarüti yola yubejarong müchürosoh.

¹³Mahkhang ade Ih nyüm mülang jüba nengdangsü arühnü yuzi müjüchehnung.

¹⁴Ihnü nü te hilü nyengchore: Arühnü arahkheh-eko yoba Lang la tsü tsehnü Ihnü ihrü jümürü Tsingrang mübüre. Ta Ihnü Mosa yuzeng la thrah liba ko azikehrü vakha la zehcho lüpcho la yudsire.

¹⁵Arühnü amüsarü ko amümüsarü anyüding kangchehli ronungepü longdicho roh-i, Ihnüsü Tsingrangba chah longdire.

¹⁶Hütsünü Tsingrangba ko nyitsarü jingte lümlong amüsa linung nengdang Ihnü lede I kohcho nguchire.

¹⁷“Kang adrong Jerusalem lanü za lipü, I nyitsarü khyang thsi aza hijüpü amübü jünung hütsülang wücho.

¹⁸Ih hütsüta yade, müsachehba nguchi thümko khanglang arühnü amübükuh la Ih ngucho. Hütsüla I te nyitsarü mülicho ko yubejarongsü mülicho.

¹⁹Ta hütsüla Asia lanü Jihudarü khürü licho; Ih nyüm tunang dusü mülangjükhang, arühbürü hila roba thsako.

²⁰Mahkhang Ih ashimükhong bete yade tu thsamehcho mülang rangchehcho hila yarüti khyang yosohng,

²¹Ih arüh bete yade Ihnü yu khüdu du yocho: ‘Ihnü asürüti kanglinunge ko yudsicho nengdang chünye nührünü I khiyu khare.’ ”

²²Hütsüde Felix, sünü Lang nengdang müdhejung licho, abinü yukhaba tsü zahsohcho. “Khode amichahba anüchirü Lesias ro chihcho,” abinü arüh te yocho, “Nührü yu tsü Ihnü khajünung.”

²³Paul tsü tsa nyahsohng, ta khü müsha yohpüjüng, ko abi thsütahti chixinung ashangrü khyang mülajüngpü yuzeng jücho.

²⁴Nyümong khürü khupü Felixnü anitpü Jihudalarü Drusilla zeh rocho. Ko Paul dsiro Jisu Khrista chah yudsi nengdang yosohcho.

²⁵Ta Paulnü atsa, abürü jangjang rahsehba ko aronung yukhaba Nyümong nengdang yuzi jo chode, Felixnü dro yocho, “Nüh tsieng. Ih bekhyah ngude nüh thali dsinung.”

²⁶Abi khyang Paulnü pohsa jünungepü abinü longdicho, hütsünü adrongpi abi dsinü chotacho.

²⁷Kang anyüh khupü, Porcius Festusnü Felix mülihcho. Felixnü Jihudarü künyangsohnyülangnü Paul arangyoh la yohpücho.