Read Sangtam Naga RIWÜRÜ NGUCHI 25 Bible Online

RIWÜRÜ NGUCHI 25 - Sangtam Naga bible

RIWÜRÜ NGUCHI 25

¹Festus hütsü lih chihpü nyümong asang khanglang Kaesarea lanü Jerusalem lang wücho.

²Bebü ayingti ko Jihudarü langnürütinü Paul nyüm mülangjüba hirocho.

³Arühnü Festus te Jerusalem lang Paul noronung kihchicho, tunüo arühnü lang lanü abi mapsehnung arah külüp-pü licho.

⁴Festusnü lalingcho, “Paul Kaesarea la rangyoh lile ko Ipusü tunyah mülipü hütsülang wünung.

⁵Nührü langnürüti I yola Kaesarea lang rosohng ko hütsüba nyitsarünü lango dusü thsameh likhang arühnü abi mülangjüsohng.”

⁶Festusnü arüh yola nyümong keh a dhürenang mungpü abinü Kaesarea lang wücho. Nyümong khüu abinü yukha chah pümcho ko Paul noronung yuzeng jücho.

⁷Khode Paul ro chihcho, Jerusalem lanü rorüh Jihudarünü abi mükangtipü arühbürünü mii yuzi müjüchehba yu adrongnü abi nyüm mülangjücho.

⁸Ta Paulnü apu phikhüm yocho: “Ihnü Jihudarü yuzeng mahkhang Amübükuh mahkhang Kaesar nyüm tu thsameh münguchi.”

⁹Ta Festusnü Jihudarü künyangsohnyonü Paul te tsingdhengcho, “Nüh nyüm yuzi hiri nengdang I bete Jerusalem la yu khasohnyürü mah-o?”

¹⁰Paulnü yocho, “Yangthsabong yukhaji, khüde I yu khanung athsalang, hütsü bete Ih yale. Nühnü longi tsüple, Jihudarü te Ihnü tu thsameh münguchi.

¹¹Ih asünung leng, yuzeng lango dusü thsameh likhang, hütsü lanü tsichehnung Ihnü mükihchinung. Ta arühnü Ih nyüm hiroba la tsü yuje mülikhang, sünüsü Ih arüh khyang jünung mükoh. Ihnü Kaesar te kihchire.”

¹²Hütsüde, abi rükutarüti te kihtapü Festusnü lalingcho, “Nühnü Kaesar te kihchiko, hütsüeko nüh Kaesar yanglang wünung.”

¹³Khü lipü yangthsaba Agrippa e Bernice nyüh Festus xodhengnung Kaesaria lang rocho.

¹⁴Arüh hütsüla nyümong azachah lipü khanglang, Festusnü Paul nengdang Yangthsaba te yocho: “Hila Felixnü rangyoh pehjücho nyitsarü khüdu lile;

¹⁵ko Ih Jerusalem lang wüde, Jihudarü bebü ayingti ko azirütinü abi nyüm yuzi hironü abi mülangjüngpü tsingdhengcho.

¹⁶Romanrü yangthsanü meh abüdongba e mülangjürü nyüh dhsükehta abürü alanglang müyodhengsohde süsü mümülangjüre.

¹⁷Hütsüpü khode arüh hila rocho, Ihnü mümünupü nyümong khüu tsünü yukha chah pümcho ko nyitsarüba tsü noronung yuzeng jücho.

¹⁸Abi mülangjürütinü shemüsucho, ta abinü thsamehcho tu nengdangnü arühnü abi mümülangjüchehcho.

¹⁹Arüh yuji apümnü arühbürü yangthsa nengdang ko nyitsarü khüdu anengnü Jisu, abi sücho ta Paulnü abi akang lilepü yocho, hütsütari nengdang du thsacho.

²⁰Ko Ihnü hütsüri khiyu nengdang yuzi ngunung mütsachonü, Ihnü Paul te Jerusalem lang wü khanung mülüm-opü tsingdhengcho.

²¹Ta Paulnü abi nyah yohpüng, ko abi khiyu tsü Kaesar khyang khasohngpü kihchicho. Hütsünü Kaesar yanglang abi mümüthehde, abi nyah yohpüngpü Ihnü yuzeng jücho.”

²²Agrippanü Festus te yocho, “Hiba nyitsarü hi Ipunü nyidhengnyüle.” Festusnü lalingcho, “Nühnü atu abi yu yuchinung.”

²³Nyümong khüu Agrippa e Bernice nyüh tsü rothsarü anüchirü ko yangdi la aying nyitsarüti zeh amülung yang dee hechi züducho. Festusnü yuzeng jo Paul tsü norocho.

²⁴Festusnü yocho, “Yangthsaba Agrippa ko hila pümrü atümung: Hila lirü ko Jerusalem la lirü Jihudarü atümungnü Ih yang, sü nyüm yu hirocho, hiba nyitsarü tsü nührünü ngule. Abi akang mülisohbaepü arühnü khongchehchücho.

²⁵Ta asünung leng abinü thsamehcho Ihnü tu müngu. Ko apunü mii Kaesar yang hinungechonü, abi müthehnung Ihnü dhrongchehko.

²⁶Ta Kaesar yanglang abi nengdang atsitsa yu thrahnung tu müngure. Hütsünü abi thsatsodhengko lango dusü thrahnungthsa, nührü bete alathsa, nüh Yangthsaba Agrippa! bete abi norore.

²⁷Tunüo arangyohrü khüdu abi nyüm atsitsa mülangjüba yuzi mülipü müthehnung tsü I nengdang athsalang mah.”