Read Sangtam Naga RIWÜRÜ NGUCHI 26 Bible Online

RIWÜRÜ NGUCHI 26 - Sangtam Naga bible

RIWÜRÜ NGUCHI 26

¹Agrippanü Paul te yocho, “Nüpu nengdang chonung mülare.” Hütsüde Paulnü akheh müyungchü apu alanglang yu hiroh-i chocho:

²“Yangthsarü Agrippa! Jihudarünü mülangjüba apüm nengdang chünye nü bete Ih alanglang yu chonung nguchonü,

³alathsa nühnü Jihudarü yangthsa ko khiyu apüm longi müdhechonü, müngu likopü lümre. Hütsüeko, rangchonü nyinung kihchire.

⁴“Ih azadenü khüta lirocho Jihudarü atümungnü müdhele. I kang ayung, akhudi Ipu yucho la, hütsüpü Jerusalem la lirocho arühnü müdhele.

⁵Ih akhudinü khüta ihrü yangthsa mülung Farisirü yola adrengdreng khiyoh kang rocho, hütsü nengdang arühnü lümrelang I nengdang yuzi jüchehle.

⁶Ko ade ihrü jümürü te Tsingrangbanü nyengchocho ngunung longdichonü,

⁷khüi ihrü yucho dhüre-anyühnü ama atsingse mübonü ngunung longdiro, hütsü nengdang yukhanung hila yale. Yangthsaba! hiba alongdi nengdangnü Jihudarünü Ih mülangjüre.

⁸Tsingrangbanü asürü kanglisohrepü yudsinung tuepü nührü hila lirüti nengdang amükohnungo?

⁹“Ihnüsü Nazaret-rü Jisu nyümnü I kohcho nguchinungepü lümcho.

¹⁰Ko hütsü Ihnü Jerusalem la nguchicho. Ihnü bebü ayingti chahnü tase khyüpü Tsingrangba nyitsarü khütango arangyoh la yohpücho; ko khode arüh süsohcho, Ihnü arüh nyüm kheh müthungcho.

¹¹Ihnü Sinagog la adrongpi arüh khingchicho ko arüh yudsi pehsohnung müküpcho. Arüh te khütang zichüronü yangpirü yangditi la mii wünü Ihnü arüh dhsümthsecho.

¹²“Hi nengdang bebü ayingti chahnü yuzeng ko tase khyüpü Ih Damaskas lang wücho.

¹³Yangthsaba, lang la nyüthung koh nyü tenü avisaba atsingse khüdu ninglangnü Ih ko I yola shitsehrüti mükang tehkehcho.

¹⁴Ihrü atümung alih la longchocho, ko Ibri yunü yuva khüdunü I te yo yuchicho, “Saul, Saul! Tuepü nühnü Ih dhsümthsero? ‘Thsuh chah müthikehkhanglü nüh thsakehnung’

¹⁵Hütsüde Ihnü yocho, ‘Abüdongba, nüh süo?’ Abüdongba tsünü lalingcho, ‘Ih nühnü dhsümthseba Jisu.

¹⁶Ta shemüsu yang. Nüh I dikehrü kangnung nengdang nü te chüro shirücho. Nühnü chünye tu ngucho ko aronung la tu ngusohnung liro, hütsü aparü te yuzi jünung.

¹⁷Jihudarü ko yangpirüti, sürü yanglang Ihnü nüh wüsohnung, Ihnü arüh kheh lanü nüh khümchonung.

¹⁸Arühnü I chah yudsicho khu arüh münyi mülang pehnung ko Tsingrangba athrochehrü yola nohlüm khyürü kangnung nengdang, amarürah lanü atsingse yang ko Satan zii lanü Tsingrangba yanglang arühnü ximülanung nengdang nühnü arüh nahtse khangthrujünung’

¹⁹“Hütsüeko, Yangthsarü Agrippa, ninglangrü müngucheh te Ihnü yocho münyi müli.

²⁰Ta akhudi Damaskas la, Jerusalem la, ko Judea limih apümlang ko yangpirü yolasü, arühnü lasih thsamüla Tsingrangba yang ximülabae ko lasih thsamülacho kyo nguchibaepü Ihnü thsingyucho.

²¹Hütsü ngangnü Jihudarünü Ih amübükuh lanü rangcho, ko Ih mapsehnung müküpcho.

²²Ta chünye yingcheh Tsingrangbanü Ih tro role, hütsünü nührü azikyah ko amülah atümung bete hila Ihnü I yuzi jüre. Ihnü choba hi du azikehrüti ko Mosanü atikehnung yocho, hütsü nengdang du lile:

²³Jihudarü ko yangpirü te akangcheh atsingse sobhonung Mesia tsü chongchabae, ko asü lanü akhudiba kanglibae.”

²⁴Hütsüta Paulnü apu alanglang yode, Festusnü abi chah mütikeh yocho, “Paul, nüh mükyangle! Nüh amüdhe diraba tsünü nüh mükyangsohre!”

²⁵Paulnü lalingcho, “Adirü, Ih mümükyang! Ihnü yujeba tsü chore.

²⁶Yangthsarü Agrippa! Hiri nengdang nühnü müdhekhang lichonü, Ihnü nü te müringpü chore. Hiri atümung tsü nühnü tsüplepü Ihnü lümre, tunüo hi nangolang rang tikehchoba mah.

²⁷Yangthsarü Agrippa, nühnü azikehrü yu yudsirü mah-o? Nühnü yudsirepü Ihnü müdhele!”

²⁸Agrippanü Paul te yocho, “Shikhe akhikyah hila nühnü Ih khristan kangsohnung lümrü mah-o?”

²⁹Paulnü lalingcho, “Shikhe akhikyahla nye ko ashengla nye, hiri ixilih chah khu nüh du mah, ta chünye I yu yuchirü atümung Ih kyo kangsohnung I dangkhidangnange!”

³⁰Hütsüde Yangthsaba, Governor, Bernice ko aparü atümung yamüsucho,

³¹ko arüh shishode khüdunü khüdu te yocho, “Sünung mahkhang rangyohnung leng hiba nyitsarünü tu münguchi.”

³²Ko Agrippanü Festus te yocho, “Hiba nyitsarünü Kaisar yang mühilang, abi yah müthehba thsako.”