Read Sangtam Naga RIWÜRÜ NGUCHI 27 Bible Online

RIWÜRÜ NGUCHI 27 - Sangtam Naga bible

RIWÜRÜ NGUCHI 27

¹Khode ihrü Italy lang kihtang lanü wübaepü dhrongchehcho, “Kaesar Rothsarü” ko dsiba rothsarü mülung la anüchiba Julius khyang arühnü Paul ko aparü arangyohrü khakhuchüjücho.

²Asia lih lang wünung liba kihkuh khüdu la küducho, ko Adrametium lanü shemüsucho. Ihrü yola Tesalonika lanü Macedoniarü khüdu Aristarkus zehcho.

³Nyümong khüu ihrünü Sidon chihcho. Juliusnü Paul te yanglilüm ngunü abi shangrüti shirütasoh ko abi thsütah jüsohnung mülajücho.

⁴Ihrünü hütsü lanü shemüsucho; ta nyübongnü ihrü lahpi füchonü ihrünü Cyprus mütro lahpi tsikeh wücho.

⁵Ihrünü Cilicia ko Pamfelia kihdi kehnü Lycia la Myra chihcho.

⁶Hütsüla anüchibanü Alexandria lanü Italy lang wünung kihkuh khüdu ngu, ihrü hütsüla küdusohcho.

⁷Nyümong adrong khyonü, haririnü ihrünü Naidus yangdi chihcho. Ko nyübongnü awü mütsachonü Salmone khu Krete mütro lang wücho.

⁸Mütro tsü jüpnü haririnü khümcho Müdongji ko dsiba Lasia yangdi amünyethsa ro chihcho.

⁹Hütsüla shikhe asheng pehpü shitsehnung dhsürü kangcho, tunüo adelü Ritsa Nyümong tsü khutsipehcho. Hütsüde Paulnü arüh te amüzahnung yu hi yocho:

¹⁰“Adirüti, hi tinü Ihsa shitseh dhsürü thsanung; bha ko kihkuh nengdang athsangnyang amülah mütohnung ko akangsü changnung Ihnü dhengchehre.”

¹¹Ta rothsarü anüchibanü Paulnü yocho tenü kihkuh abüdongrü ko Captain-nü yocho du alaa nyicho.

¹²Kihkuh müdongji tsü tsingkang la linunglü mütsachonü adrongunü kohkhang Foenix chihpü hütsüla tsingkang linyücho. Foenix tsü kihjing-nyüzüdu lahpi ko kihku-nyüchüro lahpi nguba Krete mütro la kihkuh müdongji khüdu licho.

¹³Kihjing lahpinü nyübong longlüm fücho, ko arühnü arüh lümcho tikehnungepü lümnü kihtang mütsengsing lehchehnü Krete mütro bekhüm iinü wücho.

¹⁴Ta tunyah mülipü “Nyüchüro lahpi nyübong” pü dsiba tsü mütro langnü khütang zii fü jürocho.

¹⁵Hütsünü kihkuh chah nyümcho ko kihkuh tsünü nyübong lahpi müpichehchonü, ihrünü yah pehjücho, ko nyübong du tsünü ihrü nüchisohcho.

¹⁶Kihjinglang Kauda mütro azikyah khu rode du ihrü kyahshangcho. Hütsüla, haririnü ihrünü kihkuh la kihtang tsü khümchocho.

¹⁷Arühnü hütsü tphahcheh ko rangdüshünü kihkuh chah tsü mükangnü xohchingpücho. Arühnü Libya kihbekhüm lihpi ngah la tsü züdunung dronü, nyübong tsung tsü kingacho ko nyübong dunü ihrü nüchisohcho.

¹⁸Tsingxinyübong atrehdi tsü müzahcho, achotsü nyümong khüu kihkuh la bha khürü zangchehchüpehcho,

¹⁹ko nyümong khüu arühnü kihkuh kohro khürü zangcheh pehcho.

²⁰Ihrünü nyümong adrong nyü mahkhang chenghiti müngucho, ko nyübong du tsü mütozah khütang zii fücho. Achangka la ihrü khümchonung alongdi mülipehcho.

²¹Arühnü anyahli müyangtsu roko khanglang, Paulnü yamüsu yocho, “Adirüti, nührünü I yochonyi Krete lanü müshemüsuba thsacho; arelang, hidoi athsangnyang ko achangba hi mümütohba thsako.

²²Ta ade, Ihnü nührü te kihchire, Müsi zieng! Kihkuh chah khu nührü süsü akang müchangnung.

²³Tunüo Ih sü yo, ko sü Ihnü dikehro, hütsüba Tsingrang ninglang riwürü khüdu shomang Ih yang ropü yocho,

²⁴‘Tüdrü, Paul! Kaesar bete nüh yanung. Tsingrangbanü nüh müinü nü yola shitsehrü atümung khümchoko’

²⁵Hütsüeko, müsi zieng, adirüti! Tunüo I te yocho roh-i Ihnü Tsingrangba chah longlangre.

²⁶Ta Ihsa mütro khürü la dümchehchünung.”

²⁷Dhüre müyüu romang, tsingxinyübong tsünü ihrü Mediteranean la dümchehchücho. Yürüptülung koh kihkuh nüchirütinü alih amünyethsa rolepü lümcho.

²⁸Achotsü arühnü kih asohlang müchehdhengcho, ko drenghap yüre sohcho. Khü lipü müchehdhengde drenghap sangre sohcho.

²⁹Arühnü kihkuh tsü lung chah shingkehkhang mütsa pü lümxünü, kihkuh khanglang tsünü amütsengyehsing müyü lehchehcho, ko tsingsenung du nahmürahcho.

³⁰Hütsüpü kihkuh nüchirü tsünü rang tsinung müküpcho; ko arühnü kihtang mütsengyehsing khürü müthehresohnung, kihtang anümnüm tsü kihdi la kinga züdusohcho.

³¹Ta Paulnü rothsarü anüchiba ko rothsarüti te yocho, “Kihkuh nüchirüti müzehkhang, nührü khümchonung alongdi müle.”

³²Achotsü rothsarütinü kihtang hohchingba müyah tsü lesah tsisohcho.

³³Tsingsenung thsade Paulnü arüh atümung te lango dusü tsuyongnung kihchicho: “Chünyenü nyümong dhüre-müyüu nührünü ying role, ko hütsü shikhe ayung tusü mütsu.

³⁴Hütsüeko lango dusü tsunung Ihnü kihchire; hütsünü nührü rezeh kangnung. Nührü thah lanü kuva khüdusü müchangnung.”

³⁵Hütsüta yopü, abinü hümthse khyonü, arüh atümung bete Tsingrangba neng secho, ko hütsü chenah tsunung dikehcho.

³⁶Hütsüde arüh müsi zichicho, ko arüh atümung tsuyongcho.

³⁷Kihkuh la tsü atümungnü nyüh thsih anyüpü nyührepü dhüroh pümcho.

³⁸Atümungnü kükyo tsupü, arühnü tse apüm dhicheh kihdi la pehnü kihkuh tsü yingyasohcho.

³⁹Khode tsingsecho, anürü tsünü alih müdhengchehcho, ta arühnü kihbekhüm khüdu ngucho; ko kohkhang kihkuh tsü hütsüla müdongnungpü dhrongchehcho.

⁴⁰Hütsünü arühnü amütsengyehsing lesah kihyü la longyohsohcho, hütsüpü arühnü müyah tsü lehchehcho, ko kihxüpsing dunü nücho. Hütsüpü nyübong tsünü bekhulang füsohnung nengdang arühnü nyübong tsung tsü dhimüsucho ko ihrünü kihbekhüm lang tsü wücho.

⁴¹Ta kihkuh tsünü alih khüdu chah shingkehcho ko müdongkehcho; abelang tsü alih la shingkehpü mümühachichehcho, ko akhanglang lahpi tsü kilohnü zangzang thsangnyangcho.

⁴²Arangyohrü tsü kihbekhüm yang wecheh tsikhang mütsa pü, rothsarütinü arüh atümung kyüsehnung chotacho.

⁴³Ta rothsarü anüchiba tsünü Paul khümchonyücho, hütsünü arüh lümcho yaticho. Hütsü mülih, kihwe sithsarülü atümung kih la tsohyoh kihbekhüm lang akhu wenü wünung;

⁴⁴ko anyingcho tsü khürü singtpah chah ko khürü kihkuh thsangnyangcho nümnüm chahnü wünung yuzeng jücho. Hütsüta ihrü atümung kihbekhüm tsa chihcho.