Read Sangtam Naga RIWÜRÜ NGUCHI 28 Bible Online

RIWÜRÜ NGUCHI 28 - Sangtam Naga bible

RIWÜRÜ NGUCHI 28

¹Khode ihrü kihbekhüm la tsicheh chürocho, hütsüba mütro tsü Malta epü ihrünü müdhecho.

²Hütsüba yang la lirütinü ihrü tsara kangcho. Tsing ronung dikehcho ko dee thsahchonü, arühnü michang thsa ihrü künyang khyüchocho.

³Paulnü sing müzangbülung bhongpü tala yohde, mürü khüdu ayonglang zehcho athsachonü chüro abi kheh chah yühcho.

⁴Hütsüba yangrü tsünü Paul kheh chah mürü yühkehcho ngu arüh-e arührü chotacho, “Hivilü nyitsarü kyüsehrü khüdu thsanung, abi kihdi lanü tsicheh nye, münguhnü abi akang linung mümülare.”

⁵Ta Paulnü tu müdhsakehpü mürü tsü michang la xahyohchücho.

⁶Arühnü abi fü bümnung mahkhang athsahkhüti khülutsu sünung du dheng yacho. Ta anyahli ying nye abi chah tu mütikehcho ngu, arüh lümcho mülichi yocho, “Hivi hi tsingrangrüe!”

⁷Hütsü lanü dee müshumüshengpü, hütsüba mütro la ayingba nyitsarü Publius luh khürü licho. Abinü ihrü künyang khyüchonü abi kuhla nyümong asang ihrü müdongsohcho.

⁸Hütsüde Publius au rihmi ko ashüh wü füthsa yüpjocho. Paulnü abi yang wünü abi chah akhehnü nyümkeh dangkhidangnangjo kyangjücho.

⁹Khode hütsüta tikehcho, mütro la lirü füthsarü atümung rocho ko abinü arüh kyangjücho.

¹⁰Arühnü ihrü khyang jiyü khütang jücho, ko ihrü shemüsude, ihrü shilang la thsütahti kihtang la yohjücho.

¹¹Choo asang khanglang ihrünü, “Anyütpah tsingrang” pü dsiba kihkuh khüi tsingkangza mütro la tsü müdong yacho, hütsüba chah tsünü Alexandria lanü shemüsucho.

¹²Ihrü Syrakus yangdi chihcho ko hütsüla nyümong asang mungcho.

¹³Hütsü lanü ihrünü mütozah ronü Regium yangdi chihcho. Nyümong khüu kihjinglangnü nyübong fümüsucho, ko nyümong anyüh la ihrünü ro Puteoli chihcho.

¹⁴Hütsüla yudsirü khürü shiro arüh yola ihrü nyükhih khüdu-o mungsohnung kihchicho. Hütsüpü ihrünü Rome lang rocho.

¹⁵Hütsüla yudsirütinü ihrü nengdang yuchicho ko arühnü Apius shithsaji yangdi ko Pümshang Asang chii ihrü shirünung rocho. Khode Paulnü arüh ngucho, abinü Tsingrangba neng secho ko suh zehchicho.

¹⁶Khode ihrünü Rome chihcho, Paul tsü abi müleng anyahrü khüdu zeh linung mülacho.

¹⁷Nyümong asang khanglang Paulnü hütsüla lirü Jihudarü langnürüti te shirütanung dsicho. Khode arüh shibülungcho, abinü arüh te yocho, “Ajünirü Israelrüti, Ihnü Ihsa nyitsarü mahkhang Ihsa jünirüti chahnü khyüchocho yah nyüm tu münguchinyesü, Ih Jerusalem la rangyohcho ko Romanrü khehla khakhuchüjücho.

¹⁸I te yu tsingko khanglang, Ih sünung leng nguchicho tu mürangchehchonü, Romanrünü Ih müthehnyücho.

¹⁹Ta Jihudarünü hütsü münyichonü, Ihnü Ipu nyitsarü nyüm tu mülangjüba mülinyesü, Kaesar yang kihchinungthsa kangcho.

²⁰Hütsünü Ihnü nührü shiro chotanyücho. Tunüo Israelrünü longdiba khyanglangnü ixilihnü Ih hita rah lile.”

²¹Arühnü abi te yocho, “Ihrünü nü nengdang Judea lanü tu vathrah müngu mahkhang hütsü lanü sünüsü hila ro nü nengdang yusi amütsa müyo.

²²Ta nü alümcho tsü ihrünü nyinyüre, tunüo apümlang hiba nüh zehba mülung nyümnü chocho ihrünü müdhele.”

²³Achotsü arühnü Paul te nyümong khüdu throchehcho, ko hütsü nyümong tsü arüh khütango Paul liba la shibülungcho. Abinü arüh te Tsingrangba Yanglih nengdang anyangnyünü ama yingcheh yuzi jo changnah yocho, ko abinü Mosa Yuzeng lanü ko azikehrüti vakha lanü throcheh Jisu nengdang yo arüh kihchonung müküpcho.

²⁴Abinü yocho la tsü khürünü yudsicho, ta khürünülü müyudsicho.

²⁵Hütsünü Paulnü yu khüdu hi yoko khanglang arüh yola münyisita zacho: “Anbü Amüsanü Isaya azikehrü khu nührü jümürü te tsitsa yoko!

²⁶Tunüo abinü yocho, ‘Hiri nyitsarü yanglang wüng ko young: Nührünü ayuchilü yuchinung, ta münyichehnung; Nührünü angulü ngunung, ta müdhengchehnung,

²⁷tunüo hiri nyitsarü lümlong dhamako, arüh nangkhi thsitiko ko arüh nahtse tohko. Mahrelang, arüh nahtsenü ngunung, arüh nangkhinü yuchinung, arüh lümlongnü nyichehnung, arühnü Ih yang ximülanung, ko Ihnü arüh kyangjünung, ko Tsingrangbanü yore.’ ”

²⁸Paulnü yocho: “Hütsünü Tsingrangba akangcheh yuse tsü yangpirü yanglang mütheh lilepü nührünü müdheing. Arühnü hütsü nyinung!”

²⁹(Abinü hi yopü khanglang, Jihudarü tsü arühbürü yola mükakehta amülah chüro zacho.)

³⁰Kang anyüh richeh Paulnü apunü müthsücho kuh khüdu la tsü licho, ko hütsüla abi shirünung rorüh atümung khyüchocho.

³¹Tu müthsungkyangpü abinü Tsingrangba yanglih nengdang thsingyunü ko Abüdongba Jisu Khrista nengdang rezeh docho.