Read Sangtam Naga RIWÜRÜ NGUCHI 3 Bible Online

RIWÜRÜ NGUCHI 3 - Sangtam Naga bible

RIWÜRÜ NGUCHI 3

¹Nyümong khüdu Peter e Johan nyüh dangkhidangnang bekhyah anyüzehlang asang bekhyah la Amübükuh lang wüchi yacho.

²Hütsüla Atsah-atsa dsiba Trahtri te asuro denü jingjahrü nyüh khüdu pümcho. Amübü würü te thsi chingnung nengdang nyümong mükhu abi dhiwü hütsüla pümsohcho.

³Khode Peter e Johan nyüh züduchi ngucho, abinü anyüh te lango jüng pü chingcho.

⁴anyünü abi chah nyeh-e dhengcho, ko Peternü yocho, “Ihrü chah dheng!”

⁵Achotsü abinü arüh chahnü lango ngunung longdinü dhengcho.

⁶Ta Peternü abi te yocho, “Ih taripi ko hon müle, ta Ih tu liro hütsü nü khyang jonung: Nazaret-rü Jisu Khrista nengla shemüsu tsehnung Ihnü yuzeng jüre!”

⁷Hütsüpü abinü akheh tsalangnü marehpü shemüsusohcho. Hütsüde tsünü ajing ko lohla la re zehcho;

⁸abinü tsohmüsu yacho, ko tsehchicho. Hütsüpü abinü tsehchi, tsohchi, Tsingrangba nengse arüh yola amübükuh la züducho.

⁹Hütsüla nyitsarünü abi tsehchi Tsingrangba secho ngucho,

¹⁰ko khode arühnü hütsü Atsah-Atsa Trahtri la pümpü chingkichingnangbasüepü tsüpcho, arüh atümung abi chah tu tikehcho hütsü nengdang nehnü ko nyemüyangcho.

¹¹Nyitsarüba tsü Solomon kekhüm pü dsiba la Peter ko Johan nyüh yola pümde, nyitsarü atümung dee nyemüyang arüh yanglang shibülungcho.

¹²Peternü hütsü ngude, abinü arüh te yocho, “Israelrü, tuepü nührünü hi nengdang nyemüyangro, ko nührü tuepü ihrü chah dhengro? Hi ihrü palu zii mahkhang müsachonü abi tsehsohchoeko nührünü lümrü mah-o?

¹³Abraham, Isak ko Jakob Tsingrang, Ihsa ajü-amü Tsingrangnü abi dikehrü Jisu khyang amüsa ahechi jüko. Ta nührünü abi yangbe khyang jücho, ko Pilatnü müthehnung dhrongchehpü khanglang mii nührünü Pilat jingte abi mükhyüchocho.

¹⁴Abi Amüsa ko atsa thsacho, ta nührünü abi mükhyüchocho, ko amapsehrü khüdu uthring müthehnung Pilat te chingcho.

¹⁵Akang lang nübong tsü nührünü mapsehcho, ta Tsingrangbanü abi sücho lanü kanglisohcho ko hi nengdang yuzi ihrü lile.

¹⁶Abi neng ziinü hiba jingjahba khyang re jücho. Nührünü tu nguro ko müdhero hütsü abi nengla yudsinü nguchicho; nührü atümungnü ngucho roh-i, Jisu nengla yudsinü abi kyangjüko.

¹⁷“Ko ade jünirüti, nührü ko nührü langnürütinü Jisu chah tu nguchicho hütsü nührünü mümüdhechonüepü Ihnü müdhele.

¹⁸Tsingrangbanü azikehrü khu papadenü Mesia tsü chongchabaepü choyohko; ko hiroh-i abinü tikehsohcho.

¹⁹Hütsüeko Tsingrangbanü nührü münyi pehsohnung nengdang lasih thsamülang.

²⁰Hütsükhang, Abüdongba chahnü anbü tase ronung, ko abinü nührü shulüm throchehba Jisu, sü Mesia liro abi müthehnung.

²¹Tsingrangbanü abi amüsa azikehrü khu papadenü chocho kyo, lüpcho asi külüpchiba bekhyah mürode abi ninglanglih la linung.

²²Tunüo Mosanü yocho, ‘Abinü Ih müthehcho roh-i, Abüdongba nührü Tsingrangnü azikehrü khüdu müthehnung, ko abi tsü nührübürü nyitsarü khüdu thsanung. Abinü nührü te tu nguchinung yonang nührünü nyibae.

²³Sünü hütsüba azikehrü yu münyinang abi nyitsarü yolanü nücheh changsohnung.’

²⁴Ko azikehrüti Samuel ko abi khanglang rorüh atümung sürünü yusi hicho, arühnüsü chünye tikehba nengdang hi chocho.

²⁵Azikehrü khu Tsingrangba anyengchocho tsü nührü nengdang lile, ko nührü jümürü te Tsingrangbanü zengchocho la nührü changtare. Abraham te abinü yocho kyo, ‘Nü chahnü trahchocho khu Ihnü limih chah lirü atümung müwajünung.’

²⁶Hütsünü Tsingrangbanü abi dikehrü throchehcho, ko nührü müipi amütsa lang lanü ximüla nührü müwajünung nengdang, nührü yanglang akhu abi müthehcho.”