Read Sangtam Naga RIWÜRÜ NGUCHI 4 Bible Online

RIWÜRÜ NGUCHI 4 - Sangtam Naga bible

RIWÜRÜ NGUCHI 4

¹Peter e Johan nyüh amülung te chota yade, bebürüti, amübükuh nyahrü anüchiba ko Sadukirü khürü rocho.

²Riwürü anyüh tsünü nyitsarüti te Jisu asücho lanü kanglirocho, ko hütsünü asürü kanglinung nengdang yuzi jo docho ngu arüh wahcho.

³Hütsünü arühnü arüh rangcho ko arangyoh la nyümong khüu yingcheh yohpücho, tunüo hütsü anyüzehlang thsacho.

⁴Ta yusi yuchirü adrongnü yudsicho; ko nyitsarü shikhi hajar münga-o kangcho.

⁵Nyümong khüu tsü Jihudarü langnürüti, ko yuzeng adorüti Jerusalem la shibülungcho.

⁶Arühnü amungthriba Bebü Annas, Kaifas, Johan, Alexander, ko amungthriba bebü hung adrong te shirütacho.

⁷Arühnü riwürüti tsü arüh bete yasohpü tsingdhengcho, “Nührünü hi khüta nguchicho? Tu ziinü mahkhang sü nengla nührünü hi nguchicho?”

⁸Hütsüde Anbü Amüsanü jeng Peternü lalingcho, “Langnürüti ko azibarüti:

⁹Chünye ihrü te ajingjahba chah tu nguchi atsa nguchicho ko abi khüta kyangcho pü tsingdhengrükhang,

¹⁰nührü ko Israelrü atümungnü hi müdheing, nührü bete hiba nyitsarü longi kyangpü yaba hi, sü nührünü hamkehcho ko Tsingrangbanü asücho lanü kanglisohba Nazaret-rü Jisu Khrista nengla nguchicho.

¹¹Abi nengdang Amüsa yunü hita yore: ‘Kuthsarünü mükhyüba lung tsü apüm tenü ayingba kangcho.’

¹²Akangcheh tsü abi khu dunü ngunung; Liküp la Ihsa khümchonungthsa Tsingrangbanü sü khyangsü jo müle.”

¹³Ashimükhongrünü Peter e Johan nyüh müsi mülahcho ngu ko arüh akhicho lümlong mülepü müdhede nyemüyangcho. Hütsüde arüh tsü Jisu müyangrütiepü arühnü lümchehcho.

¹⁴Ta arühnü tu müyochehcho, tunüo akyangba apu tsü Peter e Johan nyüh te hütsüla yacho.

¹⁵Achotsü arühnü arüh te ashimükhong la tsünü tsinung yocho, hütsüpü arüh-e arührü chotacho.

¹⁶“Ihsanü hiri chah tu nguchinung?” Hiba pathsa thsayahiya tsü arühnü nguchichoepü Jerusalem la lirü atümungnü müdhele, ko Ihsanü hütsü mah pü müyocheh.

¹⁷Ta hiba khiyu alaa nyitsarü yola müsobhosohnung nengdang, hiko khodesü Jisu nengla sütesü müchochinung hiri nyitsarü khyang yuzeng jünung.

¹⁸Hütsüpü arühnü arüh thali dsiyoh arüh te Jisu nengla sütesü müchochinung mahkhang müdonung yuzeng jücho.

¹⁹Ta Peter e Johan nyühnü arüh te lalingcho, “Tsingrangba tenü nührü te nyinung tsü Tsingrangba bete athsalanga mahro nührübürünü tsitsa young.

²⁰Tunüo ihrübürünü tu ngucho ko yuchicho hütsü müchoko linung mükoh.”

²¹Hütsüpü ashimükhong tsünü arüh te alaa amüzah yu yopü lehcheh müthehcho. Arüh khingchinung tsü amükohnungepü arühnü müdhecho, tunüo atikehcho nengdang tsü nyitsarü atümungnü Tsingrangba nengsecho.

²²Nyitsarü süchah hiba akyangba thsayahiya nguchicho abi kang yüre chah alaa azirü thsacho.

²³Peter e Johan nyüh müthehyeng, arüh mülung yanglang thalicho ko bebü ayingti ko azibarütinü tu yocho hütsü arüh te yocho.

²⁴Khode yudsirütinü hütsü yuchicho, arüh atümungnü Tsingrangba te dangkhidangnang yocho: “Abüdongba, ning, alih, kihdi ko hütsüla liba apüm thribong!

²⁵Anbü amüsa khu nü dikehrü, ihrü jümürü Davidnü yocho: “Tuepü yangpirütinü zichürocho; tuepü nyitsarütinü amükhyu rah külüpcho?

²⁶‘Abüdongba ko abi Mesia nyüm, Limih yangthsabatinü yacho, ko yangthsarünü müjang shibülungcho.’

²⁷Ajüje, Herod e Pontius Pilat nyüh yangpirüti ko Israelrü nühnü Mesia kangsohba, amüsa nü Dikehrü Jisu nyüm hiba yangdi la shirütacho.

²⁸Nü zii ko nü lümchung la tuturü atikehnung licho, hütsü nyüm arüh shibülungcho.

²⁹Hütsüeko ade, Abüdongba, arühnü ihrü nyüm bichiba tsü dheng, ko ihrü nü dikehrütinü nü yusi müsi mülah chonung mülajüng.

³⁰Nü Amüsa Kulirü Jisu nengla amüdhethsa ko thsayahiya nguchinung mülajüng ko kyangjünung nü kheh müyungchüng.”

³¹Arüh dangkhidangnangkade, arüh pümba müdüm tsü shühchicho. Arüh atümung Anbü Amüsanü jeng müsi mülah Tsingrangba yusi sobhonung dikehcho.

³²Yudsirü mülung tsü arüh lasih khüdu thsapü licho. Sünüsü abi licho tsü apu yoepü müyocho, ta arüh atümungnü arüh licho tsü khüdunü khüdu te changtacho.

³³Zii amülah la riwürütinü Abüdongba Jisu kangchehlicho yuzi jücho, ko arüh atümung chah Tsingrangbanü amüwa khütang mükhakehjücho.

³⁴Arüh yola süsü müdsimüku mülicho. Tunüo sürü alih mahkhang kuh licho arühnü hütsüri icho,

³⁵ko aichehcho thsi tsü hiro riwürüti khyang jücho; ko thsi tsü nyitsarü müipi khyang palu thsütah aichi changtacho.

³⁶Hütsüta Josef, Cyprus la surocho Levirü khüdu süte riwürütinü Barnabas ko dsicho (adüzü “athsüchirü”),

³⁷abi luh khüdu licho, hütsü ipü thsi tsü riwürüti khyang hiwü jücho.