Read Sangtam Naga RIWÜRÜ NGUCHI 5 Bible Online

RIWÜRÜ NGUCHI 5 - Sangtam Naga bible

RIWÜRÜ NGUCHI 5

¹Ta nyitsarü khüdu anengnü Ananias, ko anitpü Safira nyühnü alih khüdu icho.

²Ta anitpü anyüh chotapü amüthsüh thsi changsho yohpüpü anyingcho tsü riwürüti khyang hirojücho.

³Peternü abi te yocho, “Ananias, amüthsüh achangsho rang yohponü Anbü Amüsa bete arahkheh chonungthsa tuepü Satan khyang nüh kihyochüsohcho?

⁴Nühnü kohro tsü mü-iede hütsü nüyo thsacho; ko hütsü ipü khanglang thsi tsü nüyo thsacho. Khang, tuepü nühnü hütsüta nguchinung dhrongchehcho? Nühnü nyitsarü te mah ta Tsingrangba bete arahkheh choko!”

⁵Ananiasnü hi yuchiyeng khülutsu sücho; ko hütsü yuchirü atümung dee drücho.

⁶Ko dhrezarütinü ro abi me müshüpü hiwü dhrürangcho.

⁷Rehtseh asango khanglang tu tikehcho mümüdhepü anitpü rocho.

⁸Peternü abükyü te tsingdhengcho, “Nü nii nühjünü kohro iba thsi apümnü hütsü du a mahro, I te young?” Abükyünü lalingcho, “Ho, apümnü hütsü due”.

⁹Hütsünü Peternü abükyü te yocho, “Abüdongba Anbü thsatsünung tuepü nühjü yube trümcho? Nü nii me dhrürangrüti trahtri te yale, ko arühnü nühsü dhitsinung!”

¹⁰Hütsüde tsünü ajing te khülutsu sücho. Dhrezarüti ro abükyü so licho ngu arühnü dhiwü anii kong müshüm dhrürangcho.

¹¹Lithro apüm ko hütsü yuchirü atümung dee drücho.

¹²Nyitsarüti yola riwürütinü thsayahiya ko anyemüyangnungti adrong nguchicho. Ko yudsirüti atümung Solomon kekhüm la müjang shibülungcho.

¹³Aparünü arüh dee senye, hiri yola müzehrü sünüsü arüh yola zehnung müsi mümülahcho.

¹⁴Ta Abüdongba chah yudsirü khingkurü adhrerü alaa alaa du amülung la tsü khikehcho.

¹⁵Riwürütinü nguchicho amüdhethsa tsü, Peter lahkhude anbükhüm dunüsü khümkisohnung nengdang füthsarüti lang la nücho chongnong ko phah la pümsohcho.

¹⁶Ko Jerusalem mükang liba yangdongti lanü füthsarü ko amünyi nbünü rangchoti norocho; ko arüh atümung kyangjücho.

¹⁷Hütsüde amichahba bebü ko ashangrüti, Sadukirü mülung la khiyohti atümungnü riwürüti dee nahmohcho; hütsünü riwürüti nyüm nguchinung arühnü dhrongchehcho.

¹⁸Arühnü riwürüti rangnü arangyoh la yohpücho.

¹⁹Ta hütsü romang Abüdongba ninglang riwürü khüdunü arangyoh trahtri khangthrujücho, ko riwürüti nücheh arüh te yocho,

²⁰“Wüng ko Amübükuh la yapü nyitsarüti te hiba akang asi nengdang young.”

²¹Riwürütinü ayocho nyi mütoh amübükuh la züducho ko donung dikehcho. Amichahba bebüba ko ashangrütinü, Jihudarü azibarüti atümung müjangnü Ashimükhong khüdu dsichocho; ko arüh bete riwürüti noronung arangyoh lang yuzeng jücho.

²²Ta khode anüchirüti ro chihcho, arühnü arangyoh la riwürüti müngucho, achotsü arühnü thali wü Ashimükhongrü te yocho.

²³“Khode ihrü arangyoh kuh chihcho, hütsü khahkhah khangtipü anyahrütinü trahtri tsü nyah licho; ta khode ihrünü trahtri tsü khangthrucho, ayonglang tsü ihrünü süsü müngucho!”

²⁴Khode bebü ayingti ko amübükuh nyahrü anüchibanü hi yuchicho, riwürüti chah tu tikehcho, ko arühnü nyemüyangcho.

²⁵Hütsüde nyitsarü khüdu ro arüh te yocho, “Nyieng! nührünü arangyoh la rangyohrüti sülü amübükuh la do yale!”

²⁶Achotsü anüchiba tsünü nüpü wü riwürüti tsü thali norocho. Nyitsarütinü arüh chah lungnü mapnung drüchonü arüh mükhingchicho.

²⁷Arühnü riwürüti tsü noro Ashimükhong bete yasohpü Amichahba Bebübanü arüh te tsingdhengnü yocho.

²⁸“Hiba nyitsarü nengla müdonung ihrünü nührü khyang yuzeng akhükhah jüko, ta dheng nührünü tu nguchicho! Nührünü Jerusalem jengsohko, ko abi sücho tsü nührünü ihrü bha kangsohnyüre!”

²⁹Peter ko aparü riwürütinü lalingcho, “Ihrünü nyitsarü tenülü Tsingrangba yocho nyibae.

³⁰Jisu, sü nührünü khala chah hamkeh süsohcho, Ihsa jümürü Tsingrangbanü abi asücho lanü kangchehli rosohko.

³¹Israelrü khyang lasih thsamüla mülang pehba jünung khyanglangnü, Tsingrangbanü abi tsalangthring langnürü ko Kangchehjüba kangsohcho.

³²Hütsüri nengdang yuzi tsü abi yocho nyirüti khyang jüba Tsingrangba jiyü Anbü Amüsa ko ihrü yuzi lile.”

³³Ashimükhongrünü hi yuchide rihlong chüro riwürüti mapsehnyücho.

³⁴Ta arüh yola Farisirü nyüh khüdu anengnü Gamaliel, sü Yuzeng dorü atümungnü jengreng jo licho, abi Ashimükhong la tsü shemüsucho. Abinü riwürüti tsü nücheh tsinung yuzeng jücho,

³⁵hütsüpü abinü ashimükhongrü te yocho, “Israel jünirüti, hiri nyitsarü chah nührünü müzah nguching.

³⁶Tunüo akhulangsü khüdupi Theudasnü ajangjangthsa amülahrü khüdu kyo chürocho, ko nyitsarü thsih müyü-o abi yola zehcho. Ta abi mapsehcho, abi mono atümung shupishuzacho, ko hütsüba mülung changpehcho.

³⁷Hütsüpü, Galilrü Judas mono khiba bekhyah la chürocho; abi yola nyitsarü khütango zehcho, ta abisü mapsehcho ko amonoti shupishuzapehcho.

³⁸Hütsüeko, hi nengdang Ihnü nührü te yonung, arüh nyüm tu tünguchi. Arüh yah pehjüng! Arüh lümchung ko nguchiba hi nyitsarü chahnü thsakhang, hütsü changpehnung,

³⁹ta hütsü Tsingrangba chahnü thsakhang, nührünü arüh mükohnung. Nührünü Tsingrangba nyüm khatacho roh-i thsanung!” Achotsü Ashimükhongnü Gamaliel yocho tsü khyücho.

⁴⁰Arühnü riwürüti tsü dsi ropü xüpcho, ko khodesü Jisu nengla müchonung yuzeng jüpü müthehcho.

⁴¹Riwürüti Ashimükhong lanü künyangseh tsicho, tunüo Jisu khyanglangnü chongchanung tsü Tsingrangbanü arüh dekheng khichicho.

⁴²Ko nyümong mükhu amübükuh la ko ajünirü kuhla Jisu Mesia nengdang yuse atsa tsü donü thsingyucho.