Read Sangtam Naga RIWÜRÜ NGUCHI 6 Bible Online

RIWÜRÜ NGUCHI 6 - Sangtam Naga bible

RIWÜRÜ NGUCHI 6

¹Tunyah mülipü mono alaa zikehde, Greek yu chorü Jihudarü ko Jihudarü khung kahla yubejarong chürocho. Nyümong mükhu tsuyongnung changtade chomirüti müjehrepü Greek yu chorü Jihudarünü mükünyangcho.

²Achotsü riwürü dhüre-anyüh tsünü yudsirü mülungshünü müjang dsibülungpü yocho, “Tsuyongba müshonung khyanglangnü Tsingrangba yu thsingyuba layünung athsalang mah.

³Hütsüeko jünirüti, nührü yola aneng atsa lirü, Anbü Amüsa ko lümlongnü jeng lirü nyüh dhünyeh throchehng, ko nguchi hi arüh khyang nyümkehjünung.

⁴Ko ihrünü ihrü bekhyah apüm dangkhidangnang ko thsingyuba nguchi la pehnung.”

⁵Amülungshünü riwürütinü lümcho la tsü künyangcho, achotsü arühnü Stefan, Anbü Amüsa ko yudsinü jeng liba Filip, Prokorus, Nikanor, Timon, Parmenas ko Antiok lanü yangpirü khüdu Nikolas, sü akhulang Juda yangthsa la ximülacho arüh tsü throchehcho.

⁶Arüh tsü amülungnü riwürüti bete norocho, ko arühnü arüh chah kheh nyümkeh dangkhidangnangjücho.

⁷Hütsüta Tsingrangba yu mütozah shucho. Jerusalem la mono alaa alaa zikehcho, ko bebürüti adrongnü yudsi tsü khyüchocho.

⁸Stefan, Tsingrangbanü khütang müwajüba nyitsarü khüdu, ziinü jeng nyitsarüti yola thsayahiya ko anyemüyangnung adrong nguchicho.

⁹Ta alihchehcho Cyrene ko Alexandria lanü Jihudarü zeh Sinagog khiyoh la zehrü khürünü abi nyümcho. Arüh Cilicia ko Asia lanü aparü Jihudarünü Stefan te yujitamüsucho.

¹⁰Ta Stefan Anbü ko lümlongnü jeng chode, arühnü abi mülengchehcho.

¹¹Achotsü arühnü khürü pohsa jüpü hita yosohcho, “Abinü Mosa ko Tsingrangba nyüm chocho ihrünü yuchiko!”

¹²Hütsüta arühnü nyitsarüti, azibarüti, yuzeng dorüti ruhmüsucho. Arühnü Stefan rang ashimükhong bete nowücho.

¹³Hütsüde abi nyüm arahkheh chonung nyitsarü khürü norocho ko arühnü yocho, “Hivinü lede Ihsa amübükuh ko Mosa yuzeng nyüm chore.

¹⁴Hiba Nazaret-rü Jisunü amübükuh hi thsangnyangjünung ko Mosanü ihrü khyang jücho yangthsa mülichijünungepü abinü chocho ihrünü yuchiko!”

¹⁵Ashimükhong la pümrü atümungnü Stefan chah dhenglah dhengde, aromih ninglang riwürü khüdu kyo arühnü ngucho.