Read Sangtam Naga RIWÜRÜ NGUCHI 7 Bible Online

RIWÜRÜ NGUCHI 7 - Sangtam Naga bible

RIWÜRÜ NGUCHI 7

¹Amungthriba bebübanü Stefan te tsingdhengcho, “Hütsü yuje mah-o?”

²Stefan-nü lalingcho, “Jünirüti ko tpurüti, hi nyidheng! Ihsa jümürü Abraham Haran la linung müwüede, ahechi Tsingrangnü Mesopotamia la abi te shiro yocho,

³‘Nü tsutpu ko nü limih pehjüng ko Ihnü nü te ngusohnung limih lang tsü wüng’.

⁴Achotsü abinü abi limih pehjüpü Haran la linung wücho. Abraham au süpü khanglang, nührü ade liyaba limih hi yang Tsingrangbanü abi norocho.

⁵Hütsütade Tsingrangbanü Abraham khyang apu yo thsanung tusü müjü, alih dsiosü müjü, ta Tsingrangbanü hütsü abi khyang jünung nyengchocho, ko hütsü abi ko abi chahnü trahchocho yo kangnung. Tsingrangbanü hütsü nyengchode, Abraham atsurü müliecho.

⁶Tsingrangbanü abi te yoba tsü hi: ‘Nü chahnü trahchochoti shirü lih la kang thsih müyü ayurü kang khingchi linung.

⁷Ta arühnü dikehba nyitsarüti michah Ihnü yukhanung; ko akhanglang hütsüba lih lanü chüronung ko hiba lih la Ih mübünung.’

⁸Hütsüpü Tsingrangbanü azengchota amüdhethsa Abraham khyang amüjüp-pehba jücho. Hütsünü Isak suropü nyükhih-o lipü Abrahamnü müjüp-pehjücho; hütsüde Isaknü atsudhre Jakob ko Jakobnü atsurü dhüre-anyüh, Ihsa hung adangchi jümürüti müjüp-pehcho.

⁹“Jakob tsurütinü arüh nirü Josef nahmohcho ko Ijip la ayurü thsasohnung icho. Ta Tsingrangba abi te zehcho

¹⁰ko abi chongcha apüm lanü khümchocho. Ijip Yangthsaba bete yade, Tsingrangbanü abi khyang saying atsa ko lümlong jücho, ko Yangthsabanü abi yanglih ko Yangthsaba kukhi apüm michah governor kangsohcho.

¹¹Hütsüde Ijip ko Kanan apümlang yangkongthsükong thsamütsa amülah mütohcho. Ko Ihsa jümürüti tsuyongnung tusü müngucho.

¹²Ko khode Jakobnü Ijip la fürü lilepü yuchicho, abinü atsurüti, Ihsa jümürüti hütsülang akhudiba müthehcho.

¹³Anyüpi wüdelü Josefnü amungrü te abi mishacho, ko Ijip Yangthsabanü Josef tsutpu müdhe kangcho.

¹⁴Hütsüde Josefnü au Jakob te abi ko tsutpurü atümung nyührepü münga, tingnü Ijip lang ronung yuva müthehcho.

¹⁵Achotsü Jakobnü Ijip lang jowücho, ko hütsüla abi ko atsurüti li sücho.

¹⁶ko arüh me tsü Shekem lang hiwünü, Abrahamnü Hamor hung te lihcho kong la tsü dhrürangcho.

¹⁷“Tsingrangbanü Abraham te nyengchocho tikehnung becho chii rode, Ijip la Ihsa nyitsarüti mono khütang zikehpü licho.

¹⁸Achangka la, Josef mümüdheba yangthsarü khüdunü Ijip la yangthsanung dikehcho.

¹⁹Abinü Ihsa jümürüti te thsacho ko mütsa bichicho, ko süsohnung nengdang akhungarüti dongkhu pehnung khingcho.

²⁰Hiba shikhe la tsah atsa akhunga khüdu, Mosa surocho. Abi choo asang kuhla xükümcho,

²¹ko khode abi dongkhu pehcho, Yangthsaba tsulatpünü abi hiro abükyü tsurü kang kangchehcho.

²²Ko Ijiprü lümlong apüm Mosa te docho ko abi yu la ko nguchi la dee akoh kangcho.

²³“Abi kang yüre pide, apu nyitsarü Israelrü khüta lirü abinü xodhengnung dhrongchehcho.

²⁴Arüh yola nyüh khüdu Ijiprü khüdunü khingchi ngu abinü wü Ijipba tsü mapsehnü rühyangjücho.

²⁵(Abi nyitsarünü arüh lehchehnung shulüm Tsingrangbanü abi bichirepü arühnü nyichehnungepü lümcho, ta arühnü hütsü münyicheh).

²⁶Nyümong khüu Israelrü nyüh anyüh yübüta abinü ngucho, ko abinü arüh müdronyo yocho, ‘Nyieng, nührü ajünirüe; tuepü maptaro?’

²⁷Ta amütsa nguchiba tsünü Mosa nyümyohchüpeh yocho, ‘Sünü nüh ihrü michah yangthsarü ko yukharü kangsohcho?’

²⁸‘Atü Ijiprü khüdu mapsehcho kyo Ihsü mapsehnyürü mah-o?’

²⁹Mosanü hi yuchinü Ijip lanü tsicho, ko Media lih la licho. Hütsüla abi tsuzarü anyüh thsa licho.

³⁰“Kang yüre tsipü khanglang, Sinai zong münyeh lipilih la singtrung khüdu la mihmüle la riwürü khüdu Mosa yanglang chürocho.

³¹Hütsü ngude Mosanü nyemüyangnü, ta tsitsanung singtrung amünyethsa wücho. Ta abinü Abüdongba yuva yuchicho:

³²‘Ih nü jümürüti Tsingrang, Abraham, Isak ko Jakob Tsingrang.’ Adrüchonü Mosa dhridhricho ko müdhengkehcho.

³³Abüdongbanü abi te yocho, ‘Nü jingkhüm khyüchehng, tunüo nüh yaba müdüm tsü amüsa lile.

³⁴Ijip la I nyitsarüti chongchacho Ihnü nguko. Arüh rükhirüyocho Ihnü yuchiko, ko arüh lehchehnung Ih jürocho. Ade rung; Ihnü nüh Ijip lang müthehnung.’

³⁵“Mosa tsü Israelrünü mükhyüchoba tsü lile. Arühnü yocho, ‘Sünü nüh ihrü michah yangthsarü ko yukharü kangsohcho?’ Abi tsü anyitsarü michah thsanung ko singtrung la mishaba riwürü atroba khu arüh lehcheh müthehnung Tsingrangbanü müthehbong tsü licho.

³⁶Abinü Ijip lanü anyitsarü nüchehcho; ko lipilih la kang yüre Ijip la ko amoh kihdi la thsayahiya ko anyemüyangnungti nguchicho.

³⁷Israelrüti, ‘Tsingrangbanü müthehcho kyo nührü yang azikehrü khüdu müthehnung, ko abi tsü nührübürü nyitsarü thsanungpü yoba tsü Mosa licho.’

³⁸Lipilih la Israelrü ashimükhong la zehba tsü abi lile; abi Ihsa jümürüti ko Sinai zong chah chotaba te hütsüla licho, ko Ihsa te chomüchinung Tsingrangba akang yusi abinü khyüchocho.

³⁹“Ta Ihsa jümürütinü abi yocho münyicho; arühnü abi mükhiyohcho, ko arühnü Ijip lang thali wünyücho.

⁴⁰Hütsünü arühnü Aron te yocho, ‘Ihsa nünung nengdang Ihsanü tsingrang khürü külüpnung. Mosa, sünü ihrü Ijip lih lanü norocho, abi tu kangchonang ihrünü mümüdhe.’

⁴¹Hütsüpü arühnü kyothri khüdu misüpung kyo külüpcho, ko hütsü khyang kangmüpü jo, arühnü külüpba khyang jengreng jo thsüti licho.

⁴²Hütsünü Tsingrangba arüh tenü ximülacho ko arüh khyang ning chah chenghiti mübünung pehjücho. Azikehrüti vakha la thrah lile: ‘Israelrüti! lipilih la nührünü kang yüre kanglungrü mapseh kangmüpü jüba tsü I khyang mah.

⁴³Nührünü dhiba tsü Molek tsingrang shükuh, ko chenghi tsingrang, Refan kyothri; Nührünü mübünung külüpba tsü kyothri licho. Hütsüeko Ihnü nührü Babylon khu yangtsirü kangsohnung.’

⁴⁴“Ihsa jümürütinü lipilih la Tsingrangba zehba shükuh arüh te hicho. Hütsü Mosa te ngusohcho tsah kyonü, ko Tsingrangbanü abi te külüpnung yocho aichi külüpcho.

⁴⁵Akhanglang, Ihsa jümürütinü arüh tpurüti kheh lanü shükuh tsü khyüchocho ko Joshua yola wüde arühnü hütsü arüh te dhicho ko arüh wüde Tsingrangbanü iipehjo, arühnü yuchoti kheh lanü alih tsü khyücho. Ko David shikhe chii hütsü yohpücho.

⁴⁶Davidnü Tsingrangba achomang ngunü, Jakob Tsingrang nengdang kuh khüdu thsajünung tsingdhengcho.

⁴⁷Ta Solomon-nü du abi khyang kuh khüdu thsajücho.

⁴⁸“Ta Amichahba Tsingrang tsü nyitsarü khehnü thsacho kuhla mülire; azikehrünü yocho roh-i:

⁴⁹“ ‘Ning I pümji ko alimih I jing jükehji. Abüdongbanü yore. Nühnü I khyang khütari kuh thsajünung? I linung müdüm khüde liro?

⁵⁰Hiri apüm Ihnü mükülüpcho do?’

⁵¹“Nührü hongzirüti! lasih ko nangkhi mükehrüti, nührünü lede Anbü Amüsa nyümre. Nührü jümürüti kyo bichire!

⁵²Azikehrü yola nührü jümürütinü müdhsümthsecho sü liro? Papade Tsingrangba Yusi hirüti sürünü amüsaba dikehrü khüdu ronung choyohcho arüh mapsehcho. Ko ade nührünü abi kihyochüko ko mapsehko.

⁵³Ninglang riwürütinü jüba Tsingrangba yuzeng khyüchorüti tsü nührü, ta nührünü hütsü mübichire!”

⁵⁴Ashimükhongrünü Stefan yu yuchide, abi nyüm arüh rihlong chüro ha mütrehkehcho.

⁵⁵Ta Stefan, Anbü Amüsanü jengnü, ninglang dhengkehde Tsingrangba ahechi ko Tsingrangba tsalangthring Jisu yanü ngucho.

⁵⁶Abinü yocho, “Dheng! ning khangthrunü Tsingrangba tsalangthring Nyitsarü Tsurü yanü Ihnü ngure!”

⁵⁷Ashimükhongrünü züdenü arüh khehnü arüh nangkhi thsitipü abi yangro thsutinü,

⁵⁸yangdi lanü tphahcheh nowü lungnü kengsehcho. Ko dhrezarü khüdu anengnü Saul bete yuzi thsarütinü arüh shü yohpüjücho.

⁵⁹Arühnü Stefan chah müzah lungnü kengde abinü Abüdongba te dsi yocho, “Abüdongba Jisu, I nbü khyüchoung!”

⁶⁰Abinü mükhukehnü yuva amülahnü yocho, “Abüdongba! Amünyi hi arüh chah tükhang!” Abinü hi yopü sücho. Abi mapsehba tsü Saulnü yuzi jücho.