Read Sangtam Naga RIWÜRÜ NGUCHI 8 Bible Online

RIWÜRÜ NGUCHI 8 - Sangtam Naga bible

RIWÜRÜ NGUCHI 8

¹Hütsü nyümong lanü Jerusalem la Lithro nyüm dhsümthse arangcheh dikehcho. Riwürüti chah khu, yudsirü atümung Judea ko Samaria lih apümlang shupishuzacho.

²Yangthsa la thurü nyitsarütinü Stefan dhrürangnü abi nengdang dee me tracho.

³Ta Saulnü kuh müipi züdunü, yudsirüti adhrerü ko khingkurü tphahbülungnü, arangyoh la yohpo ko Lithro tsü thsangnyangjünung müküpcho.

⁴Shupishuza liba yudsirüti tsünü apümlang yusi tsü thsingyucho.

⁵Filipnü Samaria yangdi long la wünü Mesia nengdang hütsüla lirü te thsingyucho.

⁶Filipnü chocho yu ko abinü nguchicho thsayahiya ngude, arühnü abi yu müsijo nyicho.

⁷Nyitsarü adrong chahnü amünyi nbü khong chürocho, ko dsidsisürü ko jingjahrü adrong kyangcho.

⁸Hütsünü yangdi la tsü akünyang amülah licho.

⁹Hütsüla nyüh khüdu anengnü Simon licho, abinü apu among zii khunü khüpipi Samariarü nyemüyangsohcho. Abinü apu jangjangthsa amülah-epü lümcho,

¹⁰ko yangdi la lirü atümungnü abi te nyicho. Arühnü yocho, “Zii amülah ko dsiba Tsingrangba zii nyitsarü tsü hi lile.”

¹¹Arühnü abi te nyicho, tunüo müngulangnü abinü apu among ziinü arüh nyemüyangsohcho.

¹²Ta Filipnü Tsingrangba yanglih ko Jisu Khrista nengdang yuse atsa thsingyucho arühnü yudside, arüh adhrerü ko khingkurü atümung bapticho.

¹³Ko Simon nüsü yudsicho; ko baptipü khanglang abinü Filip shündhün licho, ko anyemüyangnung ko thsayahiya nguchicho ngude abinü nyemüyangcho.

¹⁴Jerusalem la riwürütinü Samariarünü Tsingrangba yu khyüchokopü yuchinü, arüh yanglang Peter e Johan nyüh müthehcho.

¹⁵Khode arüh ro chihcho, yudsirütinü Anbü Amüsa khyüchochehnung nengdang arühnü dangkhidangnangjücho.

¹⁶Tunüo arüh sü chahsü Anbü Amüsa ade yingcheh müjüroepü licho; arüh Abüdongba Jisu nengla bapti dupü licho.

¹⁷Hütsüde Peter e Johan nyühnü arüh chah khehnü nyümkehjücho, ko arühnü Anbü Amüsa khyüchocho.

¹⁸Riwürütinü arüh chah arüh khehnü nyümkehde yudsirüti chah Anbü jücho Simon-nü ngucho. Hütsünü abinü Peter e Johan nyüh khyang thsi jonü yocho,

¹⁹“Sü chah Ihnü I khehnü nyümkehnang abinü Anbü Amüsa khyüchochehnungthsa, hiba zii hi I khyangsü jüng.”

²⁰Ta Peternü abi te lalingcho, “Tsingrangba jiyü thsinü lihnung kohnungepü lümcho ngang, nüpu ko nü thsi mümehmi lang wüng!

²¹Ihrü nguchi la nüh nohlüm tu müle, tunüo Tsingrangba bete nü lasih mümüchong.

²²Hütsüeko hiba amünyi lümchung lanü lasih thsamülang, ko hiroh-i lümba nengdang mülang pehjüngpü Abüdongba te dangkhidangnang.”

²³Tunüo nüh amünyi yurü ko nahmohnü jeng licho Ihnü ngure.

²⁴Simon-nü Peter e Johan nyüh te yocho, “Nührünü choba khüdu dusü I chah mütikehnungthsa, I nengdang Abüdongba te dangkhidangnangjüng.”

²⁵Arühnü akang yuzi jonü Abüdongba yusi sobhopü khanglang, Peter e Johan nyüh Jerusalem lang thalicho. Arüh langla Samaria yangdong adrong la arühnü yuse atsa thsingyucho.

²⁶Abüdongba ninglang riwürü khüdunü Filip te yocho, “Rungnüm ko Jerusalem lanü Gaza jowüba kihjing lahpi lang la tsü wüng.” (Hiba lang tsü adelü mürachire)

²⁷Achotsü Filipnü rungnümpü shemüsucho. Ade Ethiopiarü axangmicho khüdu, sü Ethiopia yangthsalatpü kuthsi michah khehthsithsarü adirü khüdu licho, abi wülungchi yacho.

²⁸Abi Jerusalem lang Tsingrangba mübünung wücho ko abi kari la kuh lang thali yacho. Abi tsiyade, abinü azikehrü Isaya vakha lanü khichi yacho.

²⁹Anbü Amüsanü Filip te yocho, “Akhülusing shündhün wüng.”

³⁰Filipnü shang wücho ko azikehrü Isaya vakha lanü khi yacho yuchi abi te tsingdhengcho, “Nühnü tu khiro hütsü nyichehrü do?”

³¹Adibongnü lalingcho, “Khürünü I te changnah müyokhang, Ihnü khüta nyichehnung?” Ko Filip te abinü küro abi yola pümnung kihchicho.

³²Abinü khichi yaba amüsa yu tsü hi thsacho: “Amapsehnung nowüba San khüdu kyo, Sanza anbüh müjüpde yuva müchürocho kyo, abinü yu tpah-o dusü müyo.

³³Abi nyüpmüsehcho, abi yuje tsü thsonglicho. Abi trahchocho nengdang sünüsü müyochehnung, Tunüo abi akang limih lanü hitsiko.”

³⁴Adibong tsünü Filip te tsingdhengcho, “Azikehrü tsünü hi sü nengdang yoro I te young. Apu nengdang a mahkhang aparü khüdu nengdang-o?”

³⁵Hütsüde Filipnü hiba amüsa yu lanü dikeh abi te Jisu Khrista nengdang yusi atsa tsü yonung dikehcho.

³⁶Anyüh jowü yade, kih azikyah licho müdüm khüdu chii rocho, ko adibong tsünü yocho, “Hila kih lile. Ih mübaptichehnungthsa tunü yatinung?”

³⁷(Filipnü yocho, “Nü lasih apümnü yudsikhang, nüh baptinung kohle.” Abinü lalingcho, “Jisu Khrista tsü Tsingrangba Tsurüepü Ihnü yudsire.”)

³⁸Adibongnü akhülusing tsü nyehlinung yuzeng jücho, ko Filip anyüding kih la tsü züducho, ko Filipnü abi baptijücho.

³⁹Khode anyüh kih la tsünü chürocho, Abüdongba Nbünü Filip no tsipehcho. Adibong tsünü abi thali müngupehcho, ta akünyangnü jeng mütozah alang la wücho.

⁴⁰Filip apu Azodas la abi li ngucho; abi Kaesarea lang wücho, ko lang la abinü yangdongti atümung la Yuse Atsa thsingyucho.