Read Sangtam Naga RIWÜRÜ NGUCHI 9 Bible Online

RIWÜRÜ NGUCHI 9 - Sangtam Naga bible

RIWÜRÜ NGUCHI 9

¹Ade yingcheh Saulnü mütozah Abüdongba monoti nyümnü mapsehcho. Abüdongba Lang la lirü khürü shirükhang

²arüh adhrerü nye khingkurü nye abinü rangpü Jerusalem lang noronung shulüm, Amungthri Bebüba yang wünü Damaskas la Sinagogti yangnü vathrah chingcho.

³Saul Damaskas chinyü rode, dhrongyengnü ninglangnü atsingse khüdu abi chah tehkehcho.

⁴Abi alih la longchocho ko abi te yuva khüdunü yo yuchicho, “Saul, Saul! tuepü nühnü Ih dhsümthsero?”

⁵Abinü tsingdhengcho, “Abüdongba, nüh süo?” Ko yuva tsünü lalingcho, “Nühnü dhsümthsebong Jisu Ih.”

⁶“Ta yamüsung ko yangdi la tsü züdung, ko nühnü tu nguchinung athsalang hütsü nü te yonung.”

⁷Saul te müjang shitsehrüti yuva khüdusü müchüro nyehlicho; tunüo arühnü yuva tsü yuchicho ta süsü müngucho.

⁸Saulnü alih lanü shemüsu anah trahdhengde, abinü tusü müngucho. Achotsü arühnü akhehnü shüripü Damaskas lang norocho.

⁹Nyümong asang abinü ngunung mükohcho, ko hütsü shikhe abinü tusü mütsumüyongcho.

¹⁰Damaskas la khristan khüdu anengnü Ananias licho. Abinü müngucheh khüdu ngu Abüdongbanü abi te yocho, “Ananias!” Abinü lalingcho, “Abüdongba Ih hila lile.”

¹¹Abüdongbanü abi te yocho, “Rungnüm ko Amüchong Lang la tsü wüng, ko Judas kuhla Tarsusrü khüdu anengnü Saul tsingdheng. Abi dangkhidangnang yale.

¹²Abinü ngulinungthsa nyüh khüdu anengnü Ananias ronü abi chah akhehnü nyümkehcho münguchehcho.”

¹³Ananiasnü lalingcho, “Abüdongba, hiba nyitsarü ko abinü Jerusalem la amüsarüti chah amütsa khüta bichicho hiri nengdang nyitsarü adrongnü I te yoko.

¹⁴Ko nüh mübürüti atümung rangnung nengdang bebü ayingti chahnü tase bipü Damaskas la ro lile.”

¹⁵Abüdongbanü abi te yocho, “Wüng, tunüo yangpirüti, yangthsarüti ko Israelrü te I neng müdhesoh Ih dikehsohnung Ihnü abi throchehko.

¹⁶Ko I nengdang abi khüta chongchanung Ipunü abi te ngusohnung.”

¹⁷Achotsü Ananiasnü Saul pümba kuhla tsü züducho, ko abi chah akhehnü nyümkehcho. Abinü yocho, “Jünirü Saul,” nüh hilang rode lang la Abüdongba Jisu, sü nü bete chürocho, abinü nü nah trahsohnung ko Anbü Amüsanü jengsohnung nengdang Ih müthehcho.

¹⁸Hütsüde tsünü anahtse lanü nguh laküp kyo longcho, ko abinü thali ngunung kohcho. Ko shemüsu abi bapticho;

¹⁹Abinü tsuyongcho, ko rezeh kangcho. Saulnü Damaskas la yudsirüti te nyümong azachah licho.

²⁰Abinü müchungkhüti Sinagog lang wüpü Jisu tsü Tsingrangba Tsurüepü thsingyunung dikehcho.

²¹Abi yu yuchirü atümungnü nyemüyangnü tsingdhengcho, “Hivi hi Jerusalem la Jisu chah yudsirüti mapsehbongsü mahrü do? Ko abi hila nyitsarüti rangnü bebü ayingti yang hiwünung rocho mahrü do?”

²²Ta Saulnü thsingyuba tsü alaa du zinü kangcho ko Jisu tsü Mesia epü hohnungthsa abinü yuzi jüchonü Damaskas la liba Jihudarünü mülengchehcho.

²³Nyümong adrong khupü, Jihudarünü müjang shibülungnü Saul mapsehnung arah külüpcho,

²⁴ta abi te arüh rah tsü yopehcho. Abi mapsehnung nengdang ama atsingse arühnü yangdi tbükhümti nyahcho.

²⁵Ta romang khüdu Saul monotinü abi nowü loh lanü tbü khu abi dhichahchücho.

²⁶Saulnü Jerusalem lang wücho ko monoti yola zehnung müküpcho. Ta abi mono khüdue pü arühnü müyudsipü arüh atümungnü abi drücho.

²⁷Hütsüde abi tronung Barnabas rocho ko abinü riwürüti yanglang abi nowücho. Ko Saulnü lang la khüta Abüdongba ngucho ko Abüdongbanü abi te chotacho hütsü abinü arüh te changnah yocho. Adesü Damaskas la Saulnü khüta rezeh Jisu nengla thsingyucho hütsüsü arüh te yocho.

²⁸Hütsüta Saul arüh yola licho ko Abüdongba nengla Jerusalem apümlang rezeh thsingyu rachicho.

²⁹Abinü Greek yu chorü Jihudarü tesü yu rehtacho, ta arühnü abi mapsehnung müküpcho.

³⁰Khode yudsirütinü hi rangchehcho, arühnü Saul Kaesarea lang nowünü Tarsus lang tsisohcho.

³¹Hütsünü Judea, Galil ko Samaria apüm la Lithro tsü atbachi shikhe khüdu thsacho. Abüdongba jengreng dro linü Anbü Amüsa atroba khu hütsü rezehchi shikhyah la zikehcho.

³²Peternü apümlang rachicho, ko shikhe khüdu abinü Lyda lang Tsingrangba nyitsarüti xodhengnung wücho.

³³Hütsüla dsidsisünü thsa kang keh chongnong lanü müsurochehcho nyüh khüdu anengnü Aeneas abinü shirücho.

³⁴Peternü abi te yocho, “Aeneas, Jisu Khristanü nüh kyangjüre, shemüsung ko nü yüpji lohng.” Hütsüdenü Aeneas shemüsucho.

³⁵Lyda ko Sharon la lirüti atümungnü abi ngu Abüdongba yang ximülacho.

³⁶Joppa la yudsilarü khüdu anengnü Tabitha licho. (Greek yu la abükyü neng Dorkas, adüzü “Shümüshü”.) Abükyünü akang ayung nguchi atsa nguchi ko ailümrü tro licho.

³⁷Hütsütade abükyü füthsa sopehcho. Me tsü mütsahjüpü amungthri chongsah la yohpücho.

³⁸Joppa tsü Lyda lanü ashu mah, ko khode yudsirütinü Peter Lydda la lilepü yuchicho, arühnü abi yang yusi tsü hipü nyüh anyüh müthehcho, “Yanglilüm ihrü yanglang zah rung.”

³⁹Achotsü Peternü shemüsu arüh yola wücho. khode abi ro chihcho, amungthri chongsah lang abi no küducho. Hütsüla chomilarüti atümungnü abi mükang tsübülung, Dorkasnü abükyü akang lide arüh khyang xüjücho fükhümti apüm abi te ngusohcho.

⁴⁰Peternü arüh atümung dongkhu chüdusohpü mükhukeh dangkhidangnangcho; ko abinü me lang tsü ximüla yocho, “Tabitha, shemüsung!” Abükyünü nah trahcho, ko Peter ngunü shemüsu pümcho.

⁴¹Peternü abi kheh jo abükyü tphahmüsucho. Hütsünü abinü yudsirü atümung, chomilarüti zeh dsinü arüh khyang abükyü akang kanglisohpü jücho.

⁴²Hiba yusi tsü Joppa apümlang sobhocho, ko adrongnü Abüdongba chah yudsicho.

⁴³Ko Peter Joppa la nyümong adrong shuküp külüprü Simon yola licho.