Read Sangtam Naga ROMRÜ 1 Bible Online

ROMRÜ 1 - Sangtam Naga bible

ROMRÜ 1

¹Paul, Jisu Khrista dikehrü khüdu ko Tsingrangbanü abi Yuse Atsa thsingyusohnung throcheh dsiba riwürü chahnü.

²Amüsa yula thrah licho kyo, Yuse Atsa tsü Tsingrangbanü azikehrüti khu papadenü nyengchocho lile.

³Hütsü atsudhre, Ihsa Abüdongba Jisu Khrista nengdang: shutsa lahpi, abi David chahnü trahchocho;

⁴amüsa lahpi, abi asücho lanü kanglisohcho khu Tsingrangba Tsurü thsanung zii amülah ngusohcho.

⁵Abi khu Tsingrangbanü yuchoti atümung yudsisohnung ko yocho nyisohnung, Khrista khyanglangnü Ih riwürü khüdu kangnung yanglih jücho.

⁶Jisu Khrista yo thsanung Tsingrangbanü dsirü yola tsü nührü Rom la lirüsü zehle.

⁷Hütsüta Tsingrangbanü müiba ko apu nyitsarü thsanung Rom la lirü nührü atümung yang Ihnü thrahre. Ihsa Au Tsingrangba ko Abüdongba Jisu Khrista chahnü nührü yanglang achomang ko atbachi thsaang.

⁸Akhudi, nührü atümung shulüm Jisu Khrista la Ihnü I Tsingrang nengsere, tunüo nührü yudsi lihküpnü yuchile.

⁹Ihnü yoba tsü yuje, ko hütsü Tsingrangba tsurü, sü nengdang Ihnü I lasih apümnü Yuse Atsa thsingyuro, abi I yuzi lile.

¹⁰I dangkhidangnang müipi Tsingrangba lümcho la zahnü nührü xodhengchehnungthsa lang khangthrujüngpü kihchiba Tsingrangbanü müdhele.

¹¹Anbü amüwa nührü te changtanung, ko nührü re zehsohnung shulüm, Ihnü nührü khütang shirünyüre.

¹²Ihnü lümba tsü, Ihsa apüm yudsi khu khüdunü khüdu trotanyüre.

¹³Jünirüti, Ihnü adrongpi nührü xodhengnung lümcho, ta lede ayatiba lango lichoepü hütsü nührü khyang müdhesohnyüre. Yangpirü yola roh-i nührü yola nüsü khürülü lasih thsamülasohnyüre.

¹⁴Tunüo Greekrü ko ashüh nyitsarü, asithsarü ko amümüdherü atümung te Ih thsite teerü lile.

¹⁵Hütsünü, nührü Rom la lirü tesü Ihnü Yuse Atsa tsü thsingyunung longphire.

¹⁶Tunüo Yuse Atsa nengdang Ihnü müshahre; yudsirü atümung, akhu Jihudarü ko yangpirü mii khümchonung nengdang, hiba hi Tsingrangba zii lile.

¹⁷Tunüo, hütsüla Tsingrangba amüsaba tsü yudsi nengdang yudsi khu mishajüre: Amüsa yunü yocho kyo, “Yudsi khu amüsarü akang linung.”

¹⁸Amünyi apüm ko nyitsarüti münyi khüinü yuje tsü yatiro, hütsü nyüm Tsingrangba rihlong chüroba misha lile.

¹⁹Tsingrangbanü arüh khingchire, tunüo arühnü Tsingrangba müdhenung tsü mülakhüti lile. Tsingrangba apunü hütsüta müdhesohcho.

²⁰Tsingrangbanü limih thridenü nahnü münguba abi saying, müchangkaba abi zii ko abi amüsa ayah anyüding tsitsa ngusohko; hütsü Tsingrangbanü külüpcho kohroti khu ngure. Hütsünü arüh mülang pehba müle!

²¹Arühnü Tsingrangba müdhepü abi dhichinung mahkhang abi nengsenung athsalang münguchire. Arüh lümlong amükhyu kangpehko, ko thoh adeng tsü amarürahnü jengko.

²²Arühnü arühbürü tsü asithsaepü yore, ta arüh amüsithsa;

²³arühnü amüsüba Tsingrang müli, asüba nyitsarü, uza, kanglungrü mahkhang chitsiba kanglungrü kyoba kyothri mübüre.

²⁴Hütsünü Tsingrangbanü hütsütari nyitsarü khyang arühnü mükhyahba amünyi nguchinung jopehko, ko arühnü khüdunü khüdu te ashahnung nguchire.

²⁵Arühnü Tsingrangba yuje tsü arahkheh te mülitare; ko akülüpbong müli athricho dikehre ko mübüre; ta Tsingrangba du müchangkapü seing! Amen.

²⁶Hütsü ngang, Tsingrangbanü arüh mükhyahmürahba khyang jopehko. Khingkurünü mii ayah pehjüpü ayahnü mümülacho nguchire.

²⁷Hütsü kyo adhrerünü khingkurü te ayah mükhongba pehjüpü arühbürü mükhyahtare. Adhrerünü adhrerü te ashahnung nguchi arühbürü michah arüh thsamehcho ngang akhingchi tsü hirore.

²⁸Arüh lasih la Tsingrangba yuje lümlong tsü müyohpüchonü, abinü arüh athsangnyang lümlong khyang khakhuchüjücho; hütsünü amünguchiba arühnü nguchire.

²⁹Arüh amütsa langkhüru, amünyi, müxümüngu, dhsachoba, nahmoh, mapsehba, yübüta, khürahba ko dhsatabanü jeng lile.

³⁰Arühnü mütsa rang chojütare; arüh Tsingrangbanü thrünyinungthsa, athsükha, amüthseh, ko tüzümükhüm; arühnü amütsa nguchinung du lümre, ko tpurü yocho münyire;

³¹amüsithsa, yudsi müliba, müsi müzeh ko yanglilüm mülire.

³²Hiri kyorüti asünung alengepü Tsingrangba yuzengnü yocho arühnü müdhele. Arühbürü dunü nguchirü mah, ta hütsü kyo nguchirü tesü lümkhatare.