Read Sangtam Naga ROMRÜ 11 Bible Online

ROMRÜ 11 - Sangtam Naga bible

ROMRÜ 11

¹Akhang: Tsingrangbanü apu nyitsarüti mükhyüchocho do? Khodesü mah! Ihsü Abraham chahnü trahchocho, Benjamin tsutpu lanü Israelrü khüdu lile.

²Tsingrangbanü adikeh lanü throchehcho apu nyitsarüti mükhyüchopü müle. Israelrü nyümnü Elijanü Tsingrangba te kihchiba la tsü amüsa yunü tu yoro nührünü müdhele.

³“Abüdongba, arühnü azikehrüti mapsehcho ko nü bholu lohnahjücho; ko Ih du nying lile, ko arühnü Ihsü mapsehnung müküpre.”

⁴Tsingrangbanü abi te tu lalingcho? “Baal arahkheh tsingrang mümübürü nyüh hajar dhünyeh Ihnü Ipu nengdang yohpüle.”

⁵Hütsü kyo ade: Tsingrangba achomangnü throchehcho amütrüh azikyah lile.

⁶Hütsü arüh nguchi aichi mah, ta abi achomangnü throchoba lile. Tunüo abinü nguchi aichi throrelang, abi achomang tsü yuje achomang mah.

⁷Akhanglü tu? Israelrünü arühnü yangchiba tsü müngu. Hütsü Tsingrangbanü throchehrü mülung azikyah dunü ngucho; anyingcho tsü Tsingrangba dsicho müyuchipehcho.

⁸Amüsa yunü yocho kyo, “Tsingrangbanü arüh thoh ko lasih alü kangsohcho; chünye yingcheh arühnü ngunung mahkhang yuchinung mükohre.”

⁹Ko Davidnü yore: “Arüh thsüti uzathsa la arüh xohsohng; arüh khülusohng, arüh khingchisohng!

¹⁰Arühnü müngunungthsa arüh nah tohsohng; ko chongcha la lede lisohng.”

¹¹Akhang: Jihudarü müthikehde, arüh athsangnyang la khülucho do? Khodesü mah! Tunüo arühnü münyi shitpahchonü, Jihudarü khyang mükhyahsohnung akangcheh tsü Yangpirü yang rocho.

¹²Jihudarü münyi tsünü limih khyang amüwa khütang hirojücho, ko arüh anbü la iilümba tsünü Yangpirüti khyang amüwa khütang hirojücho. Akhanglü, Jihudarü wohchi zehde amüwa tsü khüta alaa kangnung!

¹³Ade nührü yangpirü te Ihnü chore: Ih yangpirü riwürü khüdu thsa tashi, Ihnü I nguchi la mülahnung.

¹⁴Ihnü I nyitsarüti khyang nahmohsoh arüh khürü dusü khümchonung.

¹⁵Tunüo khode arüh mükhyüchocho, amüi tsurü tsü Tsingrangba rorüh lanü abi shangrü kangsohcho. Akhang, khode arüh khyüchonang khütanung? Hütsü asücho lanü akang linung!

¹⁶Hümthse lanü akhu Tsingrangba khyang azikyah jükhang, hümthse atpahshü tsü abi yo lile; ko singra tsü Tsingrangba khyang jükhang, ajengzati tsüsü abi yo lile.

¹⁷Akhyümcho olive singjengza khürü kyüsahpü rangmü olive singjengza chah chikehsohre. Nührü yangpirü tsü hütsüba rangmü olive sing tsü kyole, ko ade nührünü Jihudarü amüwa changtare.

¹⁸Hütsünü, singjengza kyo kyüpehba nührünü tümüthsamünyü. Nührü khüta mülahnung? Nührü ajengza khüdu due; nührünü ara tsü trorü mah, ta ara tsünü nührü trore.

¹⁹Ta nührünü yonung, “Ajengzati tsü Ih chungkehnung shulüm kyopehcho.”

²⁰Hütsü yuje. Arühnü müyudsichonü arüh kyopehcho, ta nührünü yudsichonü yare. Ta hütsü nengdang tümüthseh, ta drüng.

²¹Adong jengza kyoba Jihudarü mii müpehjükhang, nührü te pehjünungepü nührünü lümrü mah-o?

²²Hila Tsingrangba tsü khüta amüi, ta khüta adrünung Ihsanü ngure. Akhülurü nengdang abi adrünung, ta nührünü abi amüi la mütozah likhang, nührü nengdang abi aküna. Ta hütsüta müthsakhang, nührüsü kyopehnung.

²³Ko Jihudarünü arüh müyudsiba tsü pehjükhang, arüh akhudi liba la tsü müchiikehnung; tunüo hütsüta nguchinung Tsingrangbanü kohle.

²⁴Nührü yangpirüti tsü rangmü olive dong chahnü kyüsahcho jengza, olive singdongkhung chah müchiikehba kyole. Jihudarü tsü akhyümcho singdong tsü kyole; ko Tsingrangba nengdang hiri akyopehcho jengzati tsü adong chah müchiikehnung tsü khütang amüla lile.

²⁵Jünirüti, Ihnü nührü khyang arangyu khüdu müdhesohnyüre, tunüo hütsü khu nührü müdhecho du lümba lanü khümchonung. Israelrü lasih müküpba tsü lede nengdang mah, ta yangpirüti Tsingrangba yanglang pisa mürode du linung.

²⁶Ko hütsüta Israelrü atümung khümchonung. Amüsa yunü yocho kyo: “Khümchobong Zion lanü ronung ko Jakob trah chahnü amütsa apüm pehjünung.

²⁷Ihnü arüh münyi khyümüide, arüh te azengchotacho hi külüpnung.”

²⁸Arühnü Yuse Atsa mükhyüchochonü, nührü yangpirü thsacholanü Tsingrangba te Jihudarü arorüh kangcho. Ta Tsingrangbanü throchehchonü ko arüh jümürü khyanglangnü arüh abi shangrü lile.

²⁹Tsingrangbanü sü throchehcho ko müwajücho, hütsü nengdang abi lüm mümülichi.

³⁰Nührü yangpirünü atsicho la Tsingrangba yocho münyi; ta ade Jihudarü yocho münyicho nengdangnü nührünü Tsingrangba yanglilüm khyücho lile.

³¹Hütsü kyo, nührünü yanglilüm khyüchocho khu, Jihudarü nüsü Tsingrangba yanglilüm ngunung nengdang arühnü Tsingrangba yocho münyire.

³²Tsingrangbanü atümung te yanglilüm ngusohnung nengdang abinü atümung yocho münyiba pohki khangtipücho.

³³Tsingrangba tsü khütoh-i alirü! Abi lümlong ko amüdhe khüta asoh! Sünü abi lümcho yochehnung? Sünü abi lang nyichehnung?

³⁴Amüsa yunü yocho kyo: “Abüdongba lümcho sünü müdhero? Sünü abi thsüchinung kohro?

³⁵Abi khyang jülinungthsa, lango dusü sünü abi khyang jodhengcho?”

³⁶Tunüo lüpcho abinü thricho, abi khu lire ko abi nengdang lire. Tsingrangba te lede ahechi thsaang! Amen.