Read Sangtam Naga ROMRÜ 13 Bible Online

ROMRÜ 13 - Sangtam Naga bible

ROMRÜ 13

¹Nyitsarü müipinü yangthsarü pohki lieng, tunüo Tsingrangbanü mümülacho tu yangbe müle, ko ade athsarü tsü Tsingrangbanü thsasohre.

²Sünü ade thsarü yangbe nyümro abinü Tsingrangbanü mülacho nyümre; ko sünü hütsü roh-i nguchiro abinü apu michah yukhaba hirore.

³Tunüo atsa nguchirü nengdang yangthsarü tsü adrünung müle, ta amütsa nguchirü nengdang adrünung. Yangthsarü müdrüpü nührü linyürü mah-o? Hütsükhang, tu atsa liro hütsü nguching, ko abinü nüh senung,

⁴tunüo abi Tsingrangba dikehrü khüdu nührü tsanung nengdang nguchire. Ta nühnü amütsa nguchikhang abi drüng, tunüo abinü khingchinung tase tsü abi chah lile. Abi Tsingrangba dikehrü ko sünü amütsa nguchiro arüh michah akhingchi nguchire.

⁵Hütsünü akhingchi drücho nengdangnü du mah, ta nü lasihnü mümülangjünungthsa yangthsarü pohki lieng.

⁶Hütsütachonü, nührünü alihmüthsüsü jüre, tunüo yangthsarünü hiri nguchide Tsingrangba nengdang nguchirü kangre.

⁷Hütsükhang, arüh khyang tu tee liro jüng; alihmüthsü ko dhrisü tu jünung liro jüng, ko arüh atümung te jengreng ko adhichi jüng.

⁸Khüdunü khüdu te müitanung chah khu, sütesü thsite teerü tükang. Sünü hi nguchiro abinü yuzeng tikehjüre.

⁹Yuzengti, “Nahtrahnaxeng tübichi; tümapseh; tüfü; tümükhyah” pü, yoba hiri apüm ko yuzeng apa apüm, “Nü kurümrü abürü roh-i müing pü yoba yuzeng hila apüm chingkehpo lile.”

¹⁰Amüinü sütesü amütsa münguchire; hütsüeko amüinü yuzeng tsü tikehjüre.

¹¹Nührünü hütsüta nguching, tunüo nührü ayüpsecho lanü jesunung becho chihko pü nührünü müdhele. Tunüo Ihsa akhudi yudside tenü akangcheh tsü ade alaa Ihsa shündhün lile.

¹²Ama athseng tsiko, ko atsingse tsehle. Hütsüeko Ihsanü ama nguchiti pehjonung, ko atsingse la khata thsunohrü khyonung.

¹³Atsingse la lirüti kyo Ihsanü saying athsalang linung; Kuzühba mahkhang müchamülohba mah, mabomashi mahkhang shutsa mükhyahmürah mah, khataba ko nahmoh mah.

¹⁴Ta nührünü Abüdongba Jisu Khrista Khata jengki khyüng ko shutsa mükhyah longnyüpsohba müruba lanü zahng.