Read Sangtam Naga ROMRÜ 3 Bible Online

ROMRÜ 3 - Sangtam Naga bible

ROMRÜ 3

¹Akhang yangpirü michah Jihudarü tu ajingcho alaa liro? Mahkhang müjüp- pehcho tu ajingcho liro?

²Langkhüru la ajingcho khütang lile. Akhudiba la, Jihudarü khyang Tsingrangbanü abi yusi jücho.

³Ta arüh yola khürü yuje müchokhang, hütsünü Tsingrangba yuje müchorü kangsohnung do?

⁴Khodesü mah! Atümung arahkhehrü thsanye, Tsingrangba yuje linung. Amüsa yunü yocho kyo: “Nühnü chode nü athsalang tsü ngusohng; Nü yukhade nühnü kohng.”

⁵Ta Ihsa thsameh nguchiba tsünü Tsingrangba yuje tsü alaa ngusohrü thsakhang, Ihsanü tu yonung? Tsingrangbanü Ihsa khingchide abi thsamehrü mah-o? (Ihnü hi shutsa lahpinü chore).

⁶Hütsü roh-i khodesü mah! Tsingrangba tsü yuje müthsakhang, abinü khüta limih yu khanung?

⁷Ta Ih yuje müchocho khu abi yuje alaa tsitsa abi ahechi kükyüsohkhang, tuepü amünyirü khüdu kyo ade yingcheh Ih mülangjüro?

⁸Khang, “Atsa chürosohnung tuepü amütsa münguchiro”? Ajüje, nyitsarü khürünü hitari yu yonü Ih mülangjo nyüpmüsehko. Hütsü kyo arüh mülangjünung.

⁹Khang Ihsa Jihudarü yangpirü tenü atsau mah-o? Khodesü mah! Jihudarü ko yangpirü anyüding amünyi zii pohki lilepü Ihnü ngusohko.

¹⁰Amüsa yunü yocho kyo: “Amüsa süsü müle, khüdusü müle,

¹¹anyichehrü süsü müle, Tsingrangba yangchirü süsü müle.

¹²Tsingrangba tenü atümung zako; arüh atümung tsimehko; Atsa nguchirü süsü müle, khüdusü müle.

¹³Arüh linga kong khangthrucho kyo lile; arüh müle athsüyohchünung bichire; Arüh beküp la mürü müyüh lile.

¹⁴Arüh be chokehchola ko akhanü jeng lile.

¹⁵Arüh jing shühkhatohnung atsaya;

¹⁶arüh lang la athsangnyang ko aroto lile;

¹⁷arühnü atbachi lang mümüdhe.

¹⁸Arüh bete Tsingrangba drüba müle.”

¹⁹Ade nyitsarü amütangba atümung yatinung ko limih apüm Tsingrangba yukhaba pohki noronung nengdang,

²⁰yuzeng la licho lüpcho tsü yuzeng pohki lirüti chah bichinungepü Tsingrangba jingte süsü alanglang mükangnung. Yuzengnü nguchiba tsü abinü amünyi shitpahko pü ngusohnung nengdang lile.

²¹Ta ade Tsingrangbanü apu te nyitsarü langsohba tsü mishako. Hütsü nengdang Mosa yuzeng ko azikehrütinü yuzi jünye, hütsü yuzeng te tu anguchinung müle.

²²Jisu Khrista chah yudsi khu Tsingrangbanü nyitsarüti langjüre. Khrista chah yudsirü atümung te Tsingrangbanü hita nguchire, tunüo tu papa müle:

²³Atümungnü amünyi shitpahko ko Tsingrangba ahechi müchire.

²⁴Ta Tsingrangba amükang jiyünü lehchehbong Jisu Khrista khu nyitsarü atümung abi te langjücho.

²⁵Abi süchonü abi chah arüh yudsi khu arüh mülang pehji kangnung nengdang, Tsingrangbanü abi amübü jücho. Abi amüsa ngusohnung nengdang Tsingrangbanü hütsüta nguchicho.

²⁶Atsicho la abinü rangchocho ko nyitsarüti münyi mükhichicho; ta adelü abi amüsaba ngusohnung abinü arüh münyiti khichire. Hütsüta Tsingrangbanü apusü amüsaepü ngusohre ko Jisu chah yudsirü müipi abinü langjüre.

²⁷Akhang, tu nengdang Ihsa mülahnung? Tu mülahnung müle! Ko hütsü nengdang tu yuzi liro? Ihsanü yuzeng bichicho ngang mah-o? Mah, ta Ihsanü yudsichonü.

²⁸Hütsünü nyüh khüdu yuzengnü mülacho bichichonü mah, ta yudsi khu dunü Tsingrangba te langsohre.

²⁹Mahkhang Tsingrangba tsü Jihudarü yo du mah-o? Abi tsü yangpirü Tsingrang mii mahrü do? Ho, yangpirü Tsingrangsü lile.

³⁰Tsingrangba tsü khüdu du, abinü Jihudarü arüh yudsi aichi langjünung, ko yangpirü arüh yudsi khu langjünung.

³¹Hi adüzü hiba yudsinü Yuzeng tsü adeng kangjürü mah-o? Khodesü hütsüta mah; Ihsanü yuzeng tsü drengdrengsohre.