Read Sangtam Naga ROMRÜ 4 Bible Online

ROMRÜ 4 - Sangtam Naga bible

ROMRÜ 4

¹Akhang, Ihsa yucho amü Abraham nengdang tu yonung? Abi chah tu tikehcho?

²Nguchinü abi langjüpü likhang, abi mülahnung lango lile, ta Tsingrangba jingte mah.

³Amüsa yunü yore, “Abrahamnü Tsingrangba chah yudsicho, ko abi yudsi ngang abi amüsa kang khyüchocho.”

⁴Sünü nguchiro abi amii ngure, ta hütsü jiyü khüdu roh-i mükhichire; tunüo hütsü abinü shehcho lile.

⁵Ta sünü nguchi mahpü abi yudsi chah dümpiro, ko athsamehcho achomükeh kangsohbong Tsingrangba chah yudsiro, abi yudsi khu Tsingrangba apu te langjüre.

⁶Nguchi müzehpü Tsingrangbanü langjüba nyitsarü khüdu akünyang nengdang Davidnü choba tsü hi lile:

⁷“Sürü mülang pehjücho, sürü münyi thsüthohjücho akünyangnung!

⁸Sü münyi Abüdongbanü mükhichinang abi akünyangnung!”

⁹Hiba akünyang Davidnü choba tsü amüjüp-pehrü nengdang du do? Mah! hütsü amümüjüp-pehrü nengdangsü lile. “Abrahamnü Tsingrangba chah yudsicho, ko abi yudsi ngang Tsingrangbanü abi langjücho.”

¹⁰Hi khode tikehcho? Abi mümüjüp-pehde a müjüp-pehko khanglango? Hütsü mümüjüp-pehde lile.

¹¹Abi akhanglang du müjüp-pehcho, ko abi müjüp-pehba tsülü abi mümüjüp-peh-ede abi yudsi khu Tsingrangbanü abi amüsa kang khyüchocho amüdhethsa du licho. Hütsünü Abraham tsü Tsingrangba chah yudsirü atümung au lile, ko mümüjüp-peh nye abinü arüh amüsa kang khyüchore.

¹²Ihsa au Abraham abi mümüjüp-pehde yudsi akang licho kyo, sürünü müjüp-pehcho chah lahkeh yudsi licho, abi tsü arüh ausü lile.

¹³Tsingrangbanü Abraham ko abi chahnü trahchocho te alimih tsü arüh yo thsanung ko nyengchoba tsü yuzeng bichicho ngang mah, ta abinü yudsicho ngang abi amüsa kang khyüchocho, ko abinü limih tsü jücho.

¹⁴Tunüo Tsingrangba anyengchocho tsü yuzeng bichirüti khyang jünung thsakhang, nyitsarü yudsi tsü adeng ko Tsingrangba anyengchocho tsü adeng.

¹⁵Yuzengnü Tsingrangba rihlong hirore; ta khüde yuzeng müliro hütsüla amünyi müle.

¹⁶Hütsünü anyengchocho tsü, yuzeng bichirü khyang du mah, ta Abraham roh-i yudsirü khyang, abi chahnü trahchocho atümung khyang jiyü roh-i jünungthsa, anyengchocho tsü yudsi chah kehle. Tunüo Abraham tsü Ihsa yudsirüti atümung au lile;

¹⁷amüsa yunü yocho roh-i, “Ihnü nüh yucho adrong au kangsohko.” Hütsünü Abrahamnü yudsiba Tsingrang sünü asürü kanglisohro, ko sünü müliba kohro lisohro, abi jingte anyengchoba tsü atsa lile.

¹⁸Abrahamnü alongdi müliba lasü alongdi linü yudsicho, hütsünü, “Yucho adrong au kangcho.” Amüsa yunü yocho kyo, “Shümtsurüti chenghi doi kangnung.”

¹⁹Hütsütade abi kang thsih khüdu-o azirü thsacho; ta abi fü asücho roh-i lümnye mahkhang adelü Saranü azarü müsuronungeko müdhenye, abinü yudsi la suh müzeh mükangcho.

²⁰Abi yudsinü abi müjüp-pehcho ko Tsingrangba anyengchocho nengdang abinü lümxü mülicho; abi yudsi ziinü abi jengcho, ko abinü Tsingrangba neng secho.

²¹Tsingrangbanü tu nyengchocho hütsü tikehnungepü abinü longi müdhecho.

²²Hütsünü, yudsi khu Tsingrangbanü Abraham “amüsa kang khyüchocho.”

²³“Abi amüsa kang khyüchocho,” ba yu tsü abi nengdang du thrahchoba mah.

²⁴Ta Ihsa sürü amüsa kang khyüchonung liro, ko Ihsa Abüdongba Jisu, sü asücho lanü kanglicho abi chah yudsirüti nengdangsü thrah lile.

²⁵Ihsa münyi ngang abi asünung khakhuchüjücho, ko Ihsa langjünung nengdang abi kanglicho.