Read Sangtam Naga ROMRÜ 5 Bible Online

ROMRÜ 5 - Sangtam Naga bible

ROMRÜ 5

¹Ade yudsi khu Ihsa Tsingrangba te langjücho, Abüdongba Jisu Khrista khu Tsingrangba te Ihsa atbachi lile.

²Abinü yudsi khu ade Ihsa liyaba Tsingrangba achomang hila norocho. Hütsünü Tsingrangba ahechi changtaba ko alongdi nengdang Ihsanü künyangtanung!

³Ihsanü chongcha lasü künyangtanung, tunüo chongcha khu arangcho chürosohre,

⁴arangchonü Tsingrangba akhyüchoba chürosohre, ko akhyüchoba tsünü alongdi chürosohre.

⁵Hiba alongdinü Ihsa suhmüzahsohre, tunüo Ihsa khyang jüba Anbü Amüsa khunü Tsingrangbanü abi amüi Ihsa lasih la mülümthoh jo lile.

⁶Tunüo Ihsa alongdi mülipü lide, münyirü nengdang becho la Khrista sücho.

⁷Amüsarü nengdang sünung tsü dee athsah, nyitsarü atsa nengdanglü khürünü sünyünung.

⁸Ta Tsingrangbanü Ihsa te khütoh-i müiro hütsü ngusohko, hütsü Ihsa amünyi la lide Khrista Ihsa nengdang sücho!

⁹Abi sücho khu ade Ihsa Tsingrangba te langjüko; khang, abinü khütoh-i alaa Tsingrangba rihlong lanü Ihsa khümchonung!

¹⁰Ihsa Tsingrangba rorüh thsacho, ta abi Tsurü sücho khu abinü Ihsa abi shangrü kangsohcho. Ade Ihsa Tsingrangba shangrü lile, khang Khrista akang khu Ihsa khütoh-i alaa khümchonung!

¹¹Ta hütsü du mah; Tsingrangbanü Abüdongba Jisu Khrista khu ade Ihsa abi shangrü kangsohchonü Ihsa künyangre.

¹²Amünyi tsü limih la nyüh khüdu khu rocho, ko abi münyinü abi te asüba hirocho. Hütsüta amüi tsurü atümung chah asü rocho tunüo atümungnü amünyi shitpahko.

¹³Amünyi tsü limih la yuzeng müjüe-denü licho; ta yuzeng mülicho la amünyi mükhichire.

¹⁴Ta Adam roh-i amünyi müshitpahnye, arüh michahsü Adam shikhe lanü Mosa chii amüi tsurü atümung michah asünü yangthsathsacho. Adam tsü aronung liba tsah licho.

¹⁵Ta anyüh tsü mükyota, tunüo Tsingrangba amükang jiyü tsü Adam münyi roh-i mah. Hütsüba nyüh khüdu münyi tsünü nyitsarü adrong süba tsü yuje lile. Ta Tsingrangba achomang tsü deenü alaa, hütsüta abi amükang jiyü tsü nyüh khüdu, Jisu Khrista achomang khu khütango nengdang lile.

¹⁶Tsingrangba jiyü ko nyüh khüdu münyi nyüh tsü papa lile. Amünyi khüdu khanglang “Thsamehcho” yukhaba rore; ta amünyi khütango khanglang, amükang jiyü alanglang hirojüre.

¹⁷Nyüh khüdu münyi khu abi thsacholanü asünü yangthsanung dikehcho. Ta nyüh khüdu, Jisu Khrista khu nguchiba tsü khütang alaa lile. Tsingrangba achomang khyüchorü ko abi te langjürü atümungnü Khrista khu arüh akang la yangthsanung.

¹⁸Hütsüta, nyüh khüdu münyinü amüi tsurü atümung mülangjücho kyo, nyüh khüdu amüsa nguchinü amüi tsurü atümung langjüre ko akang jüre.

¹⁹Ko nyüh khüdunü yocho münyicho khu nyitsarü atümung münyirü kangsohcho kyo, nyüh khüdunü yocho nyicho khu atümung Tsingrangba te langsohnung.

²⁰Yuzeng tsü athsamehrü zikehsohnung jücho; ta khüde amünyi ziro, Tsingrangba achomang khüsha alaa zire.

²¹Hütsüta, Ihsa Abüdongba Jisu Khrista khu müchangkaba akang langnünung nengdang, amünyinü asüba michah yangthsacho kyo, Tsingrangba achomangnü amüsaba la yangthsare.