Read Sangtam Naga ROMRÜ 7 Bible Online

ROMRÜ 7 - Sangtam Naga bible

ROMRÜ 7

¹Jünirüti, Ihnü yonung liba tsü nührünü nyichehnung, tunüo nührü atümungnü yuzeng tsü müdhele. Nyüh khüdu abi akang li yingcheh du yuzengnü rah lile.

²Adüzünü, axengcho khingkurü khüdu tsü anii akang li tashi yuzengnü anii te rah lile; ta anii sükhang, abükyü rah müle.

³Hütsünü anii akang lide abükyünü aparü adhrerü te likhang, abükyü te nahtrahnaxenglarü dsinung; ta anii sükhang, abükyünü aparü adhrerü kuhla xeng nye nahtrahnaxengrü mah, tunüo yuzengnü abükyü tsü lehcheh lile.

⁴Jünirüti, nührü nengdangsü hütsü roh-i lile. Yuzeng lahpinü nührüsü süko, tunüo nührü Khrista fü la lohla lile; ko ade Tsingrangba dikehba la Ihsa athsütah kangnung nengdang nührü kangliroba yo lile.

⁵Tunüo khode Ihsa shutsa la licho, Ihsa fü la zehba mükhyahmürah tsü yuzengnü chürosohcho, ko asüba dikehba la Ihsa athsütah kang licho.

⁶Ta ade, Ihsa yuzeng lanü lehcheh lile, tunüo khüdupi Ihsa arangyohrü kangsohba la tsü Ihsa sücho. Adelü athrahcho yuzeng ahiba lang la mah, ta Anbü lang asi la Ihsanü dikehre.

⁷Akhang Ihsanü yuzeng tsü amünyiepü yonung mah-o? Khodesü mah! Ta amünyi tsü tunang hiba Yuzeng khu Ihsanü müdhecho. Yuzeng tsünü, “Bürü yo tümükhyah” pü müyo langlü, amükhyahba tsü Ihnü mümüdheba thsako.

⁸Ta hütsüba yuzeng khu I chah liba mükhyahmürah lüpcho thsümüsunung thsatsa ngucho. Yuzeng mülikhang, amünyi tsü asücho.

⁹Ipusü khüdupi yuzeng müzehpü akang licho,

¹⁰ko Ih sücho. Ko yuzeng khüinü akang hironung licho, I nengdanglü asüba hirocho.

¹¹Amünyi abi thsatsa ngucho ko yuzeng khunü Ih thsüyohchü mapsehcho.

¹²Hütsünü, yuzeng abükyü tsü amüsa, ko amülaba tsü amüsa, yuje ko atsa.

¹³Ta hütsüba atsa tsünü Ih süsohcho mah-o? Khodesü mah! Ta amünyi tsü amünyiepü mishanung shulüm khüi atsa licho hütsü khu amünyinü I chah asüba chürosohcho. Hütsüta, amülaba tsü khunü amünyi tsü khüsha amünyiepü ngusohre.

¹⁴Yuzeng tsü anbüepü Ihsanü müdhele; ta Ihlü amünyi te icho shutsa khüdu du lile.

¹⁵Ihnü tu nguchirü hütsü Ihnü münyichehre; tunüo Ihnü tu nguchinyüro hütsü münguchire, ta Ihnü tu thrünyiro hütsü Ihnü nguchire.

¹⁶Ihnü münguchinyüba tsü nguchichonü Yuzeng tsü yuje-epü Ihnü nyengchore.

¹⁷Hütsünü hi nguchiba tsü Ih mah; ta hütsü I chah liba amünyi tsünü nguchire.

¹⁸I chah, I shutsa la tu atsa mülepü Ihnü müdhele. Tunüo atsa nguchinung Ihnü müru linye, Ihnü hütsü nguchinung mükohre.

¹⁹Ihnü nguchinyüba atsa tsü münguchire, ta Ihnü münguchinyüba amünyi tsü Ihnü nguchire.

²⁰Ihnü münguchinyüba Ihnü nguchikhang, hütsü adüzü anguchiba tsü Ih mah; ta hütsü I chah liba amünyi tsü lile.

²¹Hütsünü hiba yuzengnü nguchirepü Ihnü müdhele: Khode Ihnü atsa nguchinyünang, Ihnü amünyi du tsü throchehpü lire.

²²I lasih la Ihnü Tsingrangba yuzeng la künyangre.

²³Ifü la yuzeng apa khüdu I lasihnü mükhyünyüchoba yuzeng khüdunü nguchicho Ihnü ngure. Hütsünü Ifü la nguchiba amünyi yuzeng khyang Ih arangyohrü khüdu kangsohre.

²⁴Suromüchübong Ih! Hiba asüba fü lanü sünü Ih khümchonung?

²⁵Tsingrangba sünü Ihsa Abüdongba Jisu Khrista khu hi nguchiro abi neng seing! Hütsünü, Ipu jangjang I lasihnü Tsingrangba yuzeng dikehre, ta I shutsanü amünyi yuzeng dikehre.