Read Sangtam Naga 1 KORINTRÜ 10 Bible Online

1 KORINTRÜ 10 - Sangtam Naga bible

1 KORINTRÜ 10

¹Jünirüti, Mosa khanglang wüba Ihsa jümürüti chah tu tikehcho hütsü nührü khyang lümchehsohnyüre. Nyükhi atsungtiba pohki arüh apüm khümcho amoh kihdi kehcho.

²Nyükhi la ko kihdi la arüh atümung Mosa mono kang bapticho.

³Arüh atümungnü anbü tsuyongnung khüdu du tsucho, ko anbü kih khüdu du yongcho.

⁴Arühnü arüh yola wünü anbü lung la tsünü yongcho; ko hütsüba lung tsü Khrista apu.

⁵Hütsüta nye arüh adronguba te Tsingrangbanü mükünyangcho, hütsünü arüh me tsü lipilih la shupishuza pehcho.

⁶Ade, arüh kyo, Ihsanü amütsa mümürunung shulüm hütsüri tsü Ihsa nengdang adüzü lile.

⁷Arüh khürü kyo kyothri mümübünung. Amüsa yunü yocho kyo, “Nyitsarünü tsuyongnung nengdang pümcho ko arühnü nyiichinung shemüsucho.”

⁸Arüh khürünü mabomashi nguchicho khu nyümong khüdunü nyüh hajar mükyüpü asang trümyoh sücho roh-i Ihsanü mübichinung.

⁹Arüh khürünü Abüdongba thsatsüpü mürünü mükyüsehcho kyo Ihsanü Abüdongba müthsatsünung.

¹⁰Arüh khürünü jümjümpü ko asüba riwürünü changsohcho kyo, Ihsanü müjamjümnung.

¹¹Hiri apüm aparü nengdang adüzünung arüh chah tikehcho, ko hütsü Ihsa nengdang amüzahnung thrah yohpücho. Tunüo Ihsa achangkaba shang la lire.

¹²Sünü drengdreng yarepü lümro abinü müngahsehnung müzahng.

¹³Nührü chah tikehba athsatsü roh-i tsü aparü chahsü tikehre. Ta Tsingrangbanü abi anyengchocho yohponü nührünü mürangchehnungthsa müthsatsüsohnung; ko nührü thsatsüde nührünü rangchonung ko tsiphunung suhre jünung.

¹⁴Hütsüeko, jünirüti, kyothri mübüba lanü za lieng.

¹⁵Ihnü athsehthsarü te roh-i chore; Ihnü tu yoro hütsü nührübürünü lümdheng.

¹⁶Abüdongba thsüti shing ko Ihsanü Tsingrangba khyang anengse jüba; hütsü lanü yongde Ihsanü Khrista shüh changtare. Ko Ihsanü chenahba hümthse: hütsü tsude Ihsanü Khrista fü changtare.

¹⁷Ihsa adrong thsanye, hümthse khüdu du, ko afü khüdu du, tunüo Ihsa atümung hümthse khüdu du changtare.

¹⁸Israelrü lümdheng; arühnü kangmübücho tsuba tsü Tsingrangba bholu dikehba la changtarü mahrü do?

¹⁹Khang Ihnü tu yoro? Kyothri khyang mübücho tsuyongba mahkhang kyothri tsü langoepü yorü mah-o?

²⁰Mah! Ihnü yoba tsü müyudsirü bholu chah tu mübüro hütsü Tsingrangba khyang mah, ta motsing khyang. Ko Ihnü nührü motsing te mütrümtasohnyüre.

²¹Nührünü Abüdongba shing ko motsing shing lanüsü müyongcheh; nührünü Abüdongba tsingthsang ko motsing tsingthsang chahnü mütsucheh.

²²Mahkhang Ihsanü Abüdongba nahmohsohrü do? Abi tenü Ihsa suh azehba mah-o?

²³“Apüm tsü athsalang, ta apüm tsü atsa mah.” Apüm tsü athsalang, ta apüm tsü ajingcho mah.

²⁴Sünüsü abürü tsanung du tüyangchi, ta aparü tsanung yangching.

²⁵Tu müzongpü aichah iba shuh masü tsung.

²⁶Tunüo, amüsa yunü yocho roh-i, “Limih ko hütsüla liba lüpcho Abüdongba yo.”

²⁷Müyudsirü nyüh khüdunü nüh yangtsunung tsikhang ko nühnü wünung dhrongchehkhang, tu tüptinang müzongpü tsung.

²⁸Ta khürünü nü te, “Hütsü kyothri khyang mübüchoe” pü yokhang, ayoba ko abi nüpu nengdang hütsü tütsu

²⁹hütsü, nüh mah ta aparü nengdang yore. “Khürünü yonung, Tsale, tuepü I mürucho aparü lümchonü yatijüro?

³⁰Ihnü I tsuyongnung nengdang Tsingrangba khyang anengse jükhang, tuepü Ihnü nengse jüpü tsucho nengdang müchümükehro?”

³¹Hütsüeko, nührünü tu nguchinang, tsu nye ko yong nye, Tsingrangba hechinung nengdang nguching.

³²Jihudarü nye, yangpirü nye, mahkhang Tsingrangba Lithro nye, sü khyangsü athsangthsi müjüpü lieng.

³³Ih kyo nguching; Ihnü Ipu nengdang mülümpü, atümung khümchonung ko tsanung nengdang du lüm, I nguchicho apüm la atümung künyangsohnung müküpre.