Read Sangtam Naga 1 KORINTRÜ 11 Bible Online

1 KORINTRÜ 11 - Sangtam Naga bible

1 KORINTRÜ 11

¹Ihnü Khrista saying iithsacho kyo, nührünü I saying dhengchoung.

²Ihnü nührü nengsere, tunüo nührünü lede Ih lümchehre ko Ihnü nührü te docho apüm bichire.

³Ta nyitsarü atümung michah Khrista tsü athah, anii tsü anitpü michah athah, ko Tsingrangba tsü Khrista michah athah-epü nührü te nyichehsohnyüre.

⁴Hütsünü adhrerü sünü ashibülung la dangkhidangnangde mahkhang yu chode ku müshünang, Khrista mühechijüre.

⁵Khingkurü sünü ashibülung la ku mümüshüpü dangkhidangnang mahkhang yu chonang, abükyünü anii mühechijüre; hütsü thah hehpehcho te tu papa müle.

⁶Khingkurü khüdunü athah mümüshükhang, abükyü thah hehpehsohng. Ta khingkurü nengdang athah hehpehnung tsü ashah thsakhang, abükyü ku müshüsohng.

⁷Adhrerü khüdu ku müshünung müdhsüdah, tunüo abi tsü Tsingrangba thrizi ko ahechi lile. Ta khingkurü tsü adhrerü ahechi lile.

⁸Tunüo adhrerü tsü khingkurü chahnü mah, ta khingkurü tsü adhrerü chahnü thricho.

⁹Mahkhang adhrerü tsü khingkurü khyanglangnü mah, ta khingkurü tsü adhrerü khyanglangnü thricho.

¹⁰Ninglang riwürü nengdangnü khingkurünü ku müshüng.

¹¹Ta, Abüdongba la, khingkurü tsü adhrerü müzehpü apisa mah, mahkhang adhrerü tsü khingkurü müzehpü apisa mah.

¹²Tunüo khingkurü tsü adhrerü khu thrichonü, hütsü kyo adhrerü tsü khingkurü khu surore; ko lüpcho Tsingrangba khu lisohre.

¹³Khingkurünü ashibülung la ku mümüshüpü dangkhidangnangnung athsalanga mahro nührü jangjang thsatsüng.

¹⁴Tunüo, ayahnü adhrerünü kuva asheng viba tsü apu jowüsohre,

¹⁵ta khingkurülü kuva asheng viba tsü alaa tsahtsasohre. Tunüo, abükyü kuva asheng tsü yangtisohnung nengdang jücho.

¹⁶Ta khürünü hütsü nengdang ritakhang, Ihnü yonungnü, Ihrünü nye, mahkhang lithronü nye ashibülung la nanathsaba apa tu müle.

¹⁷Ta hiba athülaba la Ihnü nührü neng müsere, tunüo nührü shibülungba tsü khüsha amütsauba nengdang lile.

¹⁸Akhudiba la, nührü mülung la achangnah lilepü yuchire ko hütsü Ihnü thrilü yudsire.

¹⁹(Yuje chorü khohchehnung shulüm nührü yola changnah liba.)

²⁰Nührü müjang shibülungpü tsuba tsü Abüdongba thsüti mah.

²¹Tunüo, nührünü tsude, nyitsarü müipinü palu tsangdhi tsure, hütsünü khürü müchade khürülü yangsehre.

²²Nührü tsuyongnung kuh mülirü mah-o? Mahkhang nührünü Tsingrangba Lithro müthsamünyo ko ailümrü ashah khyüsohnyürü mah-o? Hi nengdang nührü te tu yosohnyüro? Nührü sesohnyürü mah-o? Ihnü hi nengdang nührü müsenung!

²³Tunüo nührü te tu docho hütsü Ihnü Abüdongba chahnü khyüchocho: Abüdongba Jisunü abi kihyochüba romang, hümthse khüdu khyücho,

²⁴Tsingrangba khyang anengse jücho, ko hütsü chenahpü yocho, “Hiba hi nührü shulüm Ifü lile. Ih lümchehnungthsa hi bichieng.”

²⁵Hütsü kyo, thsüti tsupü abinü Shingsü khyüpü yocho, “Hiba shing I shüh la asi azengtacho lile. Khodederü nührünü hi yongnang, Ih lümchehnungthsa bichieng.”

²⁶Tunüo nührünü khüdopi hiba hümthse tsunang ko shing hi yongnang, Abüdongba sücho abi müro yingcheh seyohjüre.

²⁷Hütsüeko, sünü Abüdongba mühechisohnü hümthse tsunang ko abi shing yongnang, Abüdongba fü ko shuh nyüm amülanglang linung.

²⁸Hütsüeko, nyitsarü müipinü akhu abürü düzodheng, hütsüpü du hümthse tsü tsung ko shing tsü yong.

²⁹Tunüo abinü Abüdongba fü nengdang münyichehpü hümthse tsü tsukhang ko shing tsü yongkhang, abinü abürü chah hütsü tsuyongnü yukhaba hirore.

³⁰Hütsü khu nührü adrong füthsare ko suh müzehre ko khürü süko.

³¹Ta Ihsanü Ihsabürü akhudiba thsatsükhang, Ihsa yukhaba pohki müronung.

³²Ta müyudsirü yola Ihsa zeh mümülangjünung nengdang Abüdongbanü Ihsa yukhare ko khatare.

³³Hütsüeko, ajünirüti, nührünü Abüdongba thsüti tsunung shibülungde, nührünü yingtaang.

³⁴Nührü shibülungde Tsingrangba yukhaba nührü chah müronungthsa, khürü yangkhang, abinü kuh lanü tsung. Khiyu apa nengdang tsü, Ih rode Ihnü tsitsajünung.