Read Sangtam Naga 1 KORINTRÜ 3 Bible Online

1 KORINTRÜ 3 - Sangtam Naga bible

1 KORINTRÜ 3

¹Jünirüti, nührü te anbü lirü te roh-i chotanung mükohre; ta shutsa nyitsarü ko yudsi la akhunga te roh-i chotanung kangre.

²Amüküp tsuyongnungnü mah, ta nyikihnü nührü kangre, tunüo nührünü hütsü khyüchonung akyang mah. Ko ade mii nührü mah-e,

³tunüo nührü shutsa la lile. Nührü yola nahmoh ko yuji likhang, nührü ashusha roh-i shutsa la mülirü do?

⁴Khürünü, “Ih Paul mono,” ko “Apollos mono” pü yoba tsü limih shutsa mahrü do?

⁵Akhang, Apollos süo? Ko Paul süo? Ihrüsü nührü yudsisohrü dikehrü du lile. Ihrü atümung Abüdongbanü abi khyang tu lümcho jücho hütsü du nguchire:

⁶Ihnü khyümcho, ko Apollosnü kih xahcho, ta Tsingrangbanü zisohre.

⁷Akhyümba ko kih xahba tsü du mah, ta hütsü zisohba Tsingrangba du tsü ayinge.

⁸Akhyümba ko kih xahba nyüh tu papa müle; ta nyitsarü müipi palu nguchi aichi Tsingrangbanü jiyünung.

⁹Tunüo ihrü Tsingrangba nengdang müjang nguchirü, ko nührü Tsingrangba luh.

¹⁰Tsingrangbanü I khyang jücho jiyü bichi, Ihnü kuthsarü asithsa roh-i nguchi aying müsure, ko aparünü hütsü chah thsakehre. Ta nyitsarü müipinü abinü khüta thsarü hütsü müzahng.

¹¹Tunüo Tsingrangbanü amüdongkehsing khüdu külüpcho, ko apa tu külüpkehnung mükoh.

¹²Khürünü hon, taripi, mahkhang thsidi lung yoh thsanung; aparünü sing, za mahkhang manying yohnung.

¹³Ko nyitsarü müipi nguchi tsü Khrista Nyümong mishanung. Tunüo hütsü nyümong nyitsarü müipi nguchi tsü michangnü mishanung; michangnü hütsü düzodhengnung, ko yujeba tsü ngusohnung.

¹⁴Thsa liba kuh tsü michangnü mütahkhang, abi jiyünung.

¹⁵Ta hütsü tahpehkhang, abi kohshanung; ta apulü michang lanü tsichehcho kyo khümchonung.

¹⁶Ajüje nührü Tsingrangba kuh-epü nührünü müdhele ko Tsingrangba nbü nührü chah lire!

¹⁷Hütsünü, khürünü Tsingrangba amübükuh thsangnyangkhang, Tsingrangbanü abi thsangnyangjünung. Tunüo Tsingrangba amübükuh amüsa lile, ko nührü tsü abi amübükuh lile.

¹⁸Abürü jangjang tüthsüyohchü. Nührü yola khürünü hiba limih lümlongnü abi lümzehlepü lümkhang, ta apisa kangnung nengdang amüsithsa kangbae.

¹⁹Tunüo hiba limih lümlong tsü Tsingrangba jingte amüsithsa lile. Amüsa yunü yocho kyo, “Tsingrangbanü asithsa abürü athsehthsa la xohsohre;”

²⁰adesü amüsa yunü yore, “Asithsarü lümlong tsü amii mülepü Abüdongbanü müdhele.”

²¹Hütsünü, nyitsarünü tu nguchichehnung hütsü nengdang sünüsü tümüthseh. Tunüo lüpcho nührü yo lile:

²²Paul, Apollos, ko Peter; hiba limih, akang ko asü, ade liba ko aronung, hiri apüm nührü yo lile,

²³ko nührü Khrista yo, ko Khrista Tsingrangba yo lile.