Read Sangtam Naga 1 KORINTRÜ 4 Bible Online

1 KORINTRÜ 4 - Sangtam Naga bible

1 KORINTRÜ 4

¹Ihrü Khrista dikehrüti sürü chah Tsingrangba arangyu khehthsithsanung nyümkehjüchoepü nührünü lüm.

²Dikehrü khüdu tsü longlangchehba thsanung athsütah.

³Nührünü mahkhang nyitsarü yukharü nüsü thsanye Ih nyüm yukhaba hilü Ihnü tu khichi müle; Ihnü Ipu nengdang mii yumükhare.

⁴I lümlong müsa lile, ta hütsünü Ih achomükeh pü yuzi müjüre. I yukhaba tsü Abüdongba lile.

⁵Hütsüeko akyang müchie nührünü sü yu tükha. Abüdongba mürodelü achangka yukhaba tsü ying; abinü amarürah la rang yohpücho atsingse la hirojünung, ko nyitsarü lasih la lümcho mishajünung. Hütsüpü nyitsarü müipi Tsingrangba chahnü palu aleng anengse ngunung.

⁶Jünirüti, nührü khyanglangnü nührünü choyoh yu “Athsalang yuzengti khyüchoung” pü yoba hi nyichonung shulüm Apollos ihjü adüzü bichi nührü te ngusohre. Nührü sünüsü nyüh khüdu sepü aparü khüdu tümükhimüngu.

⁷Sünü nüh aparü tenü adiu kangsohcho? Nü licho apüm tsü Tsingrangbanü müjücho do? Akhang, nührü liba tsü jiyü khüdu roh-i mülümpü tuepü müthsehro?

⁸Nührü thsütah lüpcho kükyüko ang? Nührü alirü kangpehko ang? Ihrü müzehpü nührü yangthsarü kangpehko ang? Ihrüsü nührü yola yangthsathsanung thsa yuje yangthsarü thsaangtü.

⁹Riwürüti ko amüi tsurü bete misha asünung mülangjüba nyitsarüti kyo, Tsingrangbanü achangkaba riwürüti ihrü kangsohchoepü Ihnü lümre.

¹⁰Khrista khyanglangnü ihrü amüsithsarü lile; ta Khrista la nührü asithsarü. Ihrü suh müzeh, ta nührü rezeh lile. Ihrü müthsamünyücho, ta nührü dhichiko!

¹¹Ade yingcheh ihrü yangxore; ihrü tbhüdeng, khingchiko ko alichah müle;

¹²Ihrünü ihrübürü khehnü khee nguchire. Chokehcholade ihrünü müwajüre; dhsümthsede rangchore;

¹³nyüpmüsehde ihrünü yu atsanü lalingre. Limih sehnyeh tenü ihrü tu pa mah; ade mii ihrü alimih wohpehmedhirü lile!

¹⁴Nührü shahsohnung nengdang mah, ta Ipu tsurü te roh-i thülanung Ihnü hi thrahre.

¹⁵Tunüo Khrista la nührü atrorü mükhilong linye, nührü Aulü khüdu du. Tunüo Yusi atsa khu Jisu Khrista la Ih nührü Au kangko.

¹⁶Hütsünü I saying dhengchorü kang pü Ihnü nührü te kihchire.

¹⁷Hütsünü Khrista la Ipunü müiba ko longlangchehba tsurü Timoti, nührü yang rosohre. Khrista la I nguchiti ko lithroti la Ihnü tu doro, hütsüri apüm abinü nührü te yonung.

¹⁸Ih nührü xodhengnung müronungthsaepü lümnü nührü yola khürünü müthsehre.

¹⁹Ta Abüdongbanü lümkhang Ih nührü yang zah ronung, ko hütsüde arühnü choba yu tsü mah, ta tunü arüh müthsehsohro, hütsü zii tsü rangchehnung.

²⁰Tunüo Tsingrangba yanglih tsü yu la mah ta zii la lile.

²¹Nührünü khüiba khyünyüro? Ih nührü xüpnung ja bipü ronung a mahkhang amüi ko aküna nbü la ronung?