Read Sangtam Naga 1 KORINTRÜ 5 Bible Online

1 KORINTRÜ 5 - Sangtam Naga bible

1 KORINTRÜ 5

¹Nührü yola nahtrahnaxeng khüi müyudsirünü mii zongro, hütsü lilepü yuzi roko. Nyüh khüdunü atpa-thsatpü te mii yüprepü I te yoko!

²Akhang, nührü khütapü müthsehro? Hütsü mahpü, nührünü wahnungbae, ko hitari nguchirülü nührü yolanü iipehng.

³Shutsa la Ih nührü tenü za linye, anbü la Ih nührü yola zehle; Ihnü hütsüba adrünung nguchiba nyitsarü tsü Ihsa Abüdongba Jisu Khrista nengla yukhapehko.

⁴Nührü shibülungde, Ihsa Abüdongba Jisu zii la I nbü nührü yola zehnü,

⁵Abüdongba Nyümong anbü khümchonungthsa, hütsüba nyitsarü tsü Satan khehla jüng.

⁶Müthsehnung nührü nengdang athsalang mah! “Bhüpza azikyahnü phüprah apüm jibümsohrepü nührünü mümüdherü do?”

⁷Nührü müsa kangnung nengdang nührünü ahi bhüpza amünyi tsü pehng, tunüo nührü bhüpza müyohcho lile. Tunüo Khrista, Ihsa Phungkhu Sanza kangmübü jüko.

⁸Hütsüeko, ahi amünyi bhüpza ko akhürahnü mah, ta bhüpzamüzehpü, yuje ko amüsa hümthsenü Phungkhu Thsüti Ihsanü mungnung.

⁹Ihnü thrahba vathrah la tsü nührünü nahtrahnaxengrü te tümükhong pü Ihnü yoko.

¹⁰Hütsü, müyudsirü sürü nahtrahnaxengrü, müruthsarü, aführü mahkhang kyothri mübürü nengdang yochoba mah. Arüh mürinung tsülü limih tenü khüdupinü zanungbadue.

¹¹Ta Ihnü yoba tsü, nyüh khüdunü ajünirüepü nahtrahnaxeng, müruthsa, kyothri mübo, müthsamünyo, mücha mahkhang aführü hitari nengdang lile. Hütsütari telü tsuyongnung mii müshüm tüpüm.

¹²Aparü yu khanung Ih tu müdhsüdah. Tsingrangbanü arüh yu khanung. Ta Lithro la khiyoh khüdu yu nührünü mükhanung do?

¹³Amüsa yunü yore, “Nührü mülung lanü amünyi nyitsarü tsü pehng.”