Read Sangtam Naga 2 KORINTRÜ 1 Bible Online

2 KORINTRÜ 1 - Sangtam Naga bible

2 KORINTRÜ 1

¹Paul, Tsingrangba lümcho la Jisu Khrista riwürü khüdu ko Ihsa jünirü Timoti chahnü. Korint la liba Tsingrangba Lithro ko Akaia apümlang liba amüsarüti yang.

²Ihsa Au Tsingrang ko Abüdongba Jisu Khristanü nührü yang achomang ko atbachi thsaang.

³Ihsa Abüdongba Jisu Khrista Au Tsingrang ko Yanglilümba Au, apüm trobong Tsingrang neng Ihsanü senung!

⁴Ihrünü Tsingrangba chahnü tu ngucho, hütsü khunü aparü chongcha lirüti trochehnung nengdang abinü Ihsa chongcha apüm la trore.

⁵Ihrünü Khrista chongcha adrong la changtacho kyo, Khrista khu Tsingrangba arüku la ihrünü changtare.

⁶Ihrü chongchakhang, hütsü nührü atroba ko akangcheh nengdang lile; ihrü trokhang, ihrünü rangchoba chongcha la tsü nührü nüsü rangchochehnungthsa re jünung.

⁷Hütsünü nührü chah ihrü alongdi khodesü müshüchi; nührünü ihrü chongcha la trotade ihrünü khyüchoba atrotaba la changtare.

⁸Jünirüti, Asia la ihrü chah tikehcho chongcha tsü nührü khyang mümüdhepü mülisohnyüre. Ihrü chah bhamüling tsü dira ko mülingrachonü ihrü akang mii alongdi müli kangpehcho.

⁹Ihrü süsohnung rungnümkopü ihrünü lümcho. Ta hi tikehba tsü ihrübürü chah mah, ta Tsingrangba sünü asürü kanglisohro, abi chah dümpisohnung licho.

¹⁰Hütsütoh-i asü dhsürü lanü abinü Ihsa khümchehcho ko khümchonung; ko abinü adesü nührü dangkhidangnang khu ihrü khümchonungepü abi chah ihrünü longdire.

¹¹Ko hütsüta ihrü nengdang khütangonü dangkhidangnangba tsü lalingnü Tsingrangbanü ihrü müwajünung; ko ihrü nengdang adrongnü abi neng senung.

¹²Tunüo, shutsa lümlong la mah, ta Tsingrangba achomangnü hiba lih la ihrü akang, alathsa nührü te ihrü achingkehta amüsa ko yuje la licho müdhenü mülahre.

¹³Nührünü khichehnung ko nyichehnung du ihrünü thrahre.

¹⁴Ta ade nührünü ihrü achangsho du nyicheh nye, Abüdongba Jisu Nyümong la nührü shulümnü ihrü mülahnungthsa, nührünü ihrü ajeng nyichehnung Ihnü longdire.

¹⁵Ihnü longi tsüpchonü nührü anyüshi müwajünung shulüm nührü akhu xodhengnung lümcho.

¹⁶Ih Macedonia lang wüde ko nüplide nührü xodhengnyüre, tunüo Ih Judea lang wünung nührü chahnü arüku khyünyüre.

¹⁷Hita chungchonü I lüm müzi pü lümrü mah-o? Ihnü müruthsa masü te “Heho thsa” chungrü do?

¹⁸Tsingrangbanü yuje chocho kyo, nührü te Ih anyengchoba tsü “Ho ko Mah” hütsü mah.

¹⁹Tunüo Tsingrangba Tsurü, Jisu Khrista, sü nührü yola Silas, Timoti ko Ipunü thsingyucho abi “Ho ko Mah”, ta abi lede “ho” lile;

²⁰tunüo Tsingrangba anyengchocho apüm la abi tsü “Ho” tsü lile. Hütsünü Jisu Khrista Ihsa “Amen” tsü Tsingrangba ahechi lile.

²¹Ta Tsingrangbanü Jisu Khrista la nührü te müjang ihrüsü külüpcho; ko pathsa yohpücho,

²²abinü amüdhethsa shingkehjücho, ko ihrü lasih la yuzi thsanung Anbü Amüsa jücho.

²³Tsingrangba tsü I yuzi lile, abinü I lasih müdhele! Ih Korint lang müronung dhrongchehba tsü nührü khümchonung nengdang licho.

²⁴Ihrünü nührü yudsi nengdang khingrü mah; nührü yudsi la drengdreng yalepü ihrünü müdhele. Ta nührübürü akünyang nengdang nührü yola ihrünü nguchire.