Read Sangtam Naga 2 KORINTRÜ 12 Bible Online

2 KORINTRÜ 12 - Sangtam Naga bible

2 KORINTRÜ 12

¹Tu müjingcho nye, Ih müthsehnungbae. Ta Abüdongbanü I te müngucheh ko mishacho nengdang Ihnü ade chonung.

²Kang dhüre-müyü tsiko, khristan nyüh khüdu amungthriba ninglang nükeh tsicho Ihnü müdhele (Hütsü tsalang a müngucheh khüdunang Ihnü mümüdhe.Tsingrangba dunü müdhele).

³Hütsüba nyitsarü tsü paradise la nükeh tsicho (adesü hütsü tsalang a müngucheh khüdunang Ihnü mümüdhe. Tsingrangba dunü müdhele).

⁴ko hütsüla nyitsarü benü müyochehba, ko müchochehba yu abinü yuchicho.

⁵Hütsünü, hiba nyitsarü nengla Ihnü kükhingnung, ta Ih khütoh-i suh müzehro, hütsü chah khu Ipu nengdanglü Ihnü mükükhingnung.

⁶Ih kükhingnyükhang, Ih amüsithsa mükangnung, tunüo Ihnü yuje du chonung. Ta Ihnü mükükhingnung, tunüo I chahnü ngucho ko nyisicho khu sükhyangsü I nengdang alaa mülümsohnung.

⁷Ihnü ngucho anyemüyangnungti khu Ih alaa mümüthsehnung nengdang, I khyang shutsa la zeng khüdu jücho, hütsünü satan riwürü khüdu kyo, I chah xüpnung, ko müthsehnung lanü ranglinung.

⁸Hiba hi I chahnü khyümüinung shulüm Abüdongba te Ihnü asangpili kihchicho.

⁹Ta abinü yocho: “I achomang nü nengdang akükyüh, nü suh müzehde I zii re azehba lile.” I chah Khrista zii tsungtiba müdhenung nengdang, I suh müzeh shulüm müthsehnung tsü Ih alaa akünyangbae.

¹⁰Hütsünü Khrista khyanglangnü suhmüzeh, müthsamünyü, bhamüling, athsümthse ko athsangthsi la Ihnü longsüre. Tunüo Ih khode suh müzehnang, hütsüde Ih suhzeh kangre.

¹¹Ih amüsithsarü khüdu kangko, ta hütsü nührünü kangsohcho. Ih senungba tsü nührü du thsacho. Tunüo Ih tu mahnye, nührü yo “riwürüti” tenülü tulasü Ih apohkiba mah.

¹²Ih riwürü khüduepü yuzi tsü, nührü yola rangcho nguchiba thsayahiya ko anyemüyangnung nguchiba tsü lile.

¹³Thsi arüku thsütah nengdang nührü long mümüzicho chah khu Ihnü aparü Lithro tenü tula nührü mütsa bichicho? Hütsüta müphishu bichicho nengdang I khyang mülang pehjüng!

¹⁴Ade hinü asangpiu Ih nührü xodhengnung ronung rungnüm lile, ko Ihnü nührü te tu müchingnung. Ihnü thsi mah, ta nührübürü khyünyüre. Tunüo, atsurünü tpurü khyang chixinung mah, ta tpurünü tsuzarüti khyang chixibae.

¹⁵Nührü nengdang Ihnü I licho apüm, ko Ipu mii pehnung künyang lile. Ihnü nührü hidoi müicho ngang nührünü Ih thri du müinung do?

¹⁶Ta nührü nengdang Ih tsü bhamüling khüdu müthsachoepü nührünü müdhele. Ta khürünülü Ih arahmütsa, ko arahkheh cho nührü kihyochüchoepü young.

¹⁷Ihnü nührü yang müthehcho yusi hirü khüdusü nührü chahnü ajingcho khyücho do?

¹⁸Ihnü Titas te wüngpü kihchicho, ko aparü jünirü khüdu abi yola rosohcho. Titasnü nührü chahnü lango khyücho do? Ihjüding nahdhengkeh khüdu lümlong la münguchicho do?

¹⁹Kümüdeo, nührü bete bekhyah ayung ihrünü ihrübürü alanglang du nguchichoepü lümnung kohle. Mah! Jünirüti, Tsingrangba jingte ihrünü nguchicho apüm nührü tronung nguchicho, ko Khristanü tu chosohnyücho hütsü du chocho.

²⁰Ih rode Ihnü longdicho roh-i mükyopü nührü linung ko nührünü longdicho roh-i Ih mükyopü shirünung lümxüre. Nührü yola yübüta ko nahmoh, zichüro ko abürü nengdang du lümba, müthsamünyü, ko bürü mütsa choba, amüthseh, ko mükehta linung Ihnü lümxüre.

²¹Hiko, Ih nührü yang rode, I Tsingrangnü nührü bete Ih ashah khyüsohnung lümxüre, ko atsicho la amünyi khütang shitpahcho nengdang, ko arühnü nguchiba amümüsa nguchiti mükhyahmürah ko nahtrahnaxeng nengdang lasih müthsamülachonü Ih dee longrinungepü lümxüre.