Read Sangtam Naga 2 KORINTRÜ 4 Bible Online

2 KORINTRÜ 4 - Sangtam Naga bible

2 KORINTRÜ 4

¹Tsingrangbanü abi achomang la nguchi hi nguchinung jüchonü ihrünü suh müzahre.

²Ihrünü rang liba ko ashah apüm pehre; Ihrünü akhürahnü tu münguchire, mahkhang ihrünü Tsingrangba yu arahkheh mükangjüre. Ihrünü Tsingrangba jingte yuje ko atümungnü khyüchochehnungthsa lire.

³Tunüo ihrünü thsingyuba Yuse Atsa tsü rang likhang, hütsü chang tsiyaba nyitsarü te du rang lire.

⁴Arüh shulümlü hiba limih tsingrangnü müyudsirü khyang Khristarü ahechi yuse atsa, sü Tsingrangba kyocho, arühnü atsingse müngusohnung shulüm arüh nahtohsohko.

⁵Tunüo ihrünü abürü nengdang thsingyurü mah; ta Jisu Khrista tsü Abüdongbaepü ihrünü Jisu khyanglangnü nührü dikehrüepü thsingyure.

⁶Tsingrangba sünü, “Ama lanü atsingse vieng!” pü yoba apu tsünü Khrista romih chah Tsingrangba ahechi tehkehba tsü müdhesohnung Ihsa lasih la apu atsingse hekehsohcho.

⁷Ta ihrü sürü hiba anbü kuthsi liro, amichahba zii tsü ihrü chahnü mah, ta Tsingrangba chahnü lilepü ngusohnung ihrü tsü alih füh kyo lile.

⁸Adrongpi ihrü chongchako, ta müchangsoh; lümküchako, ta suhmüzahsoh;

⁹dhsümthseko ta müthrüchahchübeh; xüpnahko ta müsüsoh.

¹⁰Abi akang ihrü fü la ngunung nengdang Jisu sücho tsü lede ihrü asüba fü la hire.

¹¹Ihrü asüba fü la abi ngusohnung nengdang Jisu khyanglangnü

¹²ihrü akang ayung asübanü nguchire, ta nührü chah akangnü nguchire.

¹³Amüsa yunü yore, “Ihnü yudsichonü chore.” Hütsüba yudsi anbü la tsü ihrünü chore tunüo ihrünü yudsire.

¹⁴Tsingrangba sünü Abüdongba Jisu kanglisohcho, abinü ihrüsü Jisu te kanglisohnung, ko abi jingte nührü yola nowünungepü ihrünü müdhele.

¹⁵Hi apüm nührü khyanglangnü lile; ko Tsingrangba achomangnü nyitsarü alaa alaa chihde, arühnü alaa anengse jüba dangkhidangnangnü Tsingrangba hechi jünung.

¹⁶Hütsü ngangnü ihrünü khodesü suhzah müle. Ihrü shutsa akang hi chang tsinye, ihrü anbü akanglü nyümong mükhu asi kangre.

¹⁷Ihrünü azikyah ko amüshu chongchacho hi tenü alaa müchangkaba ahechi hironung.

¹⁸Tunüo ihrünü anguba chah müdhengre, ta amünguba chah dhengre. Tu nguro hütsü azachah du lire, ta tu münguro hütsü müchangkapü lire.