Read Sangtam Naga 2 KORINTRÜ 6 Bible Online

2 KORINTRÜ 6 - Sangtam Naga bible

2 KORINTRÜ 6

¹Tsingrangba te müjang nguchinü, nührü sürünü Tsingrangba achomang khyüchocho, hütsü amükang tükangsoh pü ihrünü kihchire.

²Tsingrangbanü yore: “Ih nührünü thsütah shikhe la, Ihnü nührü te nyiko; Nührü khümchonung nyümong la, Ihnü nührü troko.” Dheng! ade akhyüchochehnung shikhe; Dheng! chünye akhümchonung nyümong!

³Ihrü nguchi la sü khyangsü amüthsalang müdhengchehsohnyüre, hütsünü süsü mümüthikehsohnung ihrünü müküpre.

⁴Hütsü mülih, chongcha, bhamüling, ko athsangthsi hiri rangchochonü lüpcho la ihrü Tsingrangba dikehrü kyo ngusohnung müküpre.

⁵Ihrü lahcho, rangyohcho, ko becho; alaa nguchisohcho ko müyüpmüsüsoh mahkhang mütsumüyongsohcho.

⁶Ihrünü Tsingrangba dikehrü roh-i amüsa, lümlong, arangcho, ko achomang, Anbü Amüsa la ihrü yuje amüi,

⁷yuje choba, ko Tsingrangba zii khu ihrünü ngusohcho. Amüsaba tsü ihrü nengdang tsalang ko fülilang tsungtising thsunohrü lile.

⁸Ihrü dhichicho ko sehticho; ihrü nyüpmüsehcho ko nengsecho. Ihrü arahkhehrü kangsohcho, ta ihrünü yuje chore;

⁹mümüdherü roh-i, ta atümungnü ihrü müdhecho; ihrü asücho roh-i thsacho, ta dheng, ihrü akang lile. Khingchinye, ihrü mümapseh;

¹⁰wahrü roh-i, ta ihrü lede künyang lile; iilümrü roh-i, ta ihrünü adrong alirü kangsohre; tu mülirü roh-i, ta ihrü lüpcho lile.

¹¹Korint la Jünirüti! Nührü te ihrünü khohcheh chore; nührü te ihrü lasih müza khangthru lile.

¹²Nührü te ihrü lasih müngurü mah; ta nührü lasih ihrü te khangtire.

¹³Ade, nührü te I tsurü roh-i chotare: Ihrünü nührü te tsacho kyo nührünüsü ihrü te tsaang. Nührü lasih khangthrung.

¹⁴Müyudsirü te tütrümta. Tunüo amüsa e amünyi nyüh tu la phishutachehnung? Atsingse e ama nyüh tu la müjangnung?

¹⁵Khrista e Motsing nyüh tu la kehtachehnung? Müyudsirü te yudsirü tu nohlüm liro?

¹⁶Müyutsirünü kyothri te Tsingrangba amübükuh tu la kihtachehnung? Tunüo Ihsa akang Tsingrangba amübükuh lile! Tsingrangbanü yocho roh-i: “Ih arüh yola linung ko tsehchinung, Ih arüh Tsingrang thsanung, ko arüh I müyurü thsanung!”

¹⁷Hütsünü Abüdongbanü yore, “Nührünü arüh pehjüng, ko nührü jangjang arüh tenü zang. Ko amümüsa tu tüthahchi; khang Ihnü nührü khyüchonung.

¹⁸Ih nührü Au kangnung, ko nührü I tsurü ko tsularüti kangnung Akohba Abüdongbanü yore.”