Read Sangtam Naga GALATIARÜ 1 Bible Online

GALATIARÜ 1 - Sangtam Naga bible

GALATIARÜ 1

¹Nyitsarü chahnü mah, mahkhang nyitsarü khunü mah, ta asücho lanü kanglisohba Jisu Khrista ko Au Tsingrang khu dsiba riwürü Paul chahnü.

²Hila I te liba ajünirü atümungnü Galatia la liba Lithroti te salüm müdhesohre:

³Ihsa Au Tsingrang ko Abüdongba Jisu Khrista chahnü nührü yanglang achomang ko atbachi thsaang.

⁴Hiba amünyi shang lanü Ihsa khyang nyüje jünung nengdang, Ihsa Au Tsingrang lümcho la, Khristanü Ihsa münyi ngang apu jangjang jücho.

⁵Tsingrangba te müchangkapü ahechi thsaang! Amen.

⁶Hidoi züzah Khrista sünü apu achomang la nührü dsicho, abi thrüchahchüpehpü lang pa yuse atsa khyücho tsicho ngu Ih nyemüyangre.

⁷Yujenülü, “Apa yuse atsa,” tu müle, ta Ihnü hi yoba tsü nyitsarü khürünü nührü longmüzijo Khrista Yuse tsü thsamülajünung müküpre.

⁸Ta adelü ihrünü nührü te thsingyuba Yuse chah khu, ihrünü thsanye mahkhang ninglang riwürü khüdunü thsanye apa yuse atsa thsingyukhang, abi chokehchola thsaang!

⁹Ihrünü amüngusü yoko, ko Ihnü ade thali yore: nührünü khyüchoba Yuse tenü apa nührü te thsingyukhang, abi chokehchola thsaang!

¹⁰Nyitsarünü hosohnung Ihnü chorü mah-o? Khodesü mah! Tsingrangbanü hosohnyüre! Ih nyitsarü yola nengse yangchirü mah-o? Ihnü hütsü roh-i thsanung müküpkhang, Ih Khrista yurü khüdu mah!

¹¹Jünirüti, Ihnü thsingyuba yuse tsü nyitsarü chahnü mah.

¹²Ihnü süchah nüsü hütsü mükhyücho, mahkhang sünüsü I te hütsü müdo. Jisu Khrista apunü hütsü I te mishacho.

¹³Ih akhulang Jihudarü yangthsala khüroh-i akang licho, ko khüroh-i Ihnü achomang mükehpü Tsingrangba Lithro changjünung dhsümthsecho, hütsü nührünü yuchiko.

¹⁴I longde shangrü atümung tenü Jihudarü yangthsa la Ih ashunü amüngu thsacho, ko jümü yangthsa la khütang alaa khakhuchüjücho.

¹⁵Ta Ih müsurodenü Tsingrangbanü abi achomang la Ih throchehcho ko abi dikehnung Ih dsicho.

¹⁶Ihnü yangpirü te abi nengdang yuse Atsa thsingyusohnung nengdang abinü I te Atsudhre mishanung dhrongchehde, Ihnü sü yanglangsü tsingdhengnung müwü,

¹⁷mahkhang I müngu riwürüti te shirütanung Jerusalem langsü müwü. Ta Ihnü Arabia lang wücho ko hütsü lanü Damaskas lang rocho.

¹⁸Kang asang lipü Peter te shirütanung Jerusalem lang wücho, ko hütsü la abi yola nyükhih anyüh mungcho.

¹⁹Ihnü Abüdongba nirü Jakob chah khu riwürü süsü müshirü.

²⁰Ihnü tu thrahro hütsü arahkheh mah, ta yuje-epü Tsingrangbanü müdhele!

²¹Hütsüpü Ihnü Syria ko Cilicia lang wücho.

²²Hütsü shikhe la Judea lih la lithrotinü Ih dee tsa mütsüp-pü licho.

²³Aparünü hita yocho du Ihnü arüh müdhecho: “Ihsa dhsümthseba nyitsarü sülü abinü changsohnung müküpba Yudsi nengdang thsingyule!”

²⁴Hütsüta I khyanglangnü arühnü Tsingrangba neng secho.