Read Sangtam Naga GALATIARÜ 3 Bible Online

GALATIARÜ 3 - Sangtam Naga bible

GALATIARÜ 3

¹Nührü amüsithsa Galatiarü! Sünü nührü yümsohcho? Nührü nahtse te Jisu Khrista khala chah khüta sücho hütsü tsitsa lile!

²Hi I te young: Nührünü Tsingrangba Anbü tsü Yuzeng bichichonü a mahkhang Yuse atsa yuchipü yudsichonü khyüchocho?

³Nührü khütapü hidoi müsithsacho? Nührü Tsingrangba Anbü la dikehcho; ade nührü abürü zii la changkanyürü mah-o?

⁴Nührü chah tikeh khu rocho apüm tsü adeng kangcho do? Hütsü langolü linung!

⁵Tsingrangbanü Anbü jüpü nührü yola thsayahiya nguchiba tsü yuzeng bichichonü a mahkhang yuse yuchipü yudsichonüo?

⁶Amüsa yunü yocho roh-i, “Abrahamnü Tsingrangba chah yudsicho, ko abi yudsi khu Tsingrangbanü amüsa kang khichicho.”

⁷Hütsünü, sürü yudsi liro arüh Abraham chahnü trahchochoepü müdheing.

⁸Yangpirü tsü yudsi khu Tsingrangbanü langjünungepü amüsa yu khu münguchehre. Hita amüsa yunü Yuse tsü Abraham te müdhesohcho: “Tsingrangbanü nüh khu amüi tsurü atümung müwajünung.”

⁹Abrahamnü yudsicho ko müwajücho; hütsünü abi kyo sürünü yudsiro atümung müwajüre.

¹⁰Yuzeng bichicho chah sürü longlang liro arüh chokehchola pohki lire. Tunüo amüsa yunü yore, “Sünü yuzeng vakha la thrah licho apüm lede bichinang abi chokehchola pohki lile!”

¹¹Yuzeng bichichonü Tsingrangba jingte süsü alanglang mükangrepü adelü tsitsako, tunüo amüsa yunü yore, “Yudsi khu amüsarü akang linung.”

¹²Ta Yuzeng tsü yudsi te tu nohlüm müle, tunüo “Sünü yuzeng bichiro hütsünü abi akang linung.”

¹³Ta Khristanü Ihsa nengdang chokehchola kangchonü, yuzengnü hiroba chokehchola lanü Ihsa lihchehko; tunüo amüsa yunü yore, “Sü sing chah tbengro abi chokehchola pohki lile.”

¹⁴Tsingrangbanü Abraham te nyengchocho amüwa tsü Khrista Jisu khu yangpirü khyang jünung nengdang, ko Tsingrangbanü nyengchocho Anbü tsü Ihsanü yudsi khu khyüchonung nengdang Khristanü hi nguchicho.

¹⁵Jünirüti, Ihnü atikehcho adüzü khüdu bichire: Khode nyüh anyüh khiyu khüdu nengdang nyengchota thrahtanang, sünüsü hütsü thsangnyangnung mahkhang tusü lahkehnung mükoh.

¹⁶Ade, anyengchoba tsü Tsingrangbanü Abraham ko abi “Amüsa tsünü majüh adrong te nyengchocho. Majüh adrong adüzü nyitsarü adrong nengdang mübichi, ta majüh khüdu adüzü nyüh khüdu, hütsü Khrista.”

¹⁷Ihnü yonyüba tsü Tsingrangbanü Abraham te azengchotaba khüdu külüpcho ko hütsü yohpünung nyengchocho. Yuzeng khüi kang thsih müyüpü sangre lipü khanglang jücho, hütsünü ade azengchotacho tsü thsangnyangnung mahkhang Tsingrangba anyengchocho tsü adeng kangsohnung mükoh.

¹⁸Tunüo Tsingrangba sihmüngu tsü yuzengnü thsakhang, hütsü abi anyengchochonü mah. Ta, hütsü Tsingrangbanü nyengchochonü abinü Abraham khyang hiba sihmüngu tsü jücho.

¹⁹Khang, Yuzeng tsü tu thsanung? Hiba tsü amüthsalang nguchicho tsü ngusohnung, ko Abraham majüh, süte anyengchoba tsü külüpcho, abi ro yingcheh lisohnung nengdang lahkehcho. Yuzeng tsü ninglang riwürü khüdunü akah la züduba nyitsarü khüdu khu jücho.

²⁰Akah la züduba adüzü tsü nyüh khüdu tenü alaa; ta Tsingrangba tsü khüdu.

²¹Hi adüzü yuzeng tsünü Tsingrangba anyengchocho nyümrü mah-o? Khodesü mah! Tunüo amüi tsurünü akang jüchehba yuzeng khüdu khyüchore langlü, hütsü bichichonü nyitsarü müipi Tsingrangba jingte müsa liba thsako.

²²Ta amüsa yunü yochonü liküprü amünyi zii pohki lile; ko sihmüngu khüi yudsi khu nyengcho liro, hütsü yudsirü khyang jüko.

²³Ta yudsinung shikhe müroede, ronung liba yudsi tsü mümisha yingcheh yuzengnü Ihsa arangyohrü kangnü khangtipücho.

²⁴Hütsünü Ihsa yudsi khu Tsingrangba te langsohnung nengdang, Khrista ro yingcheh Yuzeng tsü Ihsa axükümrü thsacho.

²⁵Ta adelü yudsinung shikhe rochonü, Ihsa yuzeng axükümba pohki müle.

²⁶Khrista Jisu chah yudsi cho khu nührü atümung Tsingrangba tsurüti kangko.

²⁷Nührü khüdoi Khrista la bapticho, Khrista apu kyo kangko.

²⁸Hütsünü, Jihudarü ko yangpirü, ayurü ko nyüje, khingkurü ko adhrerü tu papa müle, nührü atümung Jisu Khrista la khüdu du.

²⁹Nührü Khrista yo thsakhang, nührü Abraham majüh, ko Tsingrangbanü tu nyengchocho hütsü ngunung.