Read Sangtam Naga GALATIARÜ 6 Bible Online

GALATIARÜ 6 - Sangtam Naga bible

GALATIARÜ 6

¹Jünirüti, khürünü amülanglang nguchicho rangchehkhang, nührü anbü libatinü athsalangnü müchungchijüng. Ko nührübürüsü müthsatsünungthsa müzahmükieng.

²Khüdunü khüdu bhamüling hijütacho khu Khrista yuzeng tsü tikehsohng.

³Nyüh khüdunü tulamüyohko khüli amülah müjang lümkhang, apu jangjang khürahyohchüre.

⁴Ta nyitsarü müipinü abürü saying thsatsodheng. Tsakhang, aparü khürü nguchicho te mükitapü, abürünü tu nguchichehcho, hütsü nengdang seing.

⁵Tunüo nyitsarü müipi palu bhamüling hibae.

⁶Nyitsarü süte khristan yusi do liro, abinü abi licho atsa tsü abi adorü te changtabae.

⁷Nührü jangjang tükhürahyohchü; sünüsü Tsingrangba tümükhimüngu. Sünü tu shunang hütsü du xanung.

⁸Abinü shutsa mükhyahmüru shukhang, hütsü lanü abinü asüba xanung; abinü Anbü shukhang, Anbü la tsünü abinü müchangkaba akang xanung.

⁹Hütsüeko Ihsanü atsa nguchinung mümüthohnung; tunüo Ihsanü suh müzahpü atsa nguchikhang, Ihsanü xanung akyang ronung.

¹⁰Hütsüeko, detingcho atümung la nyitsarü müipi te, alathsa Ihsa te müjang yudsirü te atsa nguching.

¹¹Thrahtse adidinü nührü te Ipu khehnü thrahba hi dheng!

¹²Nyitsarü sürünü nührü müjüp-pehsohnyüro, arüh tsü shutsa la müthsehmülarüti lile. Arühnü hütsü Khrista khala shulüm müdhsümthsesohnung jingjing du nguchire.

¹³Amüjüp-pehrünü mii yuzeng tsü mübichire; ta nührü shutsa la arüh müthsehmülanung nengdang nührü müjüp-pehsohnyüre.

¹⁴Ta Ihlü, khüta khüta nye Ihsa Abüdongba Jisu Khrista khala nengdang du müthsehnung; tunüo abi khala khu I chah limih tsü süko, ko limih te Ih süko.

¹⁵Tunüo asi kangcho chah khu, müjüp-pehcho ko mümüjüp-pehcho tu papa müle.

¹⁶Khüdoinü hiba yuzeng bichiro, arüh te ko Tsingrangba tsurü atümung te atbachi ko yanglilüm thsaang!

¹⁷Hikholü, sünüsü I khyang athsangthsi alaa tüjü, tunüo Ifü la kehba arah tsünü Ih Jisu yurüepü ngusohre.

¹⁸Ihsa Abüdongba Jisu Khrista achomang nührü atümung te lieng, jünirüti, Amen.