Read Sangtam Naga EFESIARÜ 6 Bible Online

EFESIARÜ 6 - Sangtam Naga bible

EFESIARÜ 6

¹Azarüti, palu tpurü te Abüdongba la yocho nyieng, tunüo hi athsalang.

²“Nührü müwajünung nengdang, ko limih la nüh kutsüp linung nengdang:”

³“Nüu ko nü tpa jengreng drüng, hiba yuzeng tsü anyengchocho kehba akhudiba yuzeng lile.”

⁴Tpurüti, nührü tsurü longmüsah zii tüchürosoh. Hütsü mülih, khristan saying ko athülaba la nümüsung.

⁵Ayurüti, nührü shutsa abüdongrüti te dro, dhridhri yocho nyieng; ko Khrista dikehrü roh-i müsi jonü dikehng.

⁶Arüh longlangsohnung arühnü ngude du mah; ta Khrista yurü khüdu kyo, Tsingrangbanü khyünyücho roh-i lümlong atümungnü nguching.

⁷Nyitsarü mah, ta Abüdongba dikehrepü müdhe, nührünü ayurü roh-i künyangsehnü nguching.

⁸Ayurü thsanye, nyüje thsanye, palunü nguchi atsa nguchicho ngang, Abüdongbanü nyitsarü müipi jiyünungepü müdheing.

⁹Abüdongrüti, hütsü roh-i nührünüsü arüh te nguching ko arüh khingchiba lanü tohlieng. Nüh ko nührü yurüti atümung ninglang liba Abüdongba, sünü tsah müdhengpü yukharo, abi yoepü lümchehng.

¹⁰Achangkathsa, Abüdongba la ko abi akohba zii la re zehng.

¹¹Nührünü Motsing akhürahyohchüba nyüm yachehnungthsa, Tsingrangba khata jengki apüm khyüng.

¹²Tunüo Ihsanü shutsa nyitsarü nyüm khatarü mah, ta ninglang akhürah anbü rorüh, yangthsarüti, taseti, ko hiba ama shang limih ziiti nyüm khatare.

¹³Hütsüeko ade Tsingrangba khata jengki khyüng! Hütsünü du, khode amütsaba nyümong tsü ronang, nührünü arorüh nyüm yachehnung; ko khatanyesü nührü khümkhüm yanung.

¹⁴Hütsüeko, yujenü nührü kih rüm, amüsabanü dreng hapm,

¹⁵ko yangtsa Yuse Atsa yonung nührü jingkhüm khyüpü rungnüm ying.

¹⁶Lede Yudsi tsü Tsung roh-i bieng; tunüo hütsünü motsingnü kyaaba michang tbüdeng tsü mehsohnung kohnung.

¹⁷Ko Anbünü jüba akangcheh tsü idhse kuthri roh-i, ko Tsingrangba yu tsü nohsheng roh-i khyüng.

¹⁸Hiri apüm tsü Tsingrangba atroba nengdang dangkhidangnang nguching. Anbünü nücho la lede dangkhidangnang. Hi nengdang lümkang ko khodesü tükhuchü; Tsingrangba nyitsarü atümung nengdang lede dangkhidangnangjüng.

¹⁹Ih yu chonung thsade, I khyang yusi jüchehnungthsa I nengdangsü dangkhidangnangjüng, hütsünü du Ihnü rezehnü cho Yuse Atsa arangyu tsü müdhesohnung.

²⁰Ih ade arangyoh la linye, hiba Yuse Atsa nengdang Ih langbürü lile. Yuse Atsa nengdang Ihnü khüi chonung liro, hütsü rezeh chochehnungthsa dangkhidangnangjüng.

²¹Ih khüta liro, hütsü nührünü müdhenung nengdang, amüi jünirü ko Abüdongba nguchi la longlangba dikehrü Tykikusnü I nengdang yusi apüm nührü te yonung.

²²Ihrü atümung khüta liro, ko nührü rezehsohnung nengdangnü, Ihnü abi nührü yanglang rosohre.

²³Au Tsingrang ko Abüdongba Jisu Khrista chahnü khristan jünirüti atümung khyang atbachi ko yudsi te amüi jüng.

²⁴Sürünü Ihsa Abüdongba Jisu Khrista müthrehpü müiro, arüh atümung te Tsingrangba achomang thsaang.