Read Sangtam Naga KOLOSIRÜ 1 Bible Online

KOLOSIRÜ 1 - Sangtam Naga bible

KOLOSIRÜ 1

¹Tsingrangbanü lümcho khu Khrista Jisu riwürü Paul, ko Ihsa jünirü Timoti nyüh chahnü.

²Kolosi la liba Khrista la Tsingrangba nyitsarü ko longlangchehba jünirüti yanglang: Ihsa Au Tsingrang chahnü nührü yanglang achomang ko atbachi thsaang.

³Ihrünü nührü nengdang dangkhidangnangde, Ihsa Abüdongba Jisu Khrista Au Tsingrang khyang ihrünü lede anengse jüre.

⁴Tunüo Jisu Khrista chah nührü yudsi ko Tsingrangba nyitsarüti atümung te nührü amüi nengdang ihrünü yuchiko.

⁵Khode yuje yusi, Yuse Atsa nührü yanglang akhudi rocho, hütsünü jüba alongdi nengdang nührünü yuchiko. Ninglang nührü nengdang zahkehpüba akangcheh khüi nührünü longdiro, hütsü nührü yudsi ko amüi chah kehle.

⁶Nührünü Tsingrangba achomang yuchiba ko müdheba nyümong lanü chünye yingcheh, yuse atsa tsünü amüwa mütozah hirojüre, ko limih apümlang sobhore.

⁷Ihrünü müiba müjang dikehrü Epafras, sü ihrü mülih longlangchehba Khrista dikehrü liro, abi khu Tsingrangba achomang nührünü yuchiko.

⁸Nührü anbü la amüi nengdang abinü ihrü te yoko.

⁹Hi khyanglangnü, nührü nengdang yuchi dunü ihrünü lede nührü nengdang dangkhidangnangjüre. Ihrünü Tsingrangba te Anbünü jüba lümlong ko anyichehba, ko abi lümcho amüdhenü jengjüngpü kihchijüre.

¹⁰Hütsütakhang, nührünü Abüdongbanü lümcho roh-i lichehnung, ko tunü abi künyangnung hütsü nührünü lede nguchinung. Nührü akangnü nguchi atsa adhangpi chürosohnung, ko Tsingrangba müdheba la nührü zinung.

¹¹Nührünü lüpcho la rangchochehnungthsa, abi ahechi zii lanü roba suh tsünü nührü rezehsohng.

¹²Tsingrangba sünü atsingse yanglih la apu nyitsarü khyang nohlüm yohpüjücho khyünung dekheng kangsohcho, abi khyang akünyangnü anengse jüng.

¹³Abinü ama zii lanü Ihsa khümchocho,

¹⁴ko sünü Ihsa lihcheh Ihsa münyiti mülang pehjüpü, apu amüiba tsurü yanglih yang Ihsa khümcho norocho.

¹⁵Khrista tsü amünguba Tsingrang thrizi lile. Abi tsü athricho apüm tenü aukhuba lile.

¹⁶Tunüo Tsingrangbanü ning ko alih la, nguba ko münguba kohroti, yangthsarü pümji thsanye mahkhang yanglihti thsanye, yangthsarüti mahkhang taseti lüpcho abi khu ko abi nengdang thricho. Tsingrangbanü ning alih atümung abi khu ko abi nengdang thricho.

¹⁷Lüpcho maedenü Khrista lijungcho, abi chah lüpcho rakeh lile.

¹⁸Apu fü, Lithro michah abi athah; ko abi tsü akang adikeh lile, abi tsü atsurü aukhuba, sü lüpcho la amichahba thsanung nengdang asücho lanü kangchehlisohcho.

¹⁹Tunüo Atsudhre chah Tsingrangba saying ajeng kehnung tsü apu lümcho thsacho.

²⁰Hütsünü Tsingrangbanü athrijungcho apüm khyülinung dhrongchehcho. Tsingrangbanü Atsurü khala chah sücho khu yangtsa külüpnü limih chah ko ninglang liba apüm apu yang thali hirocho.

²¹Shikhe khüdu nührü amünyi lüm nguchichonü Tsingrangba tenü ashu za abi münyehrü kang licho.

²²Ta ade, Atsudhre shutsa la süchonü, nührü abi te amüsa, amüthseng ko mülang mükeh kangsohnung nengdang, Tsingrangbanü nührü abi shangrü kangsohcho.

²³Ajüje, nührünü yudsi la drengdreng ko mümühachipü mütozah lieng, ko nührünü yuse atsa khunü nguba alongdi la tsünü nührübürü tüshümshümsoh. Hiba yuse atsa khüi liküprü te thsingyucho, hi nengdang Ih, Paul dikehrü khüdu kangcho.

²⁴Ade nührü nengdang Ih chongchacho shulüm künyangre, tunüo Ih shutsa chongchachonü Khristanü apu fü Lithro nengdang chongchaba tu nying liro, hütsü thümchehnung trore.

²⁵Ko Ih Lithro dikehrü thsanung Tsingrangbanü throcho, ko nührü tsasohnung nengdang hi nguchinung I khyang jücho.

²⁶Hütsü amüi tsurü atümung tenü khüi atsicho shang apüm la rang licho, ta ade apu nyitsarü te misha liba abi yuse ajeng sobhonung nguchi lile.

²⁷Tsingrangba lümchung tsü hiba bholo, ko thsidi arangyu khüi abi nyitsarü atümung nengdang liro, abi arangyu tsü apu nyitsarü te müdhesohnung Tsingrangba lümchung lile. Ko hiba arangyu tsü nührü chah Khrista lile, adüzü nührünü Tsingrangba ahechi la changtanung.

²⁸Hütsünü atümung te ihrünü Khrista thsingyure. Nyitsarü müipi Tsingrangba jingte Khrista la lümjing kang noronung nengdang akohcho lümlong apümnü ihrünü müzahsoh dore.

²⁹Hiba nguchi kohchehnung nengdang re khüi Khristanü jüro, ko khüi I chah ade nguchiro hütsüri bichi Ihnü müküp nguchire.