Read Sangtam Naga KOLOSIRÜ 2 Bible Online

KOLOSIRÜ 2 - Sangtam Naga bible

KOLOSIRÜ 2

¹Nührü ko Laodicea la lirüti, ko Ih müngudhengpü lirü atümung nengdang khütoh-i khee nguchicho hütsü nührü te yonung.

²Arüh suh zehcho amüi la shürütajo, ko hütsü khu alongdi ajeng khüinü yuje nyichehba hiroro, hütsü nguchisohnung nengdang Ihnü hi nguchire. Hütsüta arühnü Tsingrangba arangyu khüi Khrista apu liro, hütsü müdhenung.

³Tsingrangba lümlong ko amüdheba arangpücho kuthsi apüm khangthruba azihsing tsü abi lile.

⁴Hütsüeko Ihnü nührü te yore, khütoh-i tsarü roh-i nguh nye, arahkheh yunü sü khyangsü nührü tükiyohchüsoh.

⁵Tunüo Ih shutsa la nührü te mülinye, anbü la nührü yola zehle, ko Khrista chah nührü yudsi adrengdreng ngude Ih künyangre.

⁶Nührünü Abüdongba Jisu khyüchocho roh-i, abi te lieng.

⁷Nührü te docho kyo, nührü akang abi chah soh rakeh, nührü yudsi la alaa drengdreng kang. Nengse jübanü nührü jeng lieng.

⁸Amii müliba kihyochüba limih lümlong, khüi Khrista chahnü mahpü nyitsarü chahnü chomüchi, ko athrijungcho anbüti chahnü rocho, hütsürinü nührü ayurü mükangnung müzahng.

⁹Tunüo Khrista shutsa fü la Tsingrangba saying ajeng lire,

¹⁰ko nührü khyang abi te akang ajeng linung jüko. Yuzeng ko tase apüm michah abi Abüdongba.

¹¹Nyitsarünü külüpcho amüjüp-pehba la mah, ta shutsa amünyi zii lanü za liba Khristanü külüpcho müjüp-pehba la nührü müjüp-pehko.

¹²Tunüo khode nührü bapticho, Khrista te nührü dhrürangcho, ko asücho lanü kanglisohba Tsingrangba zii la nührü yudsi khu Khrista te baptiba la nührü kanglisohcho.

¹³Shikhe khüdu la nührü amünyi khu ko Yuzeng müliba müyudsirü thsachonü anbü la asücho licho. Ta ade Tsingrangbanü Khrista la akang kanglisohko. Tsingrangbanü Ihsa münyiti apüm mülang pehjüko;

¹⁴ko Ihsa nyüm yaba arahba yuzeng tsü, abinü nipehjo khala chah hamkeh hitsiko.

¹⁵Abinü ayingti ko ziiti kengchonü arüh michah akohba kang khala chah arüh tsü misha adüzü thsa ngusohko.

¹⁶Hütsünü nührünü tu tsuyongro mahkhang amüsa nyümong mahkhang choo asi thsüti mahkhang Sabath nyümong hiri nengdang sü khyangsü nührü yu tükhasoh.

¹⁷Hitari apüm tsü aronung anbükhüm due; yuje tsülü Khrista du.

¹⁸Pathsa münguchehba ko arahkheh longlümnü nguba ko riwürüti mübüba sürünü abürü jangjang amichahbaepü lümro, hitari khyang nührü tünyümsoh. Tu mahpü hitari nyitsarünü abi shutsa lümcho la tüpungtsungnü

¹⁹Khrista sü fü la athah liro, abi chah müyudsire. Afüpüm shünü shutsa ko aküküp nyüh chirüta Khristanü rahseh zisohre, ko Tsingrangbanü zisohnyücho roh-i hütsü zire.

²⁰Nührü Khrista te sücho ko limih athrijungcho anbü chahnü lehchehcho. Khang, tuepü nührü limih yo kyo liro? Tuepü yuzeng hitari,

²¹“Hi tübichi, hütsü tümüjangdheng, ko hütsü tüthahchi” pü yocho nyiro?

²²Hiri atümung khüdupi bichikhang akhyüchah müliba nengdang yore; hiri tsü nyitsarünü külüpcho yuzeng ko adobati lile.

²³Ajüje hiri yuzengti tsü khingnü riwürüti mübüsohba, arahkheh longlüm ngusohba, ko abürü fü tsehnahba lümlongnü külüpcho lile, ta shutsa rahsehnung la arüh tu amii müle.