Read Sangtam Naga KOLOSIRÜ 3 Bible Online

KOLOSIRÜ 3 - Sangtam Naga bible

KOLOSIRÜ 3

¹Nührü Khrista te kanglisohko, hütsüeko Tsingrangba tsalangthring pümba Khrista ninglang yanglih la liba kohro nengdang nührünü yangching.

²Alimih kohro la mah, ta ninglang liba kohroti chah lasih jüng.

³Tunüo nührü sücho, ko nührü akang Khrista te Tsingrangba la rangpüle.

⁴Nührü yuje akang tsü Khrista ko khode abi mishanang, hütsüde nührüsü abi te ahechi la mishanung!

⁵Hütsüeko nührü chah liba mükhyahmürah, adüzünü: nahtrahnaxeng, amümüsa, mükhyahba, amünyi müruba, ko müxümüngu (tunüo müxümüngu tsü kyothri mübüba khüdu lile), hiri nührünü mapsehng.

⁶Tunüo hütsütari khu ayocho münyirü michah Tsingrangba rihlong chürore.

⁷Khode nührü akang khüdupi hirinü yangthsathsa licho, nührüsü hütsüri saying la licho.

⁸Adelü nührünü hiri apüm pehjüng: zichüroba, rihlong chüroba, thrünyi lümba. Nührü be lanü nyüpmüseh mahkang ashah yu tüchürosoh.

⁹Khüdunü khüdu te arahkheh tücho, tunüo nührünü ahiba saying abi nguchi zeh pehjüko,

¹⁰ko asi saying tsü khyüko. Hiba akang asi tsü akülüprü Tsingrangbanü nührü apu ajeng müdhesohba la nünung nengdang apu kyocho la mütozah asi kangchijüre.

¹¹Hütsünü, adelü yangpirü ko Jihudarü, müjüp-pehrü ko mümüjüp-pehrü, ashüh nyitsarü, ko amümüdherü, ayurü ko nyüje nyitsarü kahla tu papa müle, ta Khrista tsü atümung la atümung.

¹²Nührü Tsingrangba nyitsarü lile; abinü nührü müicho ko nührü apu yo thsanung throchehcho. Hütsüeko nührünü dhsa lümba, amüi, azikyah kangba, alonglüm, ko arangcho hiri khüm.

¹³Khodederü nyüh khüdunü khüdu nyüm chorünang nührünü rangchota mülang pehjütaang. Abüdongbanü nührü khyang mülang pehjücho roh-i, nührü khüdunü khüdu mülang pehjütaang.

¹⁴Ko hiri atsa apüm chah amüi khüinü yujeba akehta la atümung rahrütajüro, hütsü lahkehng.

¹⁵Khristanü jüba atbachi tsü nührü adhrongcheh la trosohnung lile; tunüo hiba atbachi nengdang Tsingrangbanü nührü müjang füpüm khüdu la dsicho. Hütsüeko nengse jüng.

¹⁶Khrista yu tsü nührü lasih la thangchi lisohng. Lümlong apümnü nührü khüdu e khüdurü dotang ko thülatang. Nengsekhi, mübükhi ko amüsa khi thsaang; Tsingrangba khyang nührü lasih la anengse jo thsaang.

¹⁷Nührünü nguchicho ko yocho lüpcho, Abüdongba Jisu nengla abi khu Au Tsingrang khyang anengse jo nguching.

¹⁸Nitpürüti, nührü niirü pohki lieng, tunüo hütsü khristanti anguchinung.

¹⁹Niirüti, nührü nitpürü müing ko arüh mütsanü tübichi.

²⁰Azarüti, lüpcho la tpurü te yocho nyinung tsü khristan khüdu anguchinung, tunüo hütsünü Tsingrangba künyangsohre.

²¹Tpurüti, nührü tsurü zii tüchürosoh, mahkhang arüh suzahpehnung.

²²Kulirüti, lüpcho la nührünü limih la abüdongrü te yocho nyieng, nührü müisohnung arühnü ngude du mah; ta Abüdongba khyanglangnü müsijo nguching.

²³Nührünü tuturü nguchiro nyitsarü te mah, ta Abüdongba nengdang nguchirü kyo lümlong apümnü nguching.

²⁴Abüdongbanü abi nyitsarüti khyang yohpüjüba tsü nührü khyang jiyünungepü lümkehng. Tunüo nühnü dikehba Khrista tsü yujeba Abüdongba lile.

²⁵Tunüo amüthsalang nguchirü müipi palu nguchicho ngang nüpli jünung, tunüo Tsingrangbanü tsah müdhengpü nyitsarü müipi yukhare.