Read Sangtam Naga KOLOSIRÜ 4 Bible Online

KOLOSIRÜ 4 - Sangtam Naga bible

KOLOSIRÜ 4

¹Abüdongrüti, nührü yurü tsanü kang. Nührüsü ninglang Abüdongrü khüdu lilepü müdheing.

²Mütozah khükhah dangkhidangnang lieng, ko Tsingrangba khyang anengse jo dangkhidangnang te lümkang.

³Ko Tsingrangbanü Khrista nengdang arangyu, abi yuse thsingyunung bekhyah atsa jüchehnungthsa, ihrü shulümsü dangkhidangnangjüng. Tunüo hütsü nengdang Ih ade arangyoh la lile.

⁴Hütsüeko, Ihnü chonung liba tsü tsitsanü chochehnung nengdang dangkhidangnangjüng.

⁵Nührünü müyudsirü te nguchi te bekhyah atsa apüm sihthsa bichieng.

⁶Nührünü chocho apüm achomang ko amüsüp keh choung, ko nührünü atümung te khüta athsalangnü lalingnung hütsü müdheing.

⁷Abüdongba nguchi la müjang dikehrü ko longlangchehba nguchirü Ihsa jünirü Tykikusnü nührü te I yusi apüm müdhesohnung.

⁸Ihrü atümung khüta lirünang nührü te hütsü yochonü nührü thsümüsunung nengdang Ihnü abi nührü yang müthehchüre.

⁹Abi yola Onesimus, amüiba ko longlangchehba jünirü, sü nührü yola khüdu liro abisü rosohre. Hila tikeh yacho apüm arühnü nührü te yonung.

¹⁰I te arangyoh la liba Aristarkus ko Barnabas aku Mark nyünü nührü te salüm müdhesohre (Mark nührü yang rokhang khyüchoungpü thülacho nührünü nguko).

¹¹Justus dsiba Joshua nüsü salüm müdhesohre. Tsingrangba Yanglih nengdang I yola nguchirü Jihudarü lasih thsamülarülü hiri asang due, ko arühnü Ih khütang tro role.

¹²Nührü yola mono khüdu ko Jisu Khrista dikehrü Epafrasnü salüm müdhesohre. Tsingrangba lümcho la ayocho nyi nührü alümjing khristan khung kang drengdreng yachehnung nengdang abinü lede nührü shulüm Tsingrangba te khakhuchüjo dangkhidangnangjüre.

¹³Nührü nengdang ko Laodicea ko Herapolis la lirüti nengdang abinü müküp nguchicho Ipunü yuzi jüchehle.

¹⁴Ihsanü müiba doctor Luk, ko Demas nyühnü nührü te salüm müdhesohre.

¹⁵Laodicea la liba jünirüti ko Nemfa ko abükyü kuhla shibülungba jünirüti te ihrü salüm müdhesohng.

¹⁶Hiba vathrah hi nührü yola khipü Laodicea Lithro lasü khisohng. Ko Laodicea la liba jünirütinü müthehba vathrah tsüsü nührü yola khing.

¹⁷Ko Arkipus te Abüdongba dikehba la abi khyang jüba nguchi tsü thümnung young.

¹⁸Ih, Paul, Ipu khehnü hiba salüm yu thrahre: Ih arangyoh la licho tünbüchü. Tsingrangba achomang nührü te lieng.