Read Sangtam Naga 1 TESALONIKARÜ 1 Bible Online

1 TESALONIKARÜ 1 - Sangtam Naga bible

1 TESALONIKARÜ 1

¹Paul, Silas ko Timoti chahnü, Au Tsingrang ko Abüdongba Jisu Khrista yo, Tesalonika la liba Lithro nyitsarü yang: Nührü yanglang achomang ko atbachi thsaang.

²Nührü atümung nengdang ihrünü Tsingrangba nengsere ko ihrü dangkhidangnang la lede nührü lümchehre.

³Tunüo nührü yudsi khüta nguchi kangcho ko Abüdongba Jisu Khrista la nührü alongdi drengdrengcho nengdang, ihrünü Ihsa Au Tsingrang bete lümchehre.

⁴Ajünirüti, Tsingrangbanü nührü müire ko apu yo thsanung throchehchoepü ihrünü müdhele.

⁵Tunüo ihrünü nührü yanglang Yuse tsü yu dunü mah, ta zii la, Anbü Amüsa la ko yuje atsüptsiba la hirocho. Nührü yola lide ihrü khüta licho hütsü nührünü müdhele; hütsü nührübürü tsanung nengdang lile.

⁶Nührünü ihrü ko Abüdongba dhengchonü, nührü khütang chongcha nye, Anbü Amüsa chahnü roba akünyangnü nührünü yusi tsü khyüchoko.

⁷Hütsünü Macedonia ko Akaia la yudsirü atümung te nührü adüzü khüdu kangko.

⁸Tunüo nührü khunü Abüdongba yusi tsü Macedonia ko Akaia apümlang shuhcho du mah, ta Tsingrangba chah nührü yudsi yusi tsü apümlang sobhoko. Hütsünü ihrünü tu yonung thsütah müle.

⁹Ihrünü nührü xodhengde nührünü ihrü khüta khyüchocho, ko khüta kyothri mübüba lanü yuje ko akang liba Tsingrang dikehnung ximülacho

¹⁰ko atsudhre Jisu ninglangnü roba yingnung, sü abinü asücho lanü kanglisohcho, ko sünü aronung liba Tsingrangba rihlong chüronung lanü khümchoro, hiri nengdang nyitsarü atümungnü dangchire.