Read Sangtam Naga 1 TESALONIKARÜ 2 Bible Online

1 TESALONIKARÜ 2 - Sangtam Naga bible

1 TESALONIKARÜ 2

¹Jünirüti, Ihrünü nührü xodhengba tsü amükang mah pü nührübürünü müdhele.

²Nührü yang ihrü Tesalonika lang müroede Filipi la ihrü khüdoi nyüpmüseh mütsa bichicho, hütsü nührünü müdhele. Anyümrü khütang linye, abi chahnü roba Yuse tsü nührü te yonung Tsingrangbanü ihrü rezehsohcho.

³Nührü te ihrü akihchiba tsü arahkheh mahkhang amümüsa lümchonü mah, mahkhang khürü kihyochünung müküprü mah.

⁴Ta, Ihrünü lede Tsingrangba lümcho du chore, tunüo Yuse tsü phungkehjünungthsa abinü ihrü chah dekheng ngucho. Ihrünü nyitsarü künyangsohnung mah, ta Tsingrangba sünü ihrü alümcho müdhero abi künyangsohnung müküpre.

⁵Ihrünü nührü arahkhela se chonung, mahkhang müruthsa müyümti chocho mah pü nührünü longi müdhele. Tsingrangba ihrü yuzi lile!

⁶Khrista riwürüti tsü nührü te chingnung alang linye,

⁷nührü chahnü mahkhang aparü chahnü thsanye, ihrünü sü chahnüsü nengse ngunung mümüküp. Ta atpa khüdunü atsurü xükümcho kyo, nührü te lide ihrü longlüm licho.

⁸Ihrünü nührü khütang müichonü, ihrünü nührü te Tsingrangba Yuse changtanung du mah, ta ihrübürü akang mii jünung rungnüm licho.

⁹Jünirüti, ihrünü khee nguchicho nührünü müdhele! Tsingrangba chahnü Yuse nührü te thsingyude nührü khyang alongmüzi müjünungthsa ihrünü ama atsingse nguchicho.

¹⁰Nührü yudsirü jingte ihrü akang saying khüta amüsa, yuje ko achomükeh licho, hütsü nengdang nührü ko Tsingrangba yuzi lile.

¹¹Au khüdunü atsurü xükümcho kyo, ihrünü nührü atümung rahtahchoepü nührünü müdhele.

¹²Ihrünü nührü thsüchicho, tbachijücho, ko Tsingrangba sünü nührü apu Yanglih ko ahechi la nohlüm khyünung dsicho, abi künyangnungthsa akang linung ihrünü nührü te mütozah thsüchi rore.

¹³Lede ihrünü Tsingrangba nengseba tsü yuzi apa khüdu lile. Hütsü khode ihrünü nührü yang Tsingrangba yusi hirocho, nührünü nyitsarü yusi roh-i mah, ta Tsingrangba yusi roh-i khüi yuje liro, hütsü nyicho ko khyüchocho. Tunüo sünü yudsiro abi chah Tsingrangbanü nguchire.

¹⁴Jünirüti, Judea la Tsingrangba lithroti ko hütsüla Khrista nyitsarü chah tikehcho kyo, nührü chah tikehre. Abüdongba Jisu ko azikehrüti mapsehba ko ihrü dhsümthserü Jihudarü chahnü arüh achongcha ngucho roh-i,

¹⁵nührüsü abürü nyitsarünü dhsümthsere. Tsingrangba nengdang arüh khüta amükünyangnung! Atümung te arüh khüta arorüh!

¹⁶Ihrünü yangpirü te arüh khyang akangcheh jünung yuse thsingyunung mii yaticho. Hütsüta arühnü mütozah shitpahchonü arüh münyi ajeng kükyüko. Ko ade Tsingrangba rihlong arüh chah küduko!

¹⁷Jünirüti, nührü tenü azachah lasih lalü mah, ta shutsa la za lide, ihrü khüta lümtohcho, ko nührü thali shirünung khüdoi müküpcho.

¹⁸Ihrünü nührü yang thali ronyücho. Ipu mii khüdupi anyüpi thali wünung müküpdhengcho, ta Satan-nü ihrü mükhuchü.

¹⁹Abüdongba Jisu rode, abi jingte nührü tsü ihrü alongdi, akünyang, ko akohba la kükhingnung lile.

²⁰Yuje, nührü tsü ihrü ahechi ko akünyang!