Read Sangtam Naga 1 TESALONIKARÜ 4 Bible Online

1 TESALONIKARÜ 4 - Sangtam Naga bible

1 TESALONIKARÜ 4

¹Achangkathsa jünirüti, Tsingrangba künyangsohnungthsa nührünü khüta linung hütsü ihrü chahnü nyichoko. Ajüje, nührünü hütsü roh-i li role. Ko ade Abüdongba Jisu nengla, nührünü alaa du nguchingpü ihrünü kihchire ko thsüchire.

²Tunüo Abüdongba Jisu tase la ihrünü nührü khyang jüba athülaba tsü nührünü müdhele.

³Tsingrangbanü nührü nahtrahnaxeng lanü za müsacheh lisohnyüre.

⁴Nührü adhrerü müipinü Tsingrangba mümüdhepü müyudsirü roh-i shutsa mükhyahmürah la mah,

⁵ta amüsa ko adhichi lang la palu nitpürü te khüta linung hütsü müdhebae.

⁶Hitari la sünüsü khristan jünirü te amütsa münguchibae, mahkhang mükihyochübae. Ihrünü müngulangnü nührü te sürünü hütsü roh-i nguchinang Abüdongbanü khingchinungepü müzahsoh yoko.

⁷Tsingrangbanü Ihsa mümüsa akang linung mah, ta müsa linung dsicho.

⁸Hütsünü, sünü hiba adoba hi mükhyüchoro, abinü nyitsarü mükhyüchorü mah, ta Tsingrangba, sünü nührü khyang Anbü Amüsa jüro abi mükhyüchore.

⁹Jünirüti müinung nengdang nührü te thrahnung thsütah müle. Khüdunü khüdu te khüta müinung hütsü nührübürü te Tsingrangbanü yoko.

¹⁰Ko ajüje, nührünü Macedonia apümlang jünirüti atümung te hütsü roh-i bichiko. Hütsüeko jünirüti, nührünü alaa du nguchingpü ihrünü kihchire.

¹¹Ihrünü amüngunü nührü te yocho roh-i, sahmüthsa linung, nührü nguchi nguchinung, ko nührübürü akang linung shehshenung lüm.

¹²Hütsüta müyudsirütinü nührü chah longlangnung, ko nührü thsütah nengdang süchahsü müdümpinung.

¹³Jünirüti, alongdi mülirüti roh-i nührü müwahnung nengdang, asürüti nengdang ihrünü yuje tsü nührü khyang müdhesohnyüre.

¹⁴Ihsanü Jisu tsü sücho ko kanglichoepü yudsire, hütsü roh-i Tsingrangbanü abi chah yudsipü sürüti tsü Jisu te notsinung Ihsanü yudsire.

¹⁵Ihrünü nührü te ade tu yoro hütsü Abüdongba adoba: Abüdongba ro nyümong Ihsa akang lirü asürü tenü khütakhi akhu müthsanung.

¹⁶Tunüo Abüdongba apu riwürüti yola Tsingrangba rühti yuva arangcheh meh ninglangnü züde jüronung, ko Khrista la sürüti akhu kanglinung.

¹⁷Hütsüde Ihsa akang liyarü Abüdongba te shirütanung arüh te müjang nyükhi la mülakeh tuwünung. Ko hütsüta Ihsa Abüdongba te lede linung.

¹⁸Hütsüeko, yu hirinü nührü khüdunü khüdu rezehsohtaang.