Read Sangtam Naga 1 TESALONIKARÜ 5 Bible Online

1 TESALONIKARÜ 5 - Sangtam Naga bible

1 TESALONIKARÜ 5

¹Jünirüti, hiri tikehnung akyang nengdang nührü te thrahnung thsütah müle.

²Tunüo amala aführü rocho kyo Abüdongba nyümong tsü ronungepü nührünü longi müdhele.

³Khode nyitsarünü “Lüpcho la naying ko tbachi lile” pü yonang, hütsüde dhrongyengnü khingkurü mikhung rocho kyo achangba tsü ronung, ko nyitsarünü mütsiphunung.

⁴Ta jünirüti, hütsüba nyümong aführü roh-i nührü münehnung, nührü amala müle.

⁵Nührü atümung atsingse ko anyümong tsurüti lile. Ihsa aromang mahkhang ama yo mah.

⁶Hütsüeko, Ihsa aparü roh-i yüpseh mülibae; ta lümkang ko rahseh libae.

⁷Nyitsarünü amala yüpre; ko arühnü amala müchare.

⁸Ta Ihsalü anyümong yoe, ko rahseh libae. Yudsi ko amüi drenghap ko akangcheh alongdi idhse kuthri Ihsanü khyübae.

⁹Tunüo Tsingrangbanü abi rihlong nengdang mah, ta Ihsa Abüdongba Jisu Khrista ro nyümong Ihsa akang linye ko sünye,

¹⁰abi te müjang linung, ko abi khu akangcheh ngusohnung dsicho.

¹¹Hütsüeko nührü ade nguchi yacho roh-i, khüdunü khüdu thsüchita trotaang.

¹²Jünirüti, sürü nührü yola nguchiro, sürünü langnüro, ko khristan akang shulüm thülaro, arüh khyang athsalang jengreng jünung nührü te kihchire.

¹³Arüh nguchi ngang dee jengreng jo müi bichieng. Nührü yola kehta lieng.

¹⁴Jünirüti, adsererü müzahsohng, müsi sümrü rezehsohng, suh müzehrü troung, ko atümung te rangchonung ihrünü thsüchire.

¹⁵Sünüsü amütsa müli amütsa tüjü, ta lede khüdunü khüdu te ko atümung te atsa nguchinung nahdhengkeh thsaang.

¹⁶Lede künyang,

¹⁷mütozah dangkhidangnang,

¹⁸suro atümung la anengse jüng. Jisu Khrista la nührü akang chahnü hiba hi Tsingrangba akhyünyücho lile.

¹⁹Anbü Amüsa tsü tüthsümeh;

²⁰choyohcho tümüthsamünyü.

²¹Ta atümung müchehdheng: tu atsa hütsü yümpung

²²ko amünyi langkhüru mürieng.

²³Yangtsa Tsingrangnü lüpcho la nührü müsa yohpüjüng, ko Ihsa Abüdongba Jisu Khrista rode nührü akangshünü anbü, akang, ko afü atümung mülang müli yohpüjüng.

²⁴Sünü nührü dsiro abinü hütsü nguchinung, tunüo abi longlangchehba lile.

²⁵Jünirüti, ihrü nengdangsü dangkhidangnangjüng.

²⁶Yudsirüti atümung te jünirü kyo salüm jüng.

²⁷Hiba vathrah hi yudsirüti atümung yola khinung Ihnü Abüdongba nengla nührü te kihchire.

²⁸Abüdongba Jisu Khrista achomang nührü te lieng.