Read Sangtam Naga JOSHUA 1 Bible Online

JOSHUA 1 - Sangtam Naga bible

JOSHUA 1

¹ABÜDONGBA dikehrü Mosa süpü khanglang, ABÜDONGBAnü Mosa rükurü Nun tsurü Joshua te yocho.

²“I dikehrü Mosa süko. Hütsüeko ade nüh ko Israelrü atümung rungnüm ko Ihnü jüba lih lang tsü Jordan Yongkhi keh wüng.

³Ihnü Mosa te yocho kyo, nührünü lahkhu tsinung liba alimih apüm tsü nüh ko I müyurü atümung khyang jüko.

⁴Nührü luhrü tsü kihjing lahpi lipilih lanü kihku lahpi Lebanon zongti chiinü; nyüchürolang yongkhi arangcheh Eufrates lanü nyüzüdulang Hit-rü lih Mediteranean Kihdi chii linung.

⁵Joshua, nüh akang litashi sünüsü nüh mükohnung. Mosa te licho kyo Ih nü te linung. Ih lede nü te linung; Ihnü khodesü nüh müpehjünung.

⁶Re zehng ko müsi zieng, tunüo Ihnü arüh jümürü te nyengchocho lih la arüh züdude, nüh arüh langnürü thsanung.

⁷Re zehng, müsi mülahng; ko Mosanü nü khyang jüba Yuzeng du tsü khahkhah bichieng. Hütsüla lango dusü tülayü ko nüh khüdederü wonang nühnü kohnung.

⁸Lede Yuzeng vakha tsü nührü mübüde khieng. Nyangnyü romang mükhu hütsü khieng ko hütsüla thrah licho apüm bichieng. Hütsükhang, nüh müwanung ko akoh linung.

⁹Ihnü nü te re zehnü ko müsi zinung yuzeng jücho lümkehng. Tüdrü ko suzah tüli, tunüo Ih, ABÜDONGBA nü Tsingrang nüh khüdederü wünye nü te zeh lile.”

¹⁰Hütsüde Joshuanü langnürüti te yuzeng jücho,

¹¹“Alichah bong wünü müyurü te young, Tsuyongba aza küdang, tunüo nührü Tsingrang ABÜDONGBAnü nührü khyang jüba alimih tsü khyünung nyümong asang kahla Jordan keh wünung.”

¹²Joshuanü Reuben, Gad ko Manase hung changsho te yocho.

¹³“ABÜDONGBA dikehrü Mosanü nührü te Jordan nyüchüro langthring alih tsü nührü linung jünungepü yocho lümchehng.

¹⁴Nührü nitpürü, nührü tsuzarü ko nührü kanglungrü hila linung, ta khata nengdang throchehrü, athrungrüti

¹⁵Jordan nyüzüdulang Tsingrangbanü nührü khyang jüba lih tsü müjüchode nührü jünirü Israelrü tronung bekhulang wünung. Khode abinü Israelrü hung apüm müdongchehsohnang, hütsüpü nührünü thali ro ABÜDONGBA dikehrü Mosanü nührü khyang jücho Jordan nyüchürolang nührü lih la tsü linung kohle.”

¹⁶Arühnü Joshua te lalingcho, “Nühnü yocho apüm ihrünü nguchinung ko nühnü khüde wüsohnyürünang ihrünü wünung.

¹⁷Ihrünü Mosa te nyicho kyo nü tesü nyinung ko Mosa te licho kyo ABÜDONGBA nü Tsingrang nü te lieng!

¹⁸Sünü nü tase nyümnang ko nü yuzeng münyinang, abilü süsohnung. Re zehng ko müsi mülahng!”