Read Sangtam Naga JOSHUA 17 Bible Online

JOSHUA 17 - Sangtam Naga bible

JOSHUA 17

¹Jordan nyüzüdulang alih nohlüm khüdu Josef tsurü aziba Manase chahnü trahchochoti khyang khasah jücho. Gilead au Makhir tsü Manase tsurü aziba ko rothsarü yola akurahrü thsacho, achotsü Jordan nyüchürolang thring Gilead ko Bashan tsü abi khyang jücho.

²Nyüzüdu lahpi alih tsü Manase tsutpu anyingchoti: Abiezer, Helek, Asriel, Shekem, Hefer, ko Shemida hiri khyang jücho. Hiri tsü Josef tsurü Manase chahnü trahchochoti adhrerüti lile, ko arüh tsü tsutpu michah athahti licho.

³Manase tsurü Makhir, abi tsurü Gilead, abi tsurü Hefer, abi tsurü Zelofehad chahnü khingkurü chah khu adhrerü süsü mülicho. Khingkurüti neng tsü Mala, Noa, Hogla, Milka ko Tirza licho.

⁴Arühnü bebürü Eleazar ko Nun tsurü Joshua ko azibarü yanglang wü jünirü adhrerüti khyang alih nohlüm-o jünung Mosa khyang amülaba jüko. Hütsünü ABÜDONGBAnü mülacho kyo, arüh khyang arüh jünirü adhrerüti yola zeh alih tsü jücho.

⁵Hütsü khu Manase Jordan nyüchürolang Gilead ko Bashan chah lahkeh nohlüm dhüre ngucho,

⁶tunüo abi chahnü trahchochoti khingkurü adhrerü apüm nohlüm ngucho. Gilead lih tsü Manase chahnü trahchocho aparü khyang jücho.

⁷Manase luhrü tsü Shekem nyüchürolang Asher lanü Mikmethath chii licho. Hütsü lanü kihjing lahpi jowü Entappuarü chii zehcho.

⁸Tapua mükang lih tsü Manase yo thsacho, ta luhrü la Tapua yangdi tsü Efraim trah yo thsacho.

⁹Hütsü lanü luhrü tsü jowü Kana yongkhi chihcho. Yongkhi kihjing lahpi yangditi tsülü Manase lih la thsanye Efraimrü yo thsacho. Manase luhrü tsü yongkhi kihku lahpi tsü iiwünung ko Mediteranean kihdi la changkacho.

¹⁰Mediteranean Kihdi tsü arüh nyüzüdulang luhrü thsapü, kihjing lahpi Efraim ko kihku lahpi Manase licho. Asher tsü nyüzüdu-kihku lahpilang ko Isakar tsü nyüchüro-kihku lahpilang licho.

¹¹Isakar ko Asher lih la Manase mükangmüshü liba yangditi Dor (Kihbekhüm lang), Endor, Tana, Megido ko mükangmüshü liba yangditi zeh Beth Shan ko Ibleam zeh khyücho.

¹²Ta Manaserünü hütsüri yangditi la lirü tsü mükoh iipehcho, hütsünü Kananrü hütsüla mütozah licho.

¹³Israelrü re azeh-u kangnye arühnü Kananrü atümunglü mü-iipehchecho, ta arühnü arüh tsü arüh dikehrü kangsohcho.

¹⁴Josef trahnü Joshua te yocho. “Tuepü ihrü khyang alih nohlüm khüdu du jücho? ABÜDONGBAnü müwajüchonü ihrü khütang kangko.”

¹⁵Joshuanü lalingcho, “Nührü drongrakhang ko Efraim lih tsü nührü nengdang zarakhang, nührünü wü Perizrü ko Refimrü lih la mürong tsü tbhüpü lieng.”

¹⁶Abinü lalingcho, “Azong lih tsü ihrü nengdang mükükyü, ta Beth Shan ko hütsü mükangmüshü lirüti ko Jezrel Ngah la lirüti Kananrü tsü arüh khehla idhse nyübong kari lile.”

¹⁷Hütsüde Joshuanü Efraim ko nyüzüdulang Manaserü te yocho, “Ajüje nührü adronge, ko nührü dee rezehle. Nührülü nohlüm khüdu chah alaa ngunung.

¹⁸Azong lih tsü nührü yo thsanung. Hütsü mürong thsanye, nührünü hütsü khüulangnü-khüulang chii tbhüpü khyüng. Kananrü tsülü arüh idhse nyübong kari linye mahkhang arüh athrungrü thsanye, nührünü iipehchehnung.”