Read Sangtam Naga JOSHUA 18 Bible Online

JOSHUA 18 - Sangtam Naga bible

JOSHUA 18

¹Arühnü alih tsü mahchehpü khanglang, Israelrü yucho shünü Shilo la shimükhongcho ko hütsüla ABÜDONGBA Shükuh khüdu thsacho.

²Adesü Israelrü hung dhünyehlü ade yingcheh arüh nohlüm alih müjüepü licho.

³Hütsünü Joshuanü Israelrü te yocho, “ABÜDONGBA, nührü jümürü Tsingrangnü nührü khyang jüba alih tsü züdu khyünung khüdoi nyahli yingnung.

⁴Hung müipi lanü nyüh asang-sang throchehng. Arühnü wü alimih tsü khütoh-i khyünyürünang bongcho ronung Ihnü arüh müthehnung. Hütsüpü arühnü Ih yang thali ronung.

⁵Alih tsü nohlüm dhünyeh kang arüh khyang changnah jünung; Juda kihjing lahpi ko Josef kihku lahpi linung.

⁶Hiri tsü chang dhünyeh kang changnahng ko I yanglang hirung. Ko Ihnü ABÜDONGBA Ihsa Tsingrang te nührü nengdang zii thsadhengnung.

⁷Ta nührü yola Levirülü alih nohlüm tsü müngunung, tunüo arüh tsü ABÜDONGBA bebürü kang dikehnungba lile. Ko Gad, Reuben, nyüchürolang Manaserülü ABÜDONGBA dikehrü Mosanü arüh khyang arüh nohlüm Jordan nyüchürolang jopehko.”

⁸Joshuanü hütsüta arüh khyang athülaba jüpü khanglang arühnü alih tsü dhengnung shemüsucho: “Nührünü wünü alimih tsü apüm bongchopü I yanglang thali rung. Hütsüpü Ihnü Shilo hila ABÜDONGBA te nührü nengdang zii thsadhengnung.”

⁹Achotsü arühnü wü alih tsü apüm jücho dhengcho ko yangditi zeh arühnü dhünyeh kang changnah thrahyohcho. Hütsüpü arühnü Shilo la Joshua yang thalicho.

¹⁰Joshuanü arüh nengdang ABÜDONGBA te zii thsadhengcho ko anyingcho hungti khyang tsü nohlüm khüdu-khüdu changnah jücho.

¹¹Benjamin hung tsutpu khyang alih tsü akhu jücho. Arüh lih tsü Juda ko Josef hung nyüh kahla licho.

¹²Kihku lahpi arüh luhrü tsü Jordan lanü dikeh tuwü kihku lahpi alesha Jeriko chihnung ko nyüzüdulang azong lih khu Bethaven akungaselih chii linung.

¹³Hütsü lanü luhrü tsü Luz alesha kihjing lahpi chihnung (Bethel püsü dsicho), hütsü lanü jowü ajinglang Beth Horon khang kihjinglang Ataroth Addar chihcho.

¹⁴Luhrü tsü hütsü lanü ximüla hiba zong nyüzüdu lahpi langnü wü Juda hung yo Kiriat Baal chii licho. Hi nyüzüdulang luhrü.

¹⁵Kihjinglang luhrü tsü Kiriat Jearim changka lanü dikeh wünü Neftoa Kihna chii licho.

¹⁶Hütsü lanü jowü Hinnom Ngah dhengchahchü azong jingdümpi lanü kihku lahpi Refaim Ngah chii luhrü tsü licho. Ko hütsü lanü kihjing lahpi Hinnom Ngah Jebus Enrogel chihcho.

¹⁷Hütsü lanü Enshemesh kihku lahpi ximüla Adumin Lang khüulang Geliloth chii licho. Luhrü tsü hütsü lanü jowü Bohan Lung chii (Bohan tsü Reuben tsurü)

¹⁸ko hütsü lanü Jordan Ngah khu kihku lahpi müzing chii licho.

¹⁹Hütsü lanü Beth Hogla kihkulang angah khu wüpü licho ko Jordan Yongkhi pohyohba Asü Kihdi la kihku lahpi changnacho. Hütsü kihjing lahpi luhrü thsacho.

²⁰Nyüchürolang luhrü tsü Jordan thsacho. Benjamin hung tsutpunü nguba alih luhrü tsü hiri licho.

²¹Benjamin hung tsutpu yo yangditi tsü, Jeriko, Beth Hogla, Emek Keziz,

²²Beth Araba, Zemaraim, Bethel,

²³Avim, Para, Ofra,

²⁴Chefarammoni, Ofni, ko Geba: mükangmüshü yangditi zeh yangdi dhüre-anyüh licho.

²⁵Adesü Gibeon, Rama, Berot,

²⁶Mizpa, Chefira, Moza,

²⁷Rekem, Irpeel, Tarala,

²⁸Zela, Haelep, Jebus (mahkhang Jerusalem), Gibea ko Kiriat Jearim: arüh mükang yangdi yohnü yangdi dhüre-müyü thsacho. Benjamin tsutpunü nguba alih tsü hi thsacho.