Read Sangtam Naga JOSHUA 2 Bible Online

JOSHUA 2 - Sangtam Naga bible

JOSHUA 2

¹Hütsüpü Nun tsurü Joshuanü Shittim lanü füzathsarü nyüh anyüh müthehnü yocho, Wüng ko limih tsü dhengmükang alathsa Jeriko yangdi tsü dhengyohng. Achotsü arühnü wücho ko nahtrahnaxenglarü Rahab kuhla züdu hütsüla müdongcho.

²Hütsüde Jeriko Yangthsaba te yocho, “Dheng, Ihsa limih chehdhengnung shomang hila Israelrü khürü roko.”

³Achotsü Jeriko Yangthsabanü Rahab yang yusi hi müthehcho, “Nü yanglang ro nü kuhla züroba nyitsarüti tsü no chürung, tunüo limih apüm dhengyohnung arüh rochoba lile!”

⁴Ta Rahabnü anyüh tsü nowü rangpücho ko abükyünü yocho, “Ho, nyitsarüti tsü I yanglang roko, ta arüh khüdenü rochonang Ihnü mümüdhe.

⁵Ko anyüzehlang yangdi tbükhüm khangti kyang chihde arüh tsipehko. Ko khüilang tsichonang Ihnü mümüdhe. Zah arüh iiwüng. Nührünü arüh bhünüpnung kohle.”

⁶(Ta anyüh tsülü abükyünü drelang no küdu khengkheh bhüm la rang pümsohcho.)

⁷Achotsü arühnü füzathsarü khanglang tsü Jordan lang wüba langlang tsü iiwücho ko arüh tsiyeng tbükhüm tsü khangticho.

⁸Füzathsarü tsü müyüp-ede, abükyünü drelang tsü küdu arüh te yocho.

⁹“ABÜDONGBAnü hiba lih hi nührü khyang jükopü ihrünü müdhele ko atümungnü nührü drüre, hütsünü hiba lih la lirü atümung nührü drüchonü dhridhrisehre.

¹⁰Nührü Ijip lanü chürode, ABÜDONGBAnü nührü khyang khüta Amoh kihdi kungsohcho ko Jordan nyüchürolang liba Amor-rü yangthsarü anyüh Sihon ko Og nyüh khüta arüh changsohcho hütsü ihrünü yuchiko.

¹¹Ihrünü hütsü yuchide dro licho; nührü drüchonü ihrü müsi sümpehcho. ABÜDONGBA nührü Tsingrang tsü ning michah ko limih hila Tsingrang lile.

¹²Hütsüeko ade Ihnü nührü khüta müinü bichicho hütsü kyo nührünü ihrü kukhi te bichinung abi nengla yuchüm ko Ihnü longlangnung I khyang amüdhethsa khüdu jüng.

¹³Nührünü Iu ko Itpa, I mungrü ko I nirüti ko arüh kukhirü khümchonungepü I te nyengchoung. Ihrü tükyüseh.”

¹⁴Ko arühnü abükyü te yocho, “Ihrünü chocho kyo ihrünü münguchikhang, Tsingrangbanü ihrü akang khangsohng. Ihrünü nguchiba hi nühnü müchochikhang, ABÜDONGBAnü ihrü khyang alih hi jüh nyümong nüh tsa bichinung ihrünü nyengchore.”

¹⁵Rahabrü kuh tsü yangdi tbü chah nyehkeh thsacho khunü, abükyünü arüh tsü nyübongkhi khu rangdüshü khüdu la jowüsohcho.

¹⁶Abükyünü yocho, “Nührünü azong lang tsü tsieng, mahkhang arühnü nührü ngunung. Arüh thali müro yingcheh hütsüla nyümong asang rang püm. Hütsüpü khanglang du nührünü nührü langlang wüng.”

¹⁷Nyitsarüti tsünü abükyü te yocho, “Nühnü ihrü khyang nyengchosohba anyengchoba tsü ihrünü yohpünung.

¹⁸Ko nühnü hita nguching. Ihrünü nührü lih mah rode, nühnü ihrü jowüsohba rangdüshü amoh hi nyübongkhi la tsü rahkehng. Ko nü kuhla nüu ko nü tpa, nü jünirüti ko nüurü tsutpurü apüm dsibülung püm.

¹⁹Ko sü kuh lanü chüdunang abi süba tsü apu mülang ko hütsü ihrü bha müthsanung; ta kuhla nü te lipü khürü thsakehkhang hütsü ihrü bha thsanung.

²⁰Ta ihrünü nguchiba hi nühnü bürü te chochikhang, nühnü ihrü khyang nyengchosohba anyengchocho tsü ihrünü müyohpünung.”

²¹Hütsü abükyünü nyengchocho ko arüh tsisohcho. Arüh tsipü khanglang, abükyünü rangdüshü amoh tsü nyübongkhi la tsü rahkehcho.

²²Füzathsarü tsü wünü azong la rang pümcho. Yangthsaba nyitsarütinü rangmü apümlang nyümong asang arüh yangchicho, ta arüh münguchonü Jeriko lang thalicho.

²³Hütsüpü Füzathsarü anyüh tsü azong lang tsünü yongkhi khu jürocho, ko Joshua yanglang thali wücho. anyünü abi te atikehcho adhangpi yocho.

²⁴Ko anyünü abi te yocho, “Yutsatsa ABÜDONGBAnü alih tsü apüm Ihsa khyang jüko. Hütsüla lirü müyurüti atümungnü Ihsa drüseh lile.”