Read Sangtam Naga JOSHUA 21 Bible Online

JOSHUA 21 - Sangtam Naga bible

JOSHUA 21

¹Levirü tsutpu azibarütinü bebürü Eleazar, Nun tsurü Joshua ko Israel hung ko tsutpu azibarüti yanglang wücho.

²Kanan lih Shilo la arühnü arüh te yocho, “Ihrü khyang alinung yangditi ko ihrü kanglungrü lamungnung alih jünung ABÜDONGBAnü Mosa khu yoko.”

³Hütsünü ABÜDONGBAnü mülacho kyo Israelrünü Levirü khyang arüh lih lanü arüh linung yangditi ko kanglungrü nengdang alih jücho.

⁴Levi tsutpu Kohat hung khyang yangdi akhu jücho. Bebürü Aron chahnü trahchocho tsutpu khyang Juda, Simeon ko Benjamin lih lanü yangdi dhüre-asang jücho.

⁵Kohat tsutpu anyingcho khyang Efraim, Dan ko nyüzüdulang Manaserü lih lanü yangdi dhüre jücho.

⁶Gershon hung khyang Isakar, Asher, Naftali ko nyüchürolang Manaserü lih lanü yangdi dhüre-asang jücho.

⁷Merari tsutpu khyang Reuben, Gad ko Zebulunrü lih lanü yangdi dhüre-anyüh jücho.

⁸ABÜDONGBAnü Mosa khu mülacho kyo Israelrünü Levirü khyang hiri yangdi ko kanglungrü lamungchah tsü zii thsadhengnü throcheh jücho.

⁹Juda ko Simeon lih lanü Aron chahnü trahchocho Levi chahnü jürocho

¹⁰Kohat tsutpu khyang jüba yangditi neng tsü hiri lile. Arüh khyang akhudiba jücho.

¹¹Arüh khyang Arba yangdi (Arba tsü Anak au thsacho), Juda azong lih la hütsü mükang lamungchah mii zeh ade Hebron dsiba tsü jücho.

¹²Ta yangdi mükang alih ko yang tsü Jafunne tsurü Kaleb khyang jopehpü licho.

¹³Hebron chah lahkeh (atsikehchah yangdi khüdu), bebürü Aron trah khyang yangdi hiri jücho: Libna,

¹⁴Jatir, Eshtemoa,

¹⁵Holon, Debir,

¹⁶Ain, Jutta, ko Beth Shemesh, kanglungrü lamungchah alih zeh: Juda ko Simeon hung lanü yangdi düku.

¹⁷Benjamin lih lanü yangdi müyü jücho: Gibeon, Geba,

¹⁸Anathot ko Almon ko kanglungrü lamungji alih zeh jücho.

¹⁹Apüm yohrüta yangdi dhüre-asang Aron chahnü trahchocho bebürüti khyang jücho.

²⁰Kohat hung Levirü tsutpu aparü khyang tsü Efraim lih lanü yangdi khürü jücho.

²¹Arüh khyang yangdi müyü jücho: Efraim azong lih Shekem la kanglungrü lamungji alih zeh (atsikehchah yangdi khüdu), Gezer,

²²Kibzaim ko Beth Horon la kanglungrü lamungji alih zeh.

²³Danrü lih lanü yangdi müyü jücho: Elteke, Gibethon,

²⁴Aijalon, ko Gathrimon ko kanglungrü lamungji alih zeh.

²⁵Nyüzüdulang Manase lih lanü yangdi anyüh jücho: Tanak ko Gathrimon la kanglungrü lamungji alih zeh.

²⁶Apüm yohrüta Kohat tsutpunü kanglungrü lamungji alih zeh yangdi dhüre ngucho.

²⁷Levirü Gershon hung apa khüdunü Nyüchürolang Manase lih lanü yangdi anyüh ngucho: Bashan la Galan (atsikehchah yangdi khüdu) ko Beeshterah la kanglungrü lamungji alih zeh.

²⁸Isakar lih lanü yangdi müyü ngucho: Kishion, Daberath,

²⁹Jarmut ko Enganim la kanglungrü lamungji alih zeh.

³⁰Asher lih lanü yangdi müyü ngucho: Mishal, Abdon,

³¹Helkath ko Rehob la kanglungrü lamungji alih zeh.

³²Naftali lih lanü yangdi asang ngucho: Galil la Kedesh la kanglungrü lamungji alih zeh (atsikehchah yangdi khüdu), Hammoth, Dor ko Kartan la kanglungrü lamungji alih zeh.

³³Gershon tsutpu papa apüm yohrütako kanglungrü lamungji alih zehpü yangdi dhüre-asang ngucho.

³⁴Levirü anyingcho Merari hungnü Zebulun lih lanü yangdi müyü ngucho: Jokneam, Karta,

³⁵Dimna ko Nahalal la kanglungrü lamungji alih zeh.

³⁶Reuben lih lanü yangdi müyü ngucho: Bezer, Jahaz,

³⁷Kedemot ko Mefat la kanglungrü lamungji alih zeh.

³⁸Gad lih lanü yangdi müyü ngucho: Gilead la Ramoth la kanglungrü lamungji alih zeh (atsikehchah yangdi khüdu) Mahanaim,

³⁹Heshbon ko Jazer la kanglungrü lamungji alih zeh,

⁴⁰Hütsüta, Merari hung khyang apüm yohrüta yangdi dhüre-anyüh jücho.

⁴¹Israelrünü khyüba alih lanü, Levirü khyang kanglungrü lamungji alih zeh yangdi yürepü keh jücho.

⁴³Hütsüta ABÜDONGBAnü Israelrü khyang abinü arüh jümürü te yuchüm nyengchocho kyo alih apüm jücho. Khode arühnü hütsü mükuhchehcho, arüh hütsüla lipehcho.

⁴⁴ABÜDONGBAnü arüh jümürü te nyengchocho kyo arüh lih la tsü yangtsa lisohcho. Arüh rorüh sünüsü arüh nyüm müyachehcho, tunüo abinü Israelrü khyang arorüh apüm michah akoh jücho.

⁴⁵ABÜDONGBAnü Israelrü te nyengchocho apüm yohpücho.