Read Sangtam Naga JOSHUA 22 Bible Online

JOSHUA 22 - Sangtam Naga bible

JOSHUA 22

¹Hütsüpü Joshuanü Reuben, Gad ko Nyüchürolang Manase hungti müjang dsibülungcho.

²Abinü arüh te yocho, “ABÜDONGBA dikehrü Mosanü nührü te yocho adhangpi nührünü nguchiko ko nührünü I yuzengsü apüm nyiko.

³Hi bekhyah ayung nührünü nührü jünirü Israelrü müpehjü. Nührünü ABÜDONGBA nührü Tsingrang yuzeng müzah bichiko.

⁴Ade, Abinü nyengchocho kyo, ABÜDONGBA nührü Tsingrangnü arüh khyang yangtsa jüko. Hütsüeko adelü Jordan nyüchürolang ABÜDONGBA dikehrü Mosanü nührü khyang jüba nührü lih lang thali wüng.

⁵Mosanü nührü khyang jüba yuzeng tsü bichinung tünbüchü: ABÜDONGBA nü Tsingrang müing, Abi lümcho nguching, Abi yuzeng bichieng, Abi te yocho nyieng ko nü lasih ko nü nbü apümnü Abi dikehng.”

⁶Joshuanü abi amüwajo ko yu hiri yo müthehcho; “Nührü kuh lang dee alirü kangpü misü hon, taripi, imüyeng, idhse ko jengki khütang hipü thalire. Nührünü arorüh chahnü khyücho kohro tsü nührü jünirüti tesü changtaang.” Hütsüta arühnü yanglang thalicho. Mosanü Jordan nyüchürolang lih tsü Manase hung achangsho khyang jücho, ta achangcho ko aparü hung mii zehpü arüh khyang Joshuanü Jordan nyüzüdulang tsü jücho.

⁹Hütsüta Reuben, Gad ko Nyüchürolang Manase hungtinü arüh lih lang thalicho. Arühnü anyingcho Israelrü tsü Kanan lih Shilo la pehjüpü arühbürü lih, ABÜDONGBAnü Mosa khu jüba Gilead lang thalicho.

¹⁰Khode Reuben, Gad ko Nyüchürolang Manase hungti ro Jordan nyüzüdu lahpi Geliloth chihcho, arühnü yongkhi te Bholu arangcheh adhengtang khüdu külüpcho.

¹¹Israelrü anyingchoti te yocho “Nyieng! Reuben, Gad ko Nyüchürolang Manaserü hungtinü Ihsa lahpi Jordan te Geliloth la bholu khüdu külüpko!”

¹²Khode Israelrünü hi yuchicho, yucho shünü nyüchürolang lirüti nyüm khatanung wünung Shilo la shibülungcho.

¹³Achotsü Israelrünü Gilead lih la Reuben, Gad, ko Nyüchürolang Manase hungti yanglang bebüba Eleazar tsurü Finehas müthehcho.

¹⁴Nyüzüdulangrü ahung müipi lanü nyüh khüdu-khüdu arüh dhüre ko tsutpu la kukhi müipi athah khüdu-khüdu Finehas yola wücho.

¹⁵Arühnü Gilead lih lang Reuben, Gad ko Nyüchürolang Manase yang rocho.

¹⁶Ko ABÜDONGBA müyurü atümung nengla, arühnü yocho, “Tuepü nührünü Israel Tsingrang nyüm amünyi hi nguchicho? Nührünü Bholu hi külüpcho khu ABÜDONGBA nyümko. Adelü nührünü Abi khanglang mütsehre.

¹⁷ABÜDONGBAnü Peor la apu müyurü thsaranü khingchiba Ihsa münyisü mülümchehrü do? Hütsünü Ihsa ade yingcheh chongchare. Hütsünü mükükyü ang?

¹⁸Nührünü adelü Abi khanglang mütsehnung mah-o? Nührünü chünye ABÜDONGBA nyümkhang, Abinü atu Israel atümung te zichüronung.

¹⁹Hütsüeko ade, nührü lih la abi mübünung müdekhengkhang, ABÜDONGBA lih Abi Shükuh liba yang rung, ihrü te alih aza ching, ta ABÜDONGBA tünyüm mahkhang ABÜDONGBA Ihsa Tsingrang Bholu chah lahkeh apa Bholu tükülüp.

²⁰Zera tsurü Akhan-nü khüta changsohnung mülangjücho kohro yocho münyi khyücho hütsü lümchehng; hütsü nengdang Israelrü yucho shünü khingchicho. Abürü münyi nengdang süba tsü Akhan müleng mah.”

²¹Reuben, Gad ko Nyüchürolang Manase hungtinü nyüzüdulang tsutpu athahti te lalingcho:

²²“Akohba tsü Tsingrangba! Abi tsü ABÜDONGBA! Tuepü ihrünü hi külüpcho Abinü müdhele ko nührü khyangsü hütsü müdhesohnyüre. Ihrünü Abi nyüm ko ABÜDONGBA chah müyudsipü likhang, ihrü akang tülisoh.

²³Ihrünü ABÜDONGBA yu münyi ko ihrübürü kangmübü mahkhang tsang mübü mahkhang akehta mübü trüpnung Bholu külüpcho thsakhang, ABÜDONGBA apu khyang ihrü khingchisohng.

²⁴Mah! Ihrünü hi nguchiba hi aronung la nührü tsurütinü ihrü tsurü te, ‘ABÜDONGBA, Israel Tsingrang te nührü tu nohlüm liro?

²⁵Abinü Ihsa kahla Jordan tsü luhrü külüpjüko. ABÜDONGBA nengdang nührünü tu yonung mülepü yonung.’ Hütsüta nührü tsurütinü ihrü tsurüti ABÜDONGBA mümübüsohnung kohle.

²⁶Hütsünü kangmübü trüpnung mahkhang amübü mübünung nengdang mah,

²⁷ta Ihsa khanglang müyurütinü ajüje ihrüsü Amüsa Shükuh la ihrü amübü ko kangmübü te ABÜDONGBA mübo liko pü müdhesohnung nengdang ihrünü Bholu hi külüpcho. Hi nührü tsurütinü ihrü tsuzarüti te nührülü ABÜDONGBA nengdang tu nohlüm mülepü müyosohnung külüpcho lile.

²⁸Ihrünü lümba tsü, hütsüta tikehkhang, ihrü tsuzarünü, ‘Dheng! Ihrü jümürünüsü ABÜDONGBA Bholu tsatsa külüpko pü yochehsohnung külüpcho. Hütsü amübü ko kangmübü trüpnung nengdang mah, ta Ihsa müyurüti kahla amüdhethsa lile.’

²⁹Ihrünü ABÜDONGBA nyümnü mah mahkhang amübü, tsang mübü mahkhang kangmübü trüpnung bholu külüp abi khanglang müwünungba mah. Ihrünü Shükuh la liba Ihsa Tsingrang ABÜDONGBA bholu chah khu apa tu mükülüpnung.”

³⁰Bebüba Finehas ko Langnürü dhüre nyüzüdulang hungti la tsutpu la athahtinü Reuben, Gad ko Nyüchürolang Manaserünü yocho tsü nyicho ko arüh longsücho.

³¹Bebüba Eleazar tsurü Finehasnü arüh te yocho, “Ade ABÜDONGBA Ihsa te lilepü ihrünü müdhele. Nührünü Israelrü ABÜDONGBA akhingchi lanü khümchoko.”

³²Hütsüpü Finehas ko langnürütinü Gilead lih la Reuben ko Gadrü pehjüpü Kanan lang Israelrü yanglang thali wü arüh te yusi tsü yocho.

³³Israelrünü longsücho ko Tsingrangba secho. Adelü arühnü Reuben ko Gadrü liba lih lang wü khata changsohnung tsü müdangchipehcho.

³⁴Reuben ko Gad-rünü yocho, “ABÜDONGBA tsü Tsingrangepü hiba Bholu hi yuzi lile.” Hütsünü arühnü hütsüte, “Yuzi dsicho.”