Read Sangtam Naga JOSHUA 23 Bible Online

JOSHUA 23 - Sangtam Naga bible

JOSHUA 23

¹Anyahlipü ABÜDONGBAnü Israelrü khyang arüh mükang arorühti tenü akyahshang jücho. Hütsütadelü Joshua dee ashirü kangpü licho.

²Achotsü abinü Israelrü azibarüti, langnürüti, yukharüti ko müyurü yola thsazirüti atümung dsinü yocho, “Adelü Ih dee shiko.

³Nührü nengdang ABÜDONGBA nührü Tsingrangnü nührü nengdang khatajücho.

⁴Ihnü mahchehba ko ade nying liba yuchoti yo alih nyüchürolang Jordan Yongkhi lanü nyüzüdu Mediteranean kihdi chii nührü khyang Ihnü changnah jüko.

⁵ABÜDONGBA nührü Tsingrangnü nührü wüde nührü tenü arüh shehsohnung ko arüh iipehjünung. ABÜDONGBA nührü Tsingrangnü nyengchocho kyo nührünü arüh lih khyünung.

⁶Hütsüeko Mosa Yuzeng vakha la thrah licho lüpcho müzah bichieng. Hütsüla lango dusü tülayü

⁷ko nührü yola pehjüba nyitsarü yola tülahrü mahkhang arüh tsingrang neng tüdangchi mahkhang yuchümde ko mübüde hütsüri neng dangchi tümübü.

⁸Ta nührünü ade yingcheh lirocho kyo, ABÜDONGBA te yochonyi lieng.

⁹Nührü rode ABÜDONGBAnü akurahrü yuchoti iipehjücho ko nührü bete sünüsü müyachehsohcho.

¹⁰Nührü nyüh khüdunü hajar dro tsisohcho, tunüo ABÜDONGBA nührü Tsingrangnü nührü nengdang khatajücho.

¹¹Hütsüeko ABÜDONGBA nührü Tsingrang müinung tünbüchü.

¹²Nührünü yocho münyi nührü yola liba yucho parü te mükhong ko arüh te kuthri-yangthrikhang,

¹³ABÜDONGBA nührü Tsingrangnü nührü wüde hiri yuchoti mü-iipehjünungepü nührünü müdheing. Hütsü mahpü arüh tsü nührü nengdang zeng mahkhang mütrüm ko nührü thsela xüpcho mahkhang nahla zeng zehcho thsacho kyo linung. Ko hütsü ABÜDONGBA nührü Tsingrangnü nührü khyang jüba alih atsa hila nührü khüdusü nying müli yingcheh linung.

¹⁴“Adelü Ih sünung thsako. Nührü müipi lasih la ko thoh la ABÜDONGBA nührü Tsingrangnü nyengchocho atsa lüpcho jükopü müdhele. Abinü nyengchocho apüm yohpüko; khüdusü mütitpheh.

¹⁵Ta Abinü nyengchocho apüm yohpücho kyo, Abinü khingchibasü hütsüroh-i linung.

¹⁶ABÜDONGBA Tsingrangnü mülacho azengtaba tsü nührünü müyohpükhang ko nührünü aparü tsingrang dikeh ko mübükhang, Abinü rihlong chüro nührü khingchinung ko tunyah mülipü Abinü jüba alih atsa hila nührü süsü nying mülinung.”