Read Sangtam Naga JOSHUA 3 Bible Online

JOSHUA 3 - Sangtam Naga bible

JOSHUA 3

¹Nyangnyü khüu tsü Joshua ko Israelrü apüm mütoh suro Akacia pehjüpü Jordan lang ro hütsü mükehkhude yingcho.

²Nyümong asang khanglang azirütinü arüh lichah bong wünü müyurü te yocho,

³“Khode bebürütinü nührü Tsingrang ABÜDONGBA Yuzeng Singdi tsü dhi bipü tsi ngunang, nührünü palu alichahnü shemüsu arüh khanglang iiwüng.

⁴Nührü akhulang khodesü hila müro, hütsüeko nührü te arühnü lang tsü ngusohnung. Ta Yuzeng Singdi shündhün tüwü; hütsü tenü lutri khüdu-o nü za akhanglang tsehng.”

⁵Joshuanü müyurü te yocho, “Nührü jangjang müsachehng, tunüo atu ABÜDONGBAnü nührü yola thsayahiya nguchinung.”

⁶Hütsüpü abinü bebürü te Yuzeng Singdi tsü dhipü müyurü bekhu tsinung yocho. Ko arühnü abinü yocho kyo nguchicho.

⁷ABÜDONGBAnü Joshua te yocho, “Ihnü chünye tu nguchiro hi khu Israelrünü nüh arangcheh kyo dhichi bichinung dikehnung ko Mosa kyo Ih nü te lile pü müdhenung.

⁸Yuzeng Singdi dhirü bebürüti te tsü khode arühnü yongkhi bekhüm tsü chihnang, züdu yongkhi la tsü yanung young.”

⁹Hütsüpü Joshuanü müyurü te yocho, “Hila rung ko nührü Tsingrang ABÜDONGBAnü tu yoro nyieng.

¹⁰Nührü wüde, Abinü Kananrü Hit-rü, Hivrü, Perizrü, Girgashrü, Amor-rü ko Jebusrü yujüje nührü bekhu iipehjünung.

¹¹Khode nührü bekhu limih apüm ABÜDONGBA Yuzeng Singdi tsünü Jordan kehnang, nührü yola akang liba Tsingrang lilepü nührünü müdhenung.

¹²Ade Israel hung müipi lanü nyüh khüdu-khüdu, nyüh dhüre-anyüh throchehng.

¹³Khode limih apüm ABÜDONGBA Yuzeng Singdi dhirü bebürü tsünü kih la arüh jing mütrahrangnang, Jordan yongkhi tsü pohzahnung ko pohjüroba kih tsü müdüm khüdu la tingbülung yanung.”

¹⁴Hütsü maxa bekhyah ko yongkhi tsü kihmülüm licho.

¹⁵Khode Müyurünü Jordan kehnung arüh lichah pehjücho, bebürünü Yuzeng Singdi tsü dhipü arüh bekhu wücho.

¹⁶Bebürütinü yongkhi la tsü mütrahyoh yeng, kih tsü pohkacho, ko Zarethan müshüm Adam yangdi chii kih tsü tingbülung yacho. Asü Kihdi yang pohjüroba tsü nyehpehcho ko müyurüti tsü Jeriko tenü lahkhucho.

¹⁷Müyurü tsü akung lanü tseh lahkhude, bebürüti tsü müyurü apüm mütsikhangde Jordan yongkhi long la ABÜDONGBA Yuzeng Singdi dhipü yacho.